قوجا احمەت ياساۋيدىڭ سيرەك ەڭبەكتەرى تۇركىستانداعى كورمەگە قويىلدى
استانا. KAZINFORM - مەملەكەت باسشىسىنىڭ «كىتاپ وقيتىن ۇلت» جوباسى اياسىندا «ازىرەت سۇلتان» ۇلتتىق تاريحي-مادەني مۋزەي-قورىعى «فاراب» وبلىستىق كىتاپحاناسىندا «قوجا احمەت ياساۋي مۇرالارى» كىتاپ كورمەسىن ۇيىمداستىردى.
مادەنيەت جانە اقپارات مينيسترلىگى باسپا ءسوز قىزمەتى اتاپ وتكەندەي، ءىس-شارا رەسپۋبليكا كۇنى قارساڭىندا ءوتتى.
كورمەگە وتاندىق جانە شەتەلدىك عالىمدار، تاريحشىلار، ءدىنتانۋشىلار، زيالى قاۋىم وكىلدەرى، مادەنيەت جانە مۋزەي ءىسىنىڭ ماماندارى قاتىستى. ولاردىڭ قاتارىندا تۇركيا، رەسەي، وزبەكستان جانە قىرعىزستاننان كەلگەن زەرتتەۋشىلەر بولدى.
كىتاپ كورمەسىندە قوجا احمەت ءياساۋيدىڭ ءومىرى مەن شىعارماشىلىعىن، رۋحاني مۇراسىن زەرتتەۋگە ارنالعان عىلىمي ەڭبەكتەر، مونوگرافيالار، ماقالالار جيناقتارى، اۋدارمالار مەن سيرەك باسىلىمدار ۇسىنىلدى.
ءىس-شارا «سىرداريانىڭ ورتا جانە تومەنگى اعىسى الابىنداعى تۇركى مادەنيەتى» حالىقارالىق عىلىمي-پراكتيكالىق كونفەرەنسياسى اياسىندا ءوتىپ، كورمەنى 200 گە جۋىق ادام تاماشالادى.
قاتىسۋشىلار قوجا احمەت ياساۋي مۇراسىنا ارنالعان عىلىمي ەڭبەكتەرمەن تانىسىپ، قازاقستان مەن شەتەل عالىمدارى زەرتتەۋ ناتيجەلەرى مەن تاجىريبەلەرىن ورتاعا سالدى.
بۇعان دەيىن مەملەكەتتىك ناگرادالار قاتارىنا قوجا احمەت ياساۋي وردەنى ەنگىزىلەتىنىن جازدىق.
