قۇستاردى تاماشالاۋ ينسۋلت العان ادامنىڭ سويلەۋ قابىلەتىن قالپىنا كەلتىرۋى مۇمكىن

ينسۋلتتەن كەيىنگى ەڭ ءجيى كەزدەسەتىن سالداردىڭ ءبىرى - افازيا. بۇل جاعدايدا ادامنىڭ ينتەللەكتىسى ساقتالعانىمەن، سويلەۋ، وزگەنىڭ ءسوزىن ءتۇسىنۋ، وقۋ نەمەسە جازۋ قابىلەتى بۇزىلۋى مۇمكىن. عالىمداردىڭ مالىمەتىنشە، افازيا ينسۋلت العان ادامداردىڭ شامامەن ۇشتەن بىرىندە كەزدەسەدى.

مونتانا ۋنيۆەرسيتەتىندە افازياسى بار ادامدارعا ارنالعان Intensive Comprehensive Aphasia Program بىرنەشە جىلدان بەرى جۇمىس ىستەيدى. باعدارلاما ادەتتە ءتورت اپتاعا سوزىلىپ، اپتاسىنا ءتورت كۇن وتەدى. قاتىسۋشىلار شامامەن 80 ساعات وڭالتۋ شارالارىنا قاتىسادى.

باعدارلاما اياسىندا قۇستاردى باقىلاۋ 2021 -جىلدان باستاپ ەنگىزىلگەن. باستاپقىدا قاتىسۋشىلار جاپالاقتار تۋرالى بىلگىسى كەلگەن. كەيىن بۇل باعىت كەڭەيىپ، جىرتقىش قۇستاردى باقىلاۋ، ءدۇربى مەن تەلەسكوپتاردى قولدانۋ، قۇس داۋىسىن تانۋ جانە تابيعاتتاعى دىبىستاردى تىڭداۋ سياقتى ارەكەتتەر قوسىلعان.

مۇنداي ورتادا سويلەسۋ مىندەتتى تۇردە سوزبەن عانا جۇرمەيدى. افازياسى بار ادام قۇستى كورسەتۋى، سۋرەتىن تاڭداۋى، ىم قولدانۋى، جازۋى نەمەسە سمارتفون ارقىلى ويىن جەتكىزۋى مۇمكىن. مامانداردىڭ ايتۋىنشا، بۇل قالىپتى اڭگىمەگە قاراعاندا تىلدىك قىسىمدى ازايتىپ، ادامنىڭ قارىم- قاتىناسقا قاتىسۋىنا كوبىرەك مۇمكىندىك بەرەدى.

ءار قاتىسۋشىعا ادەتتە سويلەۋ جانە ءتىل تەراپياسى بويىنشا دايىندىقتان ءوتىپ جۇرگەن مامان نەمەسە ستۋدەنت سەرىكتەس بولادى. ول قاجەت كەزدە اڭگىمەنى جالعاستىرۋعا، ءسوزدى تۇسىنۋگە نەمەسە ءوز ويىن جەتكىزۋگە كومەكتەسەدى. ال قۇستار تۋرالى مازمۇندى ورنيتولوگتار جۇرگىزەدى.

زەرتتەۋشىلەر قۇس باقىلاۋدىڭ تاعى ءبىر ارتىقشىلىعى - ادامنىڭ الەۋمەتتىك ورتاعا قايتا ارالاسۋىنا جاعداي جاساۋى دەپ ەسەپتەيدى. ينسۋلتتەن كەيىن افازياسى بار ادامدار بۇرىنعى قىزىعۋشىلىقتارىنان، الەۋمەتتىك بايلانىستارىنان الىستاپ قالۋى مۇمكىن. ال تابيعاتتاعى ورتاق ارەكەت جاڭا اڭگىمە تاقىرىبىن، قىزىعۋشىلىق پەن كۇندەلىكتى بەلسەندىلىكتى قالىپتاستىرادى.

دەگەنمەن بۇل ءتاسىلدىڭ كلينيكالىق تيىمدىلىگى ازىرگە دالەلدەنگەن جوق. جاريالانعان ماقالادا باقىلاۋ توبى نەمەسە ستاندارتتالعان كلينيكالىق ناتيجەلەر جوق. اۆتورلار وزدەرى دە قۇس باقىلاۋدىڭ سويلەۋ قابىلەتىنە، پسيحولوگيالىق جاعدايعا جانە ءومىر ساپاسىنا ناقتى قانشالىقتى اسەر ەتەتىنىن انىقتاۋ ءۇشىن باقىلاناتىن زەرتتەۋلەر مەن ۇزاق مەرزىمدى باقىلاۋ قاجەت ەكەنىن اتاپ وتەدى.

سوعان قاراماستان، عالىمدار ءتاسىلدىڭ قولجەتىمدىلىگىنە نازار اۋدارادى. قۇس باقىلاۋ ءۇشىن مىندەتتى تۇردە ورمانعا نەمەسە ارنايى قورىققا بارۋدىڭ قاجەتى جوق، ونى تەرەزەدەن، اۋلادان نەمەسە ساياباقتان باستاۋعا بولادى. سوندىقتان مۇنداي ءادىس بولاشاقتا ينسۋلتتەن كەيىنگى وڭالتۋدىڭ قوسىمشا قۇرالىنا اينالۋى مۇمكىن.