قوعامعا ىرىتكى سالاتىن ءاربىر ارەكەتكە توسقاۋىل قويامىز - پرەزيدەنت

استانا. KAZINFORM - ءبارىمىز كەز كەلگەن اقپاراتقا سىن كوزبەن قاراپ، تەك رەسمي مالىمەتتەرگە سۇيەنۋىمىز قاجەت. بۇل تۋرالى مەملەكەت باسشىسى قاسىم-جومارت توقايەۆ «بىرلىك. جاسامپازدىق. ورلەۋ» تاقىرىبىمەن ءوتىپ جاتقان قازاقستان حالقى اسسامبلەياسىنىڭ كەزەكتى 33-سەسسياسىندا ايتتى.

«قازىرگى كۇردەلى كەزەڭدە ەلدىڭ بىرلىگى مەن ىنتىماعىن ساقتاۋ - ەڭ باستى مىندەت. ءبىز قوعامعا ىرىتكى سالاتىن ءاربىر ارەكەتكە توسقاۋىل قويامىز. مەن بۇرىن دا ايتقانمىن، قازاقتىڭ مەملەكەتتىگىنە قارسى كەيبىر تەرىس پيعىلدى ادامدار قاراپ وتىرمايدى. «اتىڭ شىقپاسا، جەر ورتە» دەگەن. ولار قوعام ىشىنە ىرىتكى سالۋ ءۇشىن الەۋمەتتىك جەلىدە ءتۇرلى قيتۇرقى ارەكەتتەرگە باراتىنى انىق. ءبىر سوزبەن ايتساق، حالىق اراسىندا جالعان مالىمەت تاراتادى. سوندىقتان ءبارىمىز كەز كەلگەن اقپاراتقا سىن كوزبەن قاراپ، تەك رەسمي مالىمەتتەرگە سۇيەنۋىمىز قاجەت. جۇرتىمىز ەل تاعدىرى سىنعا تۇسكەن ساتتە قايسارلىق تانىتىپ، ىنتىماعىن ساقتاي بىلگەن. جاناشىرلىق، تىلەۋلەستىك سياقتى ادامي قاسيەتتەردى بارىنەن بيىك قويعان. ءبىز تاريحتىڭ تاعى ءبىر سىناعىنان ءوتىپ جاتىرمىز. بىرنەشە اپتا بويى حالقىمىزدىڭ بىرلىگى مەن تاباندىلىعى جانە تەڭدەسسىز تابيعات اپاتىن ابىرويمەن ەڭسەرۋ قابىلەتى سىنعا تۇسۋدە»، - دەدى پرەزيدەنت.

مەملەكەت باسشىسىنىڭ پايىمىنشا، كەز كەلگەن داعدارىس ءبىز ءۇشىن سىناق قانا ەمەس. ول ءارقايسىمىزدىڭ بويىمىزدا بۇعىپ جاتقان كۇش-قۋاتىمىز بەن قارىم-قابىلەتىمىزدى اشىپ، تىڭ مۇمكىندىكتەر بەرەدى.

«ەلىمىزدىڭ وركەندەۋىنە كەدەرگى كەلتىرەتىن نارسەنىڭ ءبارى، ەرتە مە، كەش پە، تاريح قويناۋىنا ەنىپ، كەلمەسكە كەتەدى. ەندەشە، قازىرگى تابيعات اپاتى بايبالامعا سالىپ، ومىردەن تۇڭىلەتىندەي نارسە ەمەس. ءوسىپ-وركەندەۋ جولىندا ءتۇرلى كەدەرگى كەزدەسەدى. ءبىراق ونىڭ ارتىنان جاقسىلىق كەلەدى. بۇل الاپات تاسقىن ءبىز ءۇشىن جالعان جەتىستىككە الدانىپ، «زايا كەتكەن كەزەڭنەن» اجىرايتىن جولايرىق بولۋعا ءتيىس»، - دەدى قاسىم-جومارت توقايەۆ.

اۆتور
مارلان جيەمباي