قۇرىق تەڭىز پورتىندا 7000 توننا جۇك تاسىمالدايتىن جاڭا كەمە سۋعا جىبەرىلدى
اقتاۋ. KAZINFORM - قۇرىق پورتى قۇرعاق جۇك تاسيتىن جاڭا كەمەمەن تولىقتى. بۇل تۋرالى ماڭعىستاۋ وبلىستىق اكىمدىگى ءمالىم ەتتى.
بۇگىن قۇرىق تەڭىز پورتىنداعى سارجا تەرمينالىنىڭ ايلاعىندا قۇرعاق جۇك تاسىمالداۋعا ارنالعان جاڭا كەمە سۋعا جىبەرىلدى. كەمەگە قازاقستاننىڭ ەڭبەك سىڭىرگەن مۇنايشىسى، اقتاۋ قالاسىنىڭ قۇرمەتتى ازاماتى ءناسىپقالي مارابايەۆتىڭ ەسىمى بەرىلدى. اتالعان سۋ كولىگىن جۇمىسىن جاڭا باستاعان قازاق-اراب بىرلەسكەن كەمە قاتىناسى كاسىپورىنى باسقارادى.
ءىس- شارا اياسىندا تەڭىز داستۇرىنە ساي كەمە تۇساۋكەسەرى ءراسىمى وتكىزىلدى.
ماڭعىستاۋ وبلىسىنىڭ اكىمى نۇرداۋلەت قيلىباي جينالعان جۇرتتى جاڭا كاسىپورىننىڭ اشىلۋىمەن قۇتتىقتادى.
- مەملەكەت باسشىسى قاسىم-جومارت توقايەۆ ەلىمىزدىڭ كولىك لوگيستيكاسىنىڭ ستراتەگيالىق ماڭىزىن اتاپ ءوتىپ، ونى دامىتۋ جونىندە ناقتى تاپسىرمالار بەرگەن بولاتىن. بۇگىنگى شارا - سول تاپسىرمالاردىڭ ىسكە اسىپ جاتقانىن دالەلدەيدى. ءناسىپقالي مارابايەۆ اعامىز ەل دامۋىنا ولشەۋسىز ۇلەس قوسقان تۇلعا. ول تەك مارابايەۆتاردىڭ عانا ەمەس، بۇكىل ماڭعىستاۋدىڭ اكەسى. ەڭبەگى مەن ونەگەلى ءومىرىن كەيىنگى ۇرپاققا ۇلگى ەتۋ - ءبىزدىڭ بورىشىمىز. بارشاڭىزدى وسى تاريحي ساتپەن قۇتتىقتايمىن! - دەدى نۇرداۋلەت قيلىباي.
زاماناۋي تەحنيكالارمەن جابدىقتالعان «Nasipkali Marabayev» كەمەسى قۇرعاق جانە جالپى جۇكتەردى تاسىمالداۋعا ارنالعان. جۇك كوتەرگىشتىگى - 7000 توننا، ۇزىندىعى - 136 م، ەنى - 16 م، بيىكتىگى - 7 م. ءارتۇرلى كليماتتىق جاعدايدا جۇمىس ىستەۋگە بەيىمدەلگەن كەمە اشىق تەڭىزدەر مەن وزەندەردە دە قاتىناي الادى. وندا 14 ادامنان تۇراتىن بىلىكتى قازاقستاندىق ەكيپاج قىزمەت ەتەدى.
شارا بارىسىندا ق ر كم تەمىرجول جانە سۋ كولىگى كوميتەتىنىڭ ءتوراعاسى جانىبەك تايجانوۆ ترانسكاسپي حالىقارالىق ءدالىزىن دامىتۋ جونىندەگى جوبالاردىڭ جالعاساتىنىن ايتتى.
سالتاناتتى شارا سوڭىندا بىرلەسكەن كەمە قاتىناسى كاسىپورىنىن اشقان قازاقستاندىق Semurg Invest جانە ب ا ءا- ءنىڭ Freeseas Container Shipping كومپانيالارى كاسپيي تەڭىزىندە جاڭا كەمەلەرگە ينۆەستيتسيا تارتۋ تۋرالى مەموراندۋمعا قول قويدى. كاسىپورىن 2027 -جىلعا دەيىن كەمە سانىن التىعا جەتكىزۋدى جوسپارلاپ وتىر.
ايتا كەتەيىك، قازىرگى تاڭدا وتاندىق Semurg Invest كومپانياسى قۇرىق ماڭىنداعى «سارجا» كوپفۋنكتسيونالدى تەڭىز تەرمينالىنىڭ قۇرىلىسىن جالعاستىرۋدا. جوبا اياسىندا التى تەڭىز تەرمينالىنىڭ سالىنۋى جوسپارلانعان. بۇل تەرمينالدار 2030 -جىلعا دەيىن ترانسكاسپي ءدالىزىنىڭ وتكىزۋ قابىلەتىن جىلىنا 5 ميلليون توننا قۇرعاق جانە 7 ميلليون توننادان استام سۇيىق جۇككە دەيىن ارتتىرۋعا مۇمكىندىك بەرەدى.
