قوعامدىق ورىندا ماس جۇرگەندەرگە قانداي جازا بار؟
استانا. KAZINFORM – پاۆلودار وبلىسىندا قوعامدىق ورىنداردا ماس جۇرگەن 9 مىڭنان اسا ادام جاۋاپقا تارتىلدى، - دەپ حابارلايدى وبلىستىق ءى ءى ب.
پوليتسيا دەپارتامەنتىنىڭ مالىمەتىنشە، كوپتەگەن قۇقىقبۇزۋشىلىق ءدال وسى الكوگولدىڭ كەسىرىنەن بولادى.
«بيىل وبلىس اۋماعىندا ماس كۇيدە جاسالعان 610 قىلمىس تىركەلدى. قوعامدىق ورىنداردا الكوگول ىشكەن، اۋلادا، كىرەبەرىستە، ايالدامادا جانە ساياباقتاردا ماس جۇرگەن ادامدار تۋرالى 5822 رەت 102 نومىرىنە قوڭىراۋ شالىندى. ءبىر تاۋلىك ىشىندە وسىنداي 36 حابارلاما تىركەلدى»، - دەپ مالىمدەدى پاۆلودار وبلىسى پوليتسيا دەپارتامەنتىنىڭ باسپا ءسوز قىزمەت وكىلى.
ماسەلەن، تورايعىروۆ كوشەسىندەگى ءۇي تۇرعىنى بەسىنشى قاباتتاعى كىرەبەرىستە ماس ادام جاتقانىن حابارلادى. سول سەكىلدى م. ءجۇسىپ كوشەسىندەگى ءۇي ماڭىنان تاعى ءبىر ماس ادام تابىلعان. پوليتسيا قىزمەتكەرلەرى بۇل ادامداردى ۋاقىتشا بەيىمدەلۋ جانە دەتوكسيكاتسيا ورتالىعىنا جەتكىزىپ، كەيىن اكىمشىلىك جاۋاپكەرشىلىككە تارتتى. سول كۇنى اكادەميك شوقين كوشەسىنىڭ تۇرعىندارى كىرەبەرىستىڭ ماڭىندا ماس ادامدار توبەلەسكەلى جاتىر دەپ حابارلاعان. پوليتسەيلەردىڭ جەدەل كەلۋى ارقاسىندا بۇزاقىلىقتىڭ الدى الىندى. ماس كۇيىندە قوعامدىق ورىندا جۇرگەندەرى ءۇشىن كىنالىلەر اكىمشىلىك جازاعا تارتىلدى.
قوعامدىق ورىنداردا ىشىمدىك ىشكەنى جانە ماس كۇيدە جۇرگەنى ءۇشىن 5 ايلىق ەسەپتىك كورسەتكىش (ا ە ك) كولەمىندە ايىپپۇل سالىنادى، ال ءبىر جىل ىشىندە قايتالانعان جاعدايدا ايىپپۇل مولشەرى 10 ا ە ك- كە دەيىن ارتادى.
ايتا كەتەيىك، ازاماتتار ماس كۇيدە جۇرگەندەر تۋرالى 102 نومىرىنە نەمەسە Police 102 موبيلدى قوسىمشاسى ارقىلى حابارلاي الادى.
