قوشانوۆ: قوعامدىق كەڭەستەردىڭ ۇسىنىمدارىن قاراۋ بويىنشا جاۋاپكەرشىلىكتى كۇشەيتۋ قاجەت

مەملەكەت باسشىسىنىڭ تاپسىرمالارى اياسىندا حالىق كەڭەسىنىڭ مۇشەلەرى وڭىرلىك قوعامدىق كەڭەستەرمەن تىعىز بايلانىستىڭ ماڭىزدىلىعىن اتاپ ءوتتى. كونستيتۋتسيالىق زاڭعا سايكەس حالىق كەڭەسىنىڭ قىزمەتى جەرگىلىكتى دەڭگەيدەگى قوعامدىق كەڭەستەر ارقىلى قامتاماسىز ەتىلەدى. مۇنداي سەرىكتەستىك بىردەن بىرنەشە سالادا بەلسەندى جۇمىس ىستەۋگە باعىتتالعان.

«مەملەكەت باسشىسى وڭىرلەرمەن قوعامدىق كەڭەستەر ارقىلى بەرىك بايلانىس ورناتۋ مىندەتىن قويدى. بۇل بىزگە جاڭا مۇمكىندىكتەرگە جول اشادى. ءار ادامنىڭ پىكىرى ەسكەرىلىپ، ءار ازامات ەلدىك ماسەلەلەردى تالقىلاۋعا ءوز ۇلەسىن قوسا الادى. ءبىزدىڭ باستى مىندەتىمىز - حالىقتىڭ ۇنىنە دەر كەزىندە قۇلاق اسىپ، تالاپ-تىلەگىن تىڭداي ءبىلۋ. الداعى ۋاقىتتا وسىنداي باسقوسۋلاردى تۇراقتى تۇردە وتكىزەمىز. ورتاق ماقساتقا قول جەتكىزۋ ءۇشىن وزدەرىڭىزبەن بىرلەسىپ جۇمىس اتقاراتىن بولامىز»، - دەدى ەرلان قوشانوۆ.

قوعامدىق ساراپتامانىڭ الەۋەتىنە - ەلىمىزدىڭ تۇكپىر-تۇكپىرىندەگى 228 كەڭەس پەن 3,5 مىڭعا جۋىق قاتىسۋشىنىڭ تاجىريبەسىنە سۇيەنە وتىرىپ، قازاقستان حالىق كەڭەسىنىڭ مىندەتى - وڭىرلەردەن كەلىپ تۇسەتىن سان الۋان ۇسىنىستار مەن ماسەلەلەردى جالپىۇلتتىق كۇن تارتىبىنە بىرىكتىرىپ، ناقتى شەشىمدەر ازىرلەۋ. وسى ماقساتتا بەيىندى كوميتەتكە حاتشىلىقپەن بىرلەسىپ، دەرەكتەردى تۇراقتى تۇردە جيناۋ تەتىگىن جولعا قويۋ تاپسىرىلدى. جۇيەلى پروبلەمالاردىڭ ءبىرىڭعاي كارتاسىن جاساۋ وڭىرلىك سىن- قاتەرلەردى ناقتى كورۋگە جانە قانداي ماسەلەلەر بويىنشا جۇمىس تاجىريبەسىن وزگەرتۋ، ۇكىمەت شەشىمدەرىن قابىلداۋ نەمەسە زاڭدارعا تۇزەتۋلەر ەنگىزۋ قاجەت ەكەنىن جەدەل ايقىنداۋعا مۇمكىندىك بەرەدى.

2015-جىلى قابىلدانعان قولدانىستاعى «قوعامدىق كەڭەستەر» تۋرالى زاڭعا كەشەندى تۇگەندەۋ جۇرگىزۋ قاجەتتىگىن ايتا وتىرىپ، حالىق كەڭەسىنىڭ ءتوراعاسى ونىڭ نورمالارىن حالىق كەڭەسى تۋرالى كونستيتۋتسيالىق زاڭمەن بايلانىستىرۋ ءۇشىن بەيىندى كوميتەت جانىنان ارنايى جۇمىس توبىن قۇرۋدى تاپسىردى.

سونىمەن قاتار، شەشىمدەر قابىلدانعانعا دەيىن مىندەتتى قوعامدىق ساراپتاما جۇرگىزۋ مەن ىقتيمال تاۋەكەلدەردى باعالاۋدى كوزدەيتىن «نولدىك وقىلىم» تەتىگىنە ەرەكشە نازار اۋدارىلدى. اسىرەسە، مەملەكەتتىك باعدارلامالار مەن نورماتيۆتىك اكتىلەردى ازىرلەۋ كەزىندە بۇل ءتاسىلدى قولدانۋ ماڭىزدى ەكەنى اتاپ ءوتىلدى. قوعامدىق كەڭەستەردىڭ الدىنداعى ناقتى جاۋاپكەرشىلىكتى ارتتىرۋ ماقساتىمەن مەملەكەتتىك ورگانداردىڭ باسشىلارىنا ولاردىڭ ۇسىنىمدارىنىڭ ورىندالۋى بويىنشا كەڭەستەر الدىندا جەكە ەسەپ بەرۋ مىندەتىن زاڭنامالىق تۇرعىدان بەكىتۋ ۇسىنىلدى. سونداي-اق وڭىرلەردەگى ۇزدىك تاجىريبەلەردى كەڭىنەن تاراتۋ جانە ورتاق ماسەلەلەردى بىرلەسىپ شەشۋ ءۇشىن قوعامدىق كەڭەستەر اراسىنداعى كولدەنەڭ ىنتىماقتاستىقتى دامىتۋ ماڭىزدى مىندەتتەر رەتىندە ايقىندالدى. بۇدان بولەك، وڭىرلەردەگى ناقتى احۋالدى كورسەتەتىن ءارى جالپىۇلتتىق كۇن ءتارتىبىن قالىپتاستىرۋعا سەنىمدى نەگىز بولاتىن جىل سايىنعى تالدامالىق «قوعام بايانداماسىن» ازىرلەۋ ۇسىنىلدى.

وتىرىس بارىسىندا الماتى قالاسى قوعامدىق كەڭەسىنىڭ ءتوراعاسى نۇرجان جاقىپوۆ تا باستامالاردى دەربەس سۇيەمەلدەۋ يدەياسىن ورتاعا سالدى. ونىڭ ايتۋىنشا، قوعامدىق باستامالارمەن جۇمىس «ىرىكتەۋ جۇيەسى» قاعيداتى بويىنشا ۇيىمداستىرىلادى: ءار كەزەڭدە ولاردىڭ ساپاسى ارتىپ، حالىق كەڭەسىنىڭ ستاندارتتارىنا سايكەستىگىن قامتاماسىز ەتۋ ءۇشىن قۇقىقتىق تۇرعىدان پىسىقتالادى. وسى ماقساتتا ءاربىر باستاماعا حالىق كەڭەسىنىڭ ءبىر مۇشەسىن بەكىتۋ جوسپارلانىپ وتىر.

سونىمەن قاتار، قازاقستان حالىق كەڭەسىنىڭ مۇشەسى نۇرتاي سابيليانوۆ قوعامدىق كەڭەستەردىڭ قىزمەتىن جەتىلدىرۋ جونىندەگى ءوز پايىمىمەن ءبولىستى. ولاردىڭ ءبىرى - قوعامدىق كەڭەستەردى قالىپتاستىرۋدىڭ ءبىرىڭعاي ءارى اشىق ستاندارتتارىن زاڭنامالىق دەڭگەيدە بەكىتۋ. ماڭعىستاۋ وبلىسى قوعامدىق كەڭەسىنىڭ ءتوراعاسى بەكمۇرات ءجۇسىپوۆتىڭ باستامالارى كەڭەس مۇشەلەرىنىڭ حالىق كەڭەسىمەن ءوزارا ءىس-قيمىل جاساۋ تارتىبىنە قاتىستى بولدى.

وتىرىسقا قازاقستان رەسپۋبليكاسى پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى جاندوس شايماردانوۆ، «قازاقستاندىق قوعامدىق دامۋ ينستيتۋتى» ك ە ا ق باسقارما ءتوراعاسى جۇلدىزاي ىسقاقوۆا جانە باسقا دا تۇلعالار قاتىستى.