قىرعىزدار قازاقستان قۇراماسىن كوكپاردان قارىمتا ويىنعا شاقىردى

استانا. قازاقپارات - V دۇنيەجۇزىلىك كوشپەندىلەر ويىندارىندا كوكپاردان قازاقستان مەن قىرعىزستان اراسىنداعى ويىن تارتىسقا تولى بولىپ، 5:4 ەسەبىمەن وتانداستارىمىز جەڭىسكە جەتكەن. وسى ويىننان كەيىن قىرعىزداردىڭ كوڭىلى تولماي، نارازىلىق تانىتقان بولاتىن.

بۇگىن بەلگىلى بولعانداي، قىرعىزستان كوكبورى فەدەراتسياسىنىڭ وكىلدەرى قازاقستانعا 1-قاراشادا قارىمتا كەزدەسۋ وتكىزۋدى ۇسىنىپ وتىر.

«ءبىز 1-قاراشادا سول باياعى قۇراممەن كوكبورى مەن كوكپار ويناۋدى ۇسىنامىز. بۇل - سپورت. ويىن ەكى حالىق اراسىندا الاۋىزدىق تۋدىرماۋى ءتيىس. ءبىز حالىقتارىمىزدىڭ كەلىسىمى ءۇشىن جەكە امبيتسيالاردان باس تارتۋعا دايىنبىز. تورەشى باسقا ەلدەن بولادى»، - دەدى كوكبورى فەدەراتسياسىنىڭ باسشىسى راميس جۇنىساليەۆ باسپا ءسوز ماجىلىسىندە.

بۇل جارىس «كەلىسىم كۋبوگى» دەپ اتالماق. ولار 16-قىركۇيەكتە قازاقستان كوكپار فەدەراتسياسىنا شاقىرۋ حات جىبەرگەن.

ايتا كەتەيىك، كوشپەندىلەر ويىندارىندا قازاقستان كوكپاردان، قىرعىزدار كوكبورىدەن جارىس جەڭىمپازى اتانعان بولاتىن.