قۇتقارۋشى ۆيدەولارى ارقىلى كوپشىلىككە قارقارالى تابيعاتىن پاش ەتىپ ءجۇر
قاراعاندى. KAZINFORM - قاراعاندى وبلىسى قارقارالى اۋدانىنىڭ تۋماسى ولجاس تولەۋبەكتىڭ شىعارماشىلىققا ەش قاتىسى بولماسا دا، سوڭعى بىرنەشە ايدا ول تۋعان ولكەسى جايلى ادەمى بەينەروليكتەر ءتۇسىرىپ، ونى تانىمال ەتۋگە زور ۇلەسىن قوسىپ كەلەدى، دەپ حابارلايدى Kazinform ءتىلشىسى.
ولجاس قارقارالى قالاسىنىڭ 16-ءورت ءسوندىرۋ بولىمىندە بولىمشە كومانديرى قىزمەتىن اتقارادى. جاسى 31 دە، وتباسىن قۇرىپ، ءبىر بالا تاربيەلەپ وتىر.
مەكتەپ بىتىرگەن سوڭ قاراعاندى جوعارى پوليتەحنيكالىق كوللەدجىن «قۇتقارۋشى» ماماندىعى بويىنشا بىتىرگەن. قولىنا ديپلومىن العان بەتتە، تۋعان اۋىلىنا ورالعان. بىرنەشە جىلدان بەرى وقىعان ماماندىعى بويىنشا قىزمەت اتقارىپ كەلەدى.
قارقارالىنىڭ قالىڭ ورماندارى مەن اسقار تاۋلارىن كورىپ وسكەن ولجاس بۇل سۇلۋلىقتى قالايشا كوپشىلىككە كورسەتسەم ەكەن دەپ ويلانعانىنا ءبىراز بولىپتى. وسىدان بىرنەشە اي بۇرىن سول ارمانىن جۇزەگە اسىرماقشى بولىپ، كۆادروكوپتەر ساتىپ الىپ، بەينە روليكتەر تۇسىرە باستاعان.
«بەينەروليكتەر ءتۇسىرىپ جۇرگەنىمە ءبىر جىل بولعان جوق. مامىردا باستاعانمىن. ارنايى وسىنداي بەينە ءتۇسىرۋ ءۇشىن درون ساتىپ الدىم ءوز قاراجاتىما. ينتساگرامنان قانشاما بلوگەرلەر جانە درونمەن بەينە تۇسىرەتىن وپەراتورلاردىڭ جۇمىستارىن كورىپ، قىزىعاتىنمىن. كوبىنە الماتى مەن استانانىڭ ۆيدەوبلوگەرلەرى ۇنايدى. سولاردىڭ جۇمىستارىنا قاراپ، ءوزىمنىڭ تۋعان ولكەمدى تۇسىرگىم كەلدى. ءبىزدىڭ ولكەنىڭ، قارقارالىنىڭ تابيعاتى كەرەمەت! جەرگىلىكتى تۋريزمنىڭ دامۋىنا ۇلەسىمدى قوسقىم كەلدى. درونمەن بەينە تۇسىرەتىن بەلگىلى بلوگەردەن كۋرس ساتىپ الىپ، كۆادروكوپتەرمەن جۇمىس ىستەۋدى، تۇسىرگەن بەينەمنىڭ ءتۇسىن رەتتەۋدى ۇيرەندىم. ول كۋرستى دا ءوز قاراجاتىما ساتىپ الدىم»، - دەيدى ولجاس.
ونىڭ ايتۋىنشا، الەۋمەتتىك جەلىدە جاريالاعان بەينەروليكتەردى https://www.instagram.com/p/C6ULdKJrCw5/ قارقارالىنىڭ بۇرىنعى تۇرعىندارى كورىپ، كوڭىلدەرى بوساپ، تۋعان جەرىنە دەگەن ساعىنىشىن جەتكىزەدى ەكەن.
الايدا ەڭ باستىسى - قارقارالىنىڭ سۇلۋ تابيعاتىنا ءتانتى بولعاندار سانى كوبەيىپ كەلە جاتقانىندا.
«الەۋمەتتىك جەلىلەردە جەكەمە دە، جاريالانىم استىنداعى پىكىرلەردە دە قارقارالىنىڭ تۋمالارى، باسقا قالاعا كوشىپ كەتكەن جەرلەستەرىمىز «وسىنداي بەينەروليكتەردى كوبىرەك ءتۇسىرشى، اۋلىمىزعا دەگەن ساعىنىشىمىزدى، ماۋقىمىزدى باسامىز» دەپ جازىپ جاتادى. اراسىندا مەنىڭ تۇسىرگەن بەينەمدى كورىپ، تابيعاتىمىزعا قىزىعىپ، قارقارالىعا ارنايى كەلگەندەر دە بار. بۇل بىزدە تۋريستىك الەۋەتتىڭ جوعارى ەكەنىن كورسەتەدى»، - دەيدى ولجاس تولەۋبەك.
الداعى ۋاقىتتا ول قىمباتىراق درون ساتىپ الۋدى ارماندايدى. سەبەبى باستاپقىدا حوببي بولعانىمەن، ونىڭ ءتۇسىرىپ جاتقان دۇنيەسى تۋعان جەرىن تەك قازاقستاندا عانا ەمەس، شەت ەلدە دە تانىمال ەتەدى دەگەن سەنىم نىعايىپ كەلەدى. الەۋمەتتىك جەلىدە #Qazalemi حەشتەگىمەن شىققان بايقاۋ دا بۇعان تۇرتكى بولار دەگەن ءۇمىت بار.
ەسكە سالساق، ەلىمىزدە #Qazalemi حەشتەگىمەن كونكۋرس جاريالانعان بولاتىن. بايقاۋعا كەز كەلگەن قازاقستاندىق قاتىسا الادى. شارتى دا قاراپايىم: قاتىسۋشى الەۋمەتتىك جەلىدە ءوز پاراقشاسىندا تۋعان جەرىنىڭ سۇلۋلىعىن كورسەتەتىن بەينە روليك نەمەسە فوتوسۋرەت سالىپ، #Qazalemi حەشتەگىن قويۋى ءتيىس.
