قوعامدى ەلەڭ ەتكىزگەن «ايكا ءتىزىمى»: كىنالىلەرگە ۇكىم كەسىلدى

استانا. KAZINFORM - الماتى قالاسىنىڭ اۋەزوۆ اۋداندىق سوتى قوعامدى ەلەڭ ەتكىزگەن «ايكا ءتىزىمى» بويىنشا قىلمىستىق ءىستى قارادى.

ايتا كەتەيىك، ايىپتالۋشى رەتىندە م. جانە ت. ەسىمدى ازاماتتار سانالعان بولاتىن.

تەرگەۋ ورگانى م.-نى اسا ءىرى مولشەردە پسيحوتروپتىق زاتتى زاڭسىز يەمدەندى، ساقتادى جانە تاسىمالدادى، سونداي-اق 52 ەپيزود بويىنشا ءبىر توپ ادامدارمەن جەڭگەتايلىق جاسادى دەپ (ق ك-نىڭ 296-بابىنىڭ 4-بولىگى، 309-بابىنىڭ 2-بولىگى، 1-تارماعى) ايىپتادى.

ال، ت.-عا ءبىر توپ ادامدارمەن 12 ەپيزود بويىنشا جەڭگەتايلىققا كومەكتەستى دەگەن ايىپ تاعىلدى (ق ك-نىڭ 28-بابىنىڭ 5-بولىگى، 309-باپتىڭ 2-بولىگى، 1-ت. ).

سوت وتىرىسى جابىق رەجيمدە ءوتتى. بەلگىلى بولعانداي، 2023 -جىلدىڭ مامىر ايىندا م. اسا ءىرى مولشەردە مەفەدروندى (پسيحوتروپتىق زاتتى) ساتۋ ماقساتىنسىز زاڭسىز ساتىپ الىپ، وزىمەن بىرگە زاڭسىز تاسىمالداعان. ۇستاۋ كەزىندە پوليتسيا قىزمەتكەرلەرى سوتتالۋشىنىڭ سومكەسىنەن پسيحوتروپتىق زات تاركىلەگەن.

سونداي-اق م. 2020-2023 -جىلدار ارالىعىندا ماتەريالدىق پايدا الۋ ماقساتىندا ت.-مەن بىرلەسىپ، ينتيمدىك قىزمەت كورسەتۋ ءۇشىن جەڭگەتايلىق جاساعان.

م. وسى قىزمەتتەر ارقىلى جەكە ءوزى نەمەسە سىبايلاسى ت. ارقىلى قىزداردان اقشا الىپ وتىرعان.

سوتتالۋشىلاردىڭ كىناسى كۋالاردىڭ ايعاقتارىمەن، ساراپتامالىق قورىتىندىلارمەن جانە ءىس بويىنشا باسقا دا ماتەريالدارمەن دالەلدەندى.

م. كىناسىن ءىشىنارا مويىنداعان، ت. كىناسىن مويىنداماعان. پروكۋرور م.-نى جالپى قىلمىس جيىنتىعى بويىنشا 4 جىلعا، ت. عا 3,5 جىلعا باس بوستاندىعىنان ايىرۋ جازاسىن تاعايىنداۋدى سۇرادى.

جازا تاعايىنداۋ كەزىندە سوت م.-نىڭ جاساعان ىسىنە وكىنەتىنىن، قىلمىستى اشۋعا بەلسەندى تۇردە كومەكتەسكەنىن، جاس بالاسىنىڭ بولۋىن جەڭىلدەتەتىن ءمان-جايلار رەتىندە تانىدى.

ت.-نىڭ قىلمىستىق جاۋاپتىلىعى مەن جازاسىن جەڭىلدەتەتىن جانە اۋىرلاتاتىن ءمان-جايلار انىقتالمادى.

وسىلايشا، م. ق ك-نىڭ 296-بابىنىڭ 4-بولىگى، 309-بابىنىڭ 2-بولىگى، 1-تارماعى بويىنشا كىنالى دەپ تانىلىپ، وعان قىلمىستار جيىنتىعى بويىنشا تۇپكىلىكتى 6 جىل 6 اي تۇرىندە جازا تاعايىندالدى.

ال، ت. ق ك-نىڭ 28-بابىنىڭ 5-بولىگى، 309-باپتىڭ 2-بولىگى، 1-تارماعى بويىنشا كىنالى دەپ تانىلىپ، وعان 3 جىل 8 اي تۇرىندە جازا تاعايىندالدى.

سوتتىڭ ۇكىمى زاڭدى كۇشىنە ەنگەن جوق.

اۆتور
ورالحان قوجانوۆ