قوجا احمەت ياساۋي كەسەنەسىنىڭ جاعدايىن ارنايى كوميسسيا انىقتايدى

 تۇركىستانداعى كەسەنەنىڭ جاعدايىن ارنايى قۇرىلعان كوميسسيا انىقتايدى. بۇل تۋرالى تۇركىستان قالاسىنىڭ اكىمى نۇربول تۇراشبەكوۆ مالىمدەدى، دەپ حابارلايدى Kazinform. 

تۇركىستانداعى تاريحي نىسان توڭىرەگىندە كوپتەگەن الىپ-قاشپا اڭگىمە ايتىلىپ جۇرگەنىنە ءبىرشاما ۋاقىت بولدى.

600 جىلدان استام تاريحى بار نىساننىڭ كەي قابىرعالارى قۇزدانىپ، سۋلانا باستاعان. تۇزى شىعىپ كەتكەن جەرلەرى دە بار.

بۇدان الدىن قوجا احمەت ياساۋي كەسەنەسىنە قاۋىپ ءتونىپ تۇرعانىن Kazinform اگەنتتىگىنىڭ ارنايى ماتەريالىندا جاريالاعان بولاتىنبىز.

بۇگىن تۇركىستان وڭىرلىك كوممۋنيكاتسيالار قىزمەتىندە وتكەن بريفينگتە قالا اكىمى نۇربول تۇراشبەكوۆ كەسەنە اۋماعىندا ارنايى كوميسسيا جۇمىس ىستەپ جاتقانىن ايتتى.

«ەكى-ءۇش ايدان بەرى تۋريستەردى كەسەنەنىڭ ارتقى ەسىگىنەن كىرگىزىپ جاتىر. نەگىزگى جاعىندا رەكونسترۋكسيا ءجۇرىپ جاتىر. ول بويىنشا كوميسسيا قۇرىلعان. ەندى ونى ماماندار ءبىر جىل بويى انىقتايدى. قازىر ىلعالدانۋ ءار ماۋسىمدا قاي دەڭگەيدە بولاتىنىن زەرتتەلىپ جاتىر. ماسەلەن كەسەنەنىڭ جاعدايى جاز، كۇز، قىسقى ماۋسىمدا جانە كوكتەمدە قالاي بولادى؟ سودان كەيىن بارىپ قورىتىندى شىعادى. سول كەزدە عانا ناقتى جاۋاپ ايتىلادى. بۇگىنگى تاڭدا جۇمىس باستالدى»، - دەدى قالا اكىمى نۇربول تۇراشبەكوۆ.