قۇرىلىسقا رۇقسات بەرەتىن قۇجاتىن كورمەي، تۇرعىن ۇيگە قارجى سالماڭىز - مامان كەڭەسى

استانا. KAZINFORM - تۇرعىن ءۇي قۇرىلىسىنا قارجى سالعان كەزدە كومپانيانىڭ قۇرىلىسقا رۇقساتىنىڭ بار-جوعىنا كوز جەتكىزىپ بارىپ، قارجى سالۋ قاجەت. مۇنداي كەڭەستى استانا قالالىق زاڭ كونسۋلتانتتارى پالاتاسىنىڭ مۇشەسى ارداق ابەۋوۆا بەرىپ وتىر.

- قۇرىلىس كومپانياسىنا بارعان كەزدە ەڭ الدىمەن رۇقسات قاعازىن سۇراۋ قاجەت. ماسەلەن، مەن اقشامدى بەرگەننەن كەيىن سۇراۋعا، بىلۋگە قۇقىعىم بار. جارناماسىندا «وسىنداي ءۇي، پاتەر بولادى، 1 بولمە، 3 بولمە الاسىز» دەگەندەي دەرەكتەر كەلتىرەدى. وسى كەزدەگى ەڭ ماڭىزدى ماسەلە - قۇجاتتارعا ءمان بەرۋ. ەگەر قۇجاتتارىن كورەتپەسە، تۇرعىن ءۇي قۇرىلىسىنا قاراجات سالماڭىز. نەمەسە مەملەكەتتىك ساۋلەت-قۇرىلىس باقىلاۋ ورگانىنا بارىپ تا تەكسەرۋگە بولادى، - دەدى زاڭگەر.

«استانا قالاسىنىڭ قالالىق ورتا ساپاسى جانە باقىلاۋ باسقارماسى» م م باسشىسى عاني تاجيەۆتىڭ ايتۋىنشا، ەلوردادا سالىنىپ جاتقان تۇرعىن ۇيلەردىڭ قۇرىلىسىنا رۇقساتتىڭ بار-جوعى قالالىق مەملەكەتتىك ساۋلەت-قۇرىلىس باسقارماسىنىڭ رەسمي سايتىندا ورنالاستىرىلعان.

- قازىرگى كەزدە قالادا جالپى اۋماعى 8 ميلليون شارشى مەتردى قۇرايتىن 262 تۇرعىن ءۇي كەشەنى سالىنىپ جاتىر. ولاردىڭ رۇقساتى بارلارىن سايتقا ورنالاستىرىپ وتىرامىز. ادامدار كوبىنە جارناماعا سەنىپ قالادى. سونىمەن قاتار سەنىپ قالۋ سەبەبى قارجىعا دا بايلانىستى. تومەن باعامەن ساتادى. ارزان باعامەن ۇسىنىلعان تۇرعىن ءۇي كەشەنى بىردەن كۇمان تۋدىرادى. ارزان بولۋى مۇمكىن ەمەس. ويتكەنى، 1 شارشى مەترگە قانشا قاراجات كەتەتىنىن بىلەمىز. وسىعان وراي قولداناتىن شارامىز دا از، قولىمىز قىسقا. بارىپ ايىپپۇل سالامىز، ول ماردىمسىز. دەگەنمەن، پروكۋراتۋرامەن، پوليتسيا دەپارتامەنتىمەن جۇمىس ىستەپ جاتىرمىز، - دەدى ول.

باسقارما باسشىسى جالعان جارناما بەرگەن قۇرىلىس كومپانيالارىنا دا 300 ا ە ك (1107600 تەڭگە) مولشەرىندە ايىپپۇل سالىناتىندىعىن ايتادى.

اۆتور

مارلان جيەمباي