قوعامداعى «وقىماساڭ، مال باعاسىڭ» دەگەن قاساڭ تۇسىنىكتى بۇزعىم كەلەدى - شاريپا بازاربايەۆا
استانا. KAZINFORM - مال شارۋاشىلىعى دا ۇلكەن ءبىلىمدى تالاپ ەتەدى. مۇنداي پىكىردى اۋىل شارۋاشىلىعى ەڭبەككەرلەرىنىڭ Ⅲ فورۋمى اياسىندا وتباسىلىق شارۋاشىلىق يەسى شاريپا بازاربايەۆا ءبىلدىردى.
- اتا كاسىپتى دامىتۋعا وسىدان 7 جىل بۇرىن كەتكەن بولسام، الەۋمەتتىك جەلىنى بەلسەندى جۇرگىزىپ باستاعانىما 5 جىل بولدى. نەگىزى ءوزىم بۇل سالاعا جۋرناليستيكا ماماندىعىنان اۋىسىپ كەلدىم. نە ءۇشىن الەۋمەتتىك جەلى جۇرگىزدىم دەسەڭىز - قىردا قارايىپ قالمايىن دەگەن ماقسات. ودان كەيىن ەندى اۋىل شارۋاشىلىعى بلوگىن ءتۇسىرىپ باستادىق، وزىمىزشە. ءبىزدى قارايتىن وقىرماننىڭ كوپشىلىگى - ءوزىمىز سياقتى مال شارۋاشىلىعىمەن اينالىساتىن ازاماتتار، مالشى قاۋىم، ودان بولەك ەندى قالاعا كوشىپ كەتىپ، اۋىلىن اڭساپ، اۋىلىن ساعىنىپ جۇرگەن وقىرماندار،- دەدى شاريپا بازاربايەۆا.
ول الەۋمەتتىك جەلىدە بارىنشا بەلسەندى بولعىسى كەلەتىنىن ايتادى.
- سەبەبى قوعامدا «وقىماساڭ، مال باعاسىڭ» دەگەن قاساڭ تۇسىنىك قالىپتاسقان. وسىنى بۇزعىم كەلەدى. ءاۋ باستا قانداي ماقساتتا ايتىلعانىن بىلمەيمىن. «وقىماساڭ، مال باعاسىڭ» دەگەنى «وقىماساڭ، بىرەۋگە جالدانىپ مال باعاسىڭ» دەگەن نيەتتە شىعار، بالكىم باسقا بولار. ءبىراق مال شارۋاشىلىعىنىڭ ءوزى ۇلكەن ءبىر ءبىلىمدى تالاپ ەتەدى، قاجىرلى ەڭبەكتى تالاپ ەتەدى. قازىر ەندى جولداسىم ەكەۋمىز دالادا ەڭبەك ەتىپ، مال باسىن كوبەيتىپ وتىرمىز. ونىڭ ىشىندە قازاقتىڭ اقباس سيىرى، ەدىلباي تەكتەس قوي بار. بۇل باعزى زاماننان كەلە جاتقان اتا كاسىبىمىز ءارى ءالى دە وزەكتى. سوندىقتان جولداسىم - ەكونوميست، ءوزىم جۋرناليست بولساق تا، ماماندىعىمىزدى اۋىستىرىپ، بۇل كاسىپكە كەلگەنىمىزگە وكىنبەيمىز،- دەدى ول.
شاريپا بازاربايەۆا اۋىل شارۋاشىلىعى سالاسىنا مەملەكەت باسشىسى ۇلكەن ءبىر قولداۋ ءبىلدىرىپ وتىرعانىن ايتادى.
- بۇگىنگى تاڭدا ءدال وسى سالامەن اينالىسامىن دەگەندەرگە مەملەكەت گرانتتار ءبولىنىپ، نەشە ءتۇرلى باعدارلاما قاراستىرىلعان. بار مۇمكىندىكتى بارىنشا يگەرىپ، ۇتىمدى پايدالانا الساق مەملەكەتىمىزدىڭ ەكونوميكاسىنا دا ۇلكەن پايدا اكەلەدى، - دەدى شارۋاشىلىق يەسى.
ايتا كەتەيىك، ەلىمىزدە اۋىل شارۋاشىلىعى كاسىپورىندارىنىڭ سانى ەكى ەسەدەن استام ءوستى.