قوعامدا موبيلدى اۋدارىمداردى قولدانۋ ايتارلىقتاي تومەندەدى
استانا. KAZINFORM - مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى موبيلدى اۋدارىمداردى باقىلاۋدىڭ شاعىن جانە ورتا بيزنەسكە اسەرى تۋرالى پىكىرىن ايتتى.

− موبيلدى اۋدارىمداردى باقىلاۋ بيزنەسكە كەرى اسەرىن تيگىزۋى مۇمكىن ەمەس، بۇل جەردە تەك قانا كىرىستەر زاڭداستىرىلادى. جالپى قازاقستانداعى سالىق مولشەرلەمەسى سالىستىرمالى تۇردە ەڭ تومەن بولىپ سانالادى. اسىرەسە ورتا كاسىپكەرلىكتە مولشەرلەمەسى 1-4 پايىز ارالىعىندا ارنايى سالىق رەجيمى بار. بۇل كاسىپكەرلەر ءۇشىن ءتيىمدى مۇمكىندىك، تەك قانا تابىسىن جاسىرماي كورسەتۋى كەرەك، − دەدى ەرسايىن كوپتىلەۋ ۇلى اگەنتتىكتىڭ «Bizdin orta» پودكاستىندا.
ماماننىڭ ايتۋىنشا، جارتى جىلدا تابىستىڭ جالپى كولەمى 24 مىڭ ا ە ك- تەن اسسا (94 ميلليون 368 مىڭ تەڭگە)، بيزنەس جالپى سالىق رەجيمىنە وتەدى. ءبىر جىلداعى تابىس 20 مىڭ ا ە ك- تەن (78 ميلليون 640 مىڭ تەڭگە) اسسا، قوسىلعان قۇن سالىعىنا تىركەلۋگە مىندەتتى.
− بىزدە بولشەكتىك سالىق رەجيمى بار، وندا قانشا قىزمەتكەر جالداسا دا شەكتەۋ جوق، اينالىمى 2 ميلليارد تەڭگەدەن استام قاراجاتىن ەمىن-ەركىن جۇرگىزە الادى. بۇل ورتا بيزنەسكە جاسالعان ۇلكەن مۇمكىندىك، ونداعى سالىق 4-8 پايىز ارالىعىندا. سونىمەن بىرگە، بۇل سالىق ستاۆكالارى ءار ءوڭىردىڭ ءماسليحاتىنىڭ شەشىمىمەن 50 پايىزعا دەيىن تومەندەتىلۋى مۇمكىن. جانە بۇل مۇمكىندىكتى كوپتەگەن وبلىستار پايدالانعان. سوندىقتان كوپتەگەن وڭىردە جەكە تۇلعاعا قىزمەت كورسەتسە 4 پايىز، زاڭدى تۇلعاعا قىزمەت كورسەتسە - 8 پايىز بولشەكتىك سالىق رەجيمى ىسكە قوسىلعان، - دەيدى سپيكەر.
سونداي-اق، ە. كوپتىلەۋ ۇلى موبيلدى اۋدارىمدار تەكسەرىسىن قوعامعا زياندى شارا دەپ قابىلداۋعا بولمايتىنىن ايتتى. ونىڭ ايتۋىنشا، قايتا قوعامنىڭ جاڭا مۇمكىندىگىن اشاتىن، جاڭا الەۋمەتتىك نىسانداردىڭ اشىلۋىن، جاڭا شارالارعا ۇلكەن ىقپالىن تيگىزەتىنىن ەسكەرگەن ءجون.
− قازىر قوعامدا ءموبيلدى اۋدارىمداردى قولدانۋ تومەندەدى. وسى شەكتەۋ قويىلعالى ساراپشىلاردىڭ ايتۋىنشا، كاسىپكەرلەر بۇرىن كىرىسىن بارىنشا تومەندەتىپ كورسەتەتەتىن. ءموبيلدى اۋدارىم تاقىرىبى شىققالى كاسىپكەرلەر قاراجاتىن بيزنەس شوتقا اۋىستىرعان جانە تابىستارى ءبىرشاما ارتقان. سوندىقتان بۇل شارا ءوز ناتيجەسىن بەرىپ جاتىر. سالىق تۇسىمدەرىنىڭ ارتاتىنا ەش كۇمانىمىز جوق، ءبىراق قانشاعا ارتاتىنىن ۋاقىت كورسەتەدى. قازىردىڭ وزىندە وزگەرىس بايقالدى، جاۋاپكەرشىلىك پايدا بولدى، − دەدى كوميتەت وكىلى.
ايتا كەتەيىك، مەملەكەتتىك كىرىستەر كوميتەتى موبيلدى اۋدارىم بويىنشا قالاعان ۋاقىتىندا كەز كەلگەن تۇلعانىڭ شوتىن تەكسەرە المايدى.