«قوجا. جاڭا ساياحات» فيلمى كورەرمەنگە جول تارتادى
استانا. KAZINFORM - ايگىلى «مەنىڭ اتىم قوجا» فيلمىنىڭ جالعاسى، زاماناۋي فورماتتا 13-ناۋرىزدان باستاپ ەلىمىزدىڭ بارلىق كينوتەاترىندا كورسەتىلە باستايدى. فيلم الماتى وبلىسىنىڭ كەگەن اۋدانى جالاڭاش، ساتى اۋىلدارىندا ءتۇسىرىلدى.
- كلاسسيكالىق تۋىندىنى قايتا جاندىرۋ يدەياسى، «قالام» مەكتەبىنەن باستالدى، بۇل بالالاردى ماتەماتيكاعا باۋليتىن مەكتەپ. ويلانا كەلە، بالالارعا قوجا ۇنايدى دەپ، ءبىر مينۋتتىق كرەاتيۆتى ۆيدەو ءتۇسىرىپ، الەۋمەتتىك جەلىگە جۇكتەدىك، حالىقتىڭ ساعىنىشى بىردەن بايقالدى. سودان بۇل فيلمدى قايتا جانداندىرىپ، تۇسىرمەسكە دەگەن وي كەلىپ، نارتاۋەكەل ەتتىك. باسى قويىڭدار، قاتە يدەيا دەگەندەر بولدى، بۇل ۇلكەن جاۋاپكەرشىلىك، سول دەڭگەيدە تۇسىرە الماساڭدار حالىقتىڭ سىنىنا قالاسىڭدار دەپ ايتتى، دەگەنمەن شەشىنگەن سۋدان تايىنباس دەگەندەي ءفيلمدى تۇسىرۋگە كىرىسىپ كەتتىك، - دەدى «قوجا جاڭا ساياحات» فيلمىنىڭ رەجيسسەرى قۋات يبراگيموۆ تۇساۋكەسەر راسىمىندە.ونىڭ ايتۋىنشا، فيلمنىڭ جاڭا نۇسقاسىنىڭ سەناريىندە وزگەرىس بار. بەردىبەك سوقپاقبايەۆتىڭ شىعارماسىنا تولىق نەگىزدەلگەن.
- مىسالى، العاشقى فيلمدە قوجا عارىشكەر بولۋدى ارمانداسا، ءبىزدىڭ فيلمدە جازۋشى بولعىسى كەلەدى جانە سول ارمانى ورىندالادى. سەبەبى كىتاپتا سولاي جازىلعان. فيلمدى تۇسىرۋگە 1 ايدان اسا ۋاقىت كەتتى. اكتەرلىك قۇرامعا كەلسەك، ارتىستەردى قازاقستان بويىنشا ىزدەپ، كاستينگ وتكىزدىك جانە ىرىكتەۋ ۇزاققا سوزىلدى. كەيىپكەرلەردىڭ 70 پايىزىن الەۋمەتتىك جەلىدەن تاپتىق دەسەم بولادى، كاسىبي ارتىستەر دە بار. ءبىراق، قوجانىڭ رولىنە تالاس بولعان جوق، بىزدە ءبىر عانا كانديدات بولدى، جالپى فيلمدى ءتۇسىرۋ يدەياسى سول قوجاعا ۇقسايتىن بالانى كورگەننەن كەيىن تۋىندادى، بۇگىنگىنىڭ قوجاسىن كورسەتۋ كەرەك بولدى. قوجانى سومداعان بالانىڭ ەسىمى ايقىن، ول اۋىلدىڭ قاراپايىم بالاسى، ەشقانداي اكتەر بولۋدى ارمانداماعان. ءبىزدىڭ قوجانىڭ تۋماسى العاشقى فيلمدەگى قوجاعا ۇقساس، - دەيدى ول.
فيلمنىڭ جابىق كورسەتىلىمىنە جينالعان جۇرتتىڭ قاراسى كوپ بولدى. كورەرمەندەر فيلمدە قوجانىڭ ءرولىن سومداعان ايقىن ەلۋبايمەن جارىسا سۋرەتكە ءتۇستى. اراسىندا ۋاقىت تاۋىپ جاس تالانتپەن تىلدەسكەن ەدىك.
15 جاسار ايقىن ەلۋباي شىمكەنتتىڭ ىرگەسىندەگى اقبۇلاق اۋىلىنىڭ تۋماسى قازىر 9-سىنىپتا وقىپ جاتىر.
- مەنىڭ ءتۇرىم قوجاعا ۇقساعانىمەن ارتىستىك بىلىك- ءبىلىمىم بولمادى، سوندىقتان ءبىرىنشى كاستينگتەن وتە المادىم، ەكىنشى رەت باق سىناۋ ءۇشىن 4 اي دايىندالدىم. ءبىراق، فيلمدە باياعى قوجانىڭ بەينەسىن سومداعان جوقپىن، ءوزىمدى وينادىم، سەبەبى مەنىڭ ءتۇر- الپەتىم، ءجۇرىس-تۇرىسىم نۇرلان سەگىزبايەۆ اتاما كەلەدى. «مەنىڭ اتىم قوجا» فيلمىن العاش وسىدان 2 جىل بۇرىن كوردىم. جالپى ءوزىم كوكپار شابامىن، تراكتور ايدايمىن، - دەيدى جاس ءارتىس.
جاسءوسپىرىمنىڭ قوجاعا ۇقسايتىنىن فيلم تۇسىرىلىمىنە دەيىن ءبىراز ادام ايتقان.
- اعام مەنى ۆيدەوعا ءتۇسىرىپ ءبىز قوجانى تاپتىق دەپ جەلىگە سالدى، سودان كەيىن جەلىدە تانىلا باستادىم. وسى فيلمگە كاستينگ ديرەكتورى تارتتى، سونىمەن قاتار Kalifarniya دەگەن ءانشىنىڭ كليپىنە ءتۇستىم. بيىل 9-سىنىپتى بىتىرگەن سوڭ، الماتى قالاسىنا ءارتىس ماماندىعىنا وقۋعا تۇسسەم دەپ جوسپارلاپ ءجۇرمىن، - دەيدى ول.
جاس ارتىستەن مەكتەپتەگى ساباق ۇلگەرىمى تۋرالى سۇراعان ەدىك، قينالعان ءتۇر تانىتىپ «ورتاشا» دەپ قىسقا قايىردى.
ايقىن ەلۋبايعا «قوجا. جاڭا ساياحات» فيلمىنەن بولەك، كينوعا تۇسۋگە ءبىراز ۇسىنىس ءتۇسىپتى، ءبىراق جاس ءوسپىرىم الدىمەن وقۋىم كەرەك دەپ وتىر.
- ۇسىنىس وتە كوپ، مەنى «جوشى حان» فيلمىنە تۇسۋگە دە شاقىردى، مەن بولاشاقتا اكتەرلىك جولدى تاڭدايمىن دەپ وتىرمىن، سوندىقتان ماعان الدىمەن ءبىلىم الۋ قاجەت، - دەيدى ول.
جاس ءوسپىرىم ونەردەن بولەك، سپورتقا دا جاقىن، 3 جىل بوكس جانە 7 جىل كۇرەسپەن اۋەستەنىپتى جانە بوس ۋاقىتىندا اتقا مىنگەندى ۇناتادى.
ەسكە سالا كەتسەك، 2022 -جىلى ەلوردادا «مەنىڭ اتىم قوجا» فيلمىنىڭ كەيىپكەرىنە ەسكەرتكىش ورناتىلدى.
سونداي-اق بىلتىر قاراشادا پاريجدەگى يۋنەسكو شتاب- پاتەرىندە «مەنىڭ اتىم قوجا» فيلمىنىڭ كورسەتىلىمى ءوتتى.
