قۇرىلىس ءمينيسترى: تاسقىننان بۇلىنگەن قورا-قوپسىنى مەملەكەت قالپىنا كەلتىرمەيدى

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىنان كەيىن وتكەن بريفينگىدە تاسقىننان بۇلىنگەن قورا-قوپسى مەملەكەت ەسەبىنەن قالپىنا كەلتىرىلمەيتىنىن ايتتى.

«قازىرگى تاڭدا تاسقىننان زارداپ شەككەندەرگە 100 ا ە ك (369200 تەڭگە - رەد. ) وتەماقى بەردىك. ءبىراق اۋلا قۇرىلىستارىن، قورالاردى، باسقالاردى قايتا تۇرعىزبايمىز. سەبەبى، ءبىزدىڭ ەڭ باستى ماقسات - باسپانامەن قامتاماسىز ەتۋ»، - دەدى ول ب ا ق وكىلىنىڭ سۇراعىنا بەرگەن جاۋابىندا.

قانات شارلاپايەۆ بۇل شەشىمنىڭ سەبەبىن دە ءتۇسىندىرىپ كوردى.

«ۋاقىتشا قۇرىلىستاردى قايتا تۇرعىزۋدىڭ قاجەتى بار ما، جوق پا؟ ءبىزدىڭ پىكىرىمىز بويىنشا، ەڭ الدىمەن تەك باسپانامەن قامتاماسىز ەتەمىز. بۇل ەڭ باستى ماقسات. باسقالاردى قايتا تۇرعىزبايمىز. ونى ءتۇسىنۋ كەرەك. سەبەبى، كوپ ادامدار ءۇيسىز قالدى. ءبىزدىڭ از رەسۋرستاردى قوراعا، باسقا ماسەلەگە جۇمساۋعا بولمايدى، مەنىڭ ويىمشا»، - دەدى مينيستر.

اۆتور
ەسىمجان ناقتىباي