قۇرىلىس سالاسىنداعى بارلىق قىزمەت «ءبىر تەرەزە» قاعيداتى بويىنشا اتقارىلادى

استانا. KAZINFORM - بۇگىن ءماجىلىستىڭ جالپى وتىرىسىندا قۇرىلىس كودەكسىنىڭ جوباسىن ءبىرىنشى وقىلىمدا تالقىلاۋ كەزىندە قر ونەركاسىپ جانە قۇرىلىس ءمينيسترى ەرسايىن ناعاسپايەۆ قۇرىلىس سالاسىنداعى مەملەكەتتىك باقىلاۋعا تۇسىنىك بەردى.

- سوڭعى جىلدارى «Doing Business» كورسەتكىشىن جاقسارتۋعا باعىتتالعان شارالاردىڭ سالدارىنان ساۋلەت پەن قۇرىلىس سالالارىنداعى مەملەكەتتىك باقىلاۋ دەڭگەيى تومەندەدى. بۇگىندە قۇرىلىس نورمالارىن ساقتاۋ مىندەتى تىكەلەي سالا قاتىسۋشىلارىنىڭ وزدەرىنە جۇكتەلگەن. ناتيجەسىندە، قۇرىلىسقا تولىققاندى باقىلاۋ مەن قاداعالاۋ جۇرگىزىلمەيدى. وسىعان بايلانىستى، جاڭا قۇرىلىس كودەكسى اياسىندا باقىلاۋ مەن قاداعالاۋدى كۇشەيتۋگە باعىتتالعان جاڭا تاسىلدەر ازىرلەندى. مىسالى، بىلتىردان باستاپ «جەدەل ارەكەت ەتۋدىڭ» جاڭا تەتىگى ەنگىزىلدى. قاداعالاۋدىڭ جاڭا فارماتى زاڭ بۇزىلعان جاعدايدا، جەدەل شارا قولدانۋدى كوزدەيدى. قاجەت بولعان جاعدايدا قۇرىلىس جۇمىستارى توقتاتىلىپ، ليتسەنزيا مەن وزگە دە رۇقسات قۇجاتتارىن قايتارىپ الۋ مۇمكىندىگى قاراستىرىلعان. قۇرىلىس ساپاسىن قاتاڭ قاداعالاۋ ءۇشىن باقىلاۋ ورگاندارىنىڭ قاتىسۋىمەن قۇرىلىس بارىسى «جوسپارلى ينسپەكسيالاۋ» ارقىلى باسىنان باستاپ، پايدالانۋعا بەرىلگەنگە دەيىن تەكسەرىلەتىن بولدى، - دەدى ەرسايىن ناعاسپايەۆ.

ونىڭ ايتۋىنشا، ەندى پروفيلاكتيكالىق باقىلاۋ قاشىقتان، ياعني وبەكتىگە بارماي-اق جۇرگىزىلەتىن بولادى. بۇل ءۇشىن مەملەكەتتىك ورگانداردىڭ دەرەكتەرى مەن اقپاراتتىق جۇيەلەر پايدالانىلادى، قاجەت بولعان جاعدايدا دەرەۋ شارا قابىلدانادى. سونىمەن قاتار، اكىمدىكتەردىڭ جۇمىسىنا دا باقىلاۋ ارتىپ، زاڭ بۇزۋدى الدىن الۋ شارالارى كۇشەيتىلەدى.

- قۇرىلىس كودەكسى جوباسىندا نىساندى قابىلداۋ كەزىندە مەملەكەتتىك ساۋلەت-قۇرىلىس باقىلاۋ مەن توتەنشە جاعداي ورگاندارىنىڭ مىندەتتى تۇردە قاتىسۋى قاراستىرىلعان. ولار نىساننىڭ پايدالانۋعا دايىن ەكەندىگى تۋرالى قورىتىندى بەرەدى. جاڭا زاڭنامالىق وزگەرىستەر قۇرىلىس تسيكلىنىڭ باسىنان اياعىنا دەيىن مەملەكەتتىك باقىلاۋدى كۇشەيتۋدى كوزدەپ وتىر، - دەدى مينيستر.

اتاپ ايتقاندا، جىل باسىندا وتكەن ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ قۇرىلىس سالاسىنا باعىتتالعان ءبىرقاتار مىندەتتەردى ورىنداۋدى تاپسىردى. سول مىندەتتەردىڭ ءبىرى - جىل سوڭىنا دەيىن قۇرىلىس سالاسىنداعى بارلىق پروتسەستەردى تولىق سيفرلاندىرۋدى قامتاماسىز ەتەتىن ءبىرىڭعاي اقپاراتتىق جۇيە ازىرلەۋ. قازىرگى كەزدە سالادا بىرنەشە اقپاراتتىق جۇيە جۇمىس ىستەيدى. وسىعان بايلانىستى كودەكس جوباسىندا سالانى سيفرلاندىرۋعا ايرىقشا نازار اۋدارىلىپ، جەكە باعىت رەتىندە قاراستىرىلدى.

كودەكستە مەملەكەتتىك اقپاراتتىق مودەلدەر بانكى فۋنكتسيونالىن كەڭەيتۋ نەگىزىندە ءبىرىڭعاي قۇرىلىس پورتالىن قۇرۋ كوزدەلگەن، ياعني قۇرىلىس سالاسىنداعى بارلىق قىزمەتتەر «ءبىر تەرەزە» قاعيداتى بويىنشا كورسەتىلەتىن بولادى.

- پورتالدا بارلىق دەربەس جۇيەلەرگە سىلتەمەلەر بولادى، جانە جۇمىستى ىڭعايلى ەتۋ ءۇشىن EGOV جۇيەسى ارقىلى ءبىرىڭعاي اۆتوريزاتسيا ەنگىزىلەدى. سونىڭ ارقاسىندا قولدانۋشىلارعا دەرەكتەردى ءبىر رەت ەنگىزۋ جەتكىلىكتى، ءار جۇيەگە بولەك كىرۋدىڭ قاجەتى بولمايدى. دەربەس جۇيەلەر اراسىندا اقپارات الماسۋ ءۇشىن ءبىرىڭعاي يدەنتيفيكاتور، ياعني نىساننىڭ جەكە سايكەستەندىرۋ ءنومىرى قولدانىلادى. ول نىسانعا العاشقى رۇقسات بەرىلگەن ساتتە بەكىتىلەدى. وسىلايشا، پورتالدا قۇرىلىس نىسانىنىڭ بارلىق كەزەڭى قامتىلىپ، باستى نازار قۇرىلىس جۇمىستارىنىڭ اشىقتىعى مەن ساپاسىنا اۋدارىلادى. سونىمەن قاتار، پورتالدا سالا ماماندارىن تەستىلەۋ، سەرتيفيكاتتاۋ جانە ولاردىڭ رەەسترى اۆتوماتتى تۇردە جۇرگىزىلەدى، - دەدى ۆەدومستۆو باسشىسى.

بۇدان بۇرىن حابارلانعانداي، قۇرىلىس سالاسىنداعى جالعان كومپانيالاردى انىقتاۋدىڭ تەتىگى ىسكە قوسىلادى.