قۇتقارۋشىلار قيىن جاعدايدا جۇمىس ىستەپ جاتىر - ت ج م

استانا. KAZINFORM - توتەنشە جاعدايلار ۆيتسە-ءمينيسترى باۋىرجان سىزدىقوۆ ۇكىمەت وتىرىسىندا تاسقىنمەن كۇرەس اسىرەسە قۇتقارۋشىلارعا قيىن ءتيىپ جاتقانىن ايتتى.

«قۇتقارۋ جانە شۇعىل جۇمىستاردى اتقارۋ كەزىندە ءتيىمدى ادىستەر مەن تاسىلدەر ەنگىزىلدى. مىسالى، اقتوبە، سولتۇستىك قازاقستان وبلىستارىندا پونتون كوپىرلەرىن ورناتۋ جانە تەز ارادا سۋ بۇرۋ ارنالارىن سالۋ ءادىسى قولدانىلدى. بۇل شارالار كولىك بايلانىسىن قامتاماسىز ەتۋ مەن سۋ باسۋ ءقاۋپىن ازايتۋ مۇمكىندىگىن بەردى. زارداپ شەككەندەردى ەۆاكۋاتسيالاۋ جانە ورنالاستىرۋعا قاتىستى بارلىق ماسەلە شۇعىل شەشىلىپ جاتىر. ازاماتتارعا دەر كەزىندە مەديتسينالىق جانە پسيحولوگيالىق كومەك كورسەتىلۋدە. قۇتقارۋشىلار بوسانعان ايەلدەردى قۇتقارعان دا جاعدايلار بولدى. ولاردىڭ بارلىعى اۋرۋحانالارعا امان-ەسەن جەتكىزىلدى. يەلەرى تاستاپ كەتكەن ءۇي جانۋارلارىن دا سۋدا قالدىرماي، قاۋىپسىز جەرگە كوشىرۋدەمىز»، - دەدى ۆيتسە-مينيستر.

سونداي-اق، ول جەكەلەگەن ازاماتتار ۇيلەرىن تاستاپ كەتكىسى كەلمەگەنىن دە اتاپ ءوتتى.

«ولارمەن كەلىسسوزدەر جۇرگىزۋگە كوپ ۋاقىت كەتتى. ءبىراق ەۆاكۋاتسيا ولاردىڭ قاۋىپسىزدىگىن ساقتاۋدىڭ جالعىز جولى ەكەنى ءتۇسىندىرىلدى. قۇتقارۋ كەزىندە مۇمكىندىگى شەكتەۋلى جاندارعا، قارتتارعا، ايەلدەر مەن بالالارعا باسىمدىق بەرىلدى. سۋ باسۋ ايماقتارىنان بارلىعى 119 مىڭعا جۋىق ادام الدىن الا، ونىڭ ىشىندە 44 مىڭنان استامى بالا ەۆاكۋاتسيالاندى. قۇتقارۋشىلار مەن جۇمىلدىرىلعان بارلىق قىزمەتكەر تاۋلىك بويى جانە وتە قيىن جاعدايدا جۇمىس ىستەپ جاتقانىن باسا اتاپ وتكىم كەلەدى»، - دەدى باۋىرجان سىزدىقوۆ.