قۇس شارۋاشىلىعىن دامىتۋعا قانداي قولداۋ كورسەتىلەدى - بەكتەنوۆ جاۋابى

- قازىرگى ۋاقىتتا رەسپۋبليكادا 7 اسىل تۇقىمدى رەپرودۋكتور جۇمىس ىستەيدى، ونىڭ ىشىندە 4 ەۋى - ەت باعىتىندا. وتاندىق اسىل تۇقىمدى ماتەريالمەن قامتاماسىز ەتىلۋ جۇمىرتقا باعىتى بويىنشا 32 پايىزدى جانە ەت باعىتى بويىنشا 44 پايىزدى قۇرايدى. بۇل ماسەلەنى شەشۋ ءۇشىن ۇكىمەت وتاندىق اسىل تۇقىمدى بازانى كەڭەيتۋ جانە جاڭا رەپرودۋكتورلار قۇرۋعا ينۆەستيتسيالاردى ىنتالاندىرۋ بويىنشا شارالار قابىلداپ جاتىر. اتاپ ايتقاندا، سولتۇستىك قازاقستان وبلىسىنىڭ تاجىريبەسىن تاراتۋ باعدارلاماسىنا 10 جىلعا دەيىنگى مەرزىمگە جىلدىق مولشەرلەمەسى 2,5 پايىزدى قۇرايتىن جەڭىلدەتىلگەن كرەديتتەر بەرە وتىرىپ، اسىل تۇقىمدى رەپرودۋكتورلار قۇرۋ بويىنشا جاڭا باعىت ەنگىزىلدى، - دەدى ولجاس بەكتەنوۆ.

ۇكىمەت باسشىسىنىڭ دەرەگىنشە، اسىل تۇقىمدى رەپرودۋكتورلار قۇرۋ كەزىندە ينۆەستيتسيالىق سۋبسيديالاۋ ءنورماتيۆى 25 تەن 40 پايىزعا دەيىن ۇلعايتىلدى. سونداي-اق ەت جانە جۇمىرتقا باعىتىنداعى ءبىر كۇندىك اسىل تۇقىمدى بالاپاندى ساتىپ الۋدى ءار بالاپانعا تيىسىنشە 600 جانە 60 تەڭگە مولشەرىندە سۋبسيديالاۋ كوزدەلگەن. بۇدان بولەك، مال شارۋاشىلىعىن دامىتۋدىڭ 2026-2030-جىلدارعا ارنالعان كەشەندى جوسپارى وسى جىلدىڭ باسىنان بەرى قۇس فابريكالارى مەن رەپرودۋكتورلاردىڭ اينالىم قاراجاتىن تولىقتىرۋعا جىلدىق مولشەرلەمەسى 5 پايىزدىق جەڭىلدەتىلگەن كرەديت بەرۋ تەتىگى جۇمىس ىستەيدى.

- وسى باعىت بويىنشا 15,3 ميلليارد تەڭگە سوماسىنا 15 جوبا قارجىلاندىرىلدى. سونىمەن قاتار وندىرىستىك قۋاتتاردى ارتتىرۋ بويىنشا جۇمىس جۇرگىزىلىپ جاتىر. ماسەلەن، «Aitas KZ» ا ق جانە «الەل اگرو» ا ق بازاسىندا جالپى قۋاتى 123 ميلليون ينكۋباتسيالىق جۇمىرتقا بولاتىن رەپرودۋكتورلار قۇرۋ، سونداي-اق «Poultry Agro» ج ش س قۋاتى 100 ميلليون ءبىر كۇندىك بالاپان وندىرەتىن جۇمىرتقا باعىتىنداعى رەپرودۋكتور قۇرىلىسى جوسپارلانعان. اتالعان جوبالاردى ىسكە اسىرۋ قۇس فابريكالارىنىڭ وتاندىق اسىل تۇقىمدى ماتەريالمەن قامتاماسىز ەتىلۋىن ارتتىرۋعا جانە يمپورتقا تاۋەلدىلىكتى دايەكتى تۇردە تومەندەتۋ ءۇشىن جاعداي جاساۋعا مۇمكىندىك بەرەدى، - دەدى پرەمەر-مينيستر.

ايتا كەتەيىك، سوڭعى بەس جىلدا قۇس شارۋاشىلىعى سالاسىنداعى عىلىمي زەرتتەۋلەردى جۇرگىزۋگە شامامەن 540 ميلليون تەڭگە ءبولىندى.

سونداي-اق ەلىمىزگە 77 ميلليون دوللاردىڭ اسىل تۇقىمدى قۇس بالاپانى جەتكىزىلدى.