قۇرىلتايدا ە ق ى ۇ پارلامەنتتىك اسسامبلەياسىمەن ىنتىماقتاستىقتى دامىتۋ پەرسپەكتيۆالارى تالقىلاندى
استانا. KAZINFORM - قۇرىلتايعا ە ق ى ۇ پارلامەنتتىك اسسامبلەياسىنىڭ ۆيتسە-پرەزيدەنتى، اۋستريا پارلامەنتى ۇلتتىق كەڭەسىنىڭ دەپۋتاتى گۋدرۋن كۋگلەر كەلدى. كەزدەسۋ قۇرىلتايدىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى، جۋىردا ە ق ى ۇ پارلامەنتتىك اسسامبلەياسىنىڭ كليماتتىڭ وزگەرۋى ماسەلەلەرى جونىندەگى ارنايى وكىلى بولىپ تاعايىندالعان دەپۋتات دانا مەدەۋوۆانىڭ توراعالىعىمەن ءوتتى. بۇل تۋرالى «ادىلەت» پارتياسىنىڭ باسپا ءسوز قىزمەتى حابارلادى.
كەزدەسۋگە قاتىسۋشىلار پارلامەنتارالىق ىنتىماقتاستىقتى دامىتۋ، كليماتتىڭ وزگەرۋى مەن دەموگرافيالىق تۇراقتىلىق ماسەلەلەرىن، سونداي-اق ە ق ى ۇ پارلامەنتتىك اسسامبلەياسى اياسىندا بىرلەسكەن باستامالاردى جۇزەگە اسىرۋ پەرسپەكتيۆالارىن تالقىلادى.
- ءبىز ە ق ى ۇ پارلامەنتتىك اسسامبلەياسىمەن سىندارلى ديالوگتى دامىتۋعا نيەتتىمىز. ورتالىق ازيا ەلدەرى وكىلدەرىنىڭ اسسامبلەياداعى باسشىلىق لاۋازىمداردا بولۋى وڭىرلىك كۇن ءتارتىبىن، اسىرەسە كليماتتىڭ وزگەرۋى ماسەلەلەرىن ىلگەرىلەتۋگە ىقپال ەتەتىنىنە سەنىمدىمىز، - دەپ اتاپ ءوتتى دەپۋتات دانا مەدەۋوۆا.
كەزدەسۋدە كليماتتىق جانە دەموگرافيالىق وزگەرىستەردىڭ ءوزارا بايلانىسىنا، سۋ قاۋىپسىزدىگى ماسەلەلەرىنە جانە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ ب ۇ ۇ اياسىندا حالىقارالىق سۋ ۇيىمىن قۇرۋ جونىندەگى باستاماسىنا ەرەكشە نازار اۋدارىلدى. سونىمەن قاتار، تاراپتار ە ق ى ۇ پارلامەنتتىك اسسامبلەياسىنىڭ الداعى ءىس-شارالارىندا بىرلەسكەن باستامالاردى ىلگەرىلەتۋ پەرسپەكتيۆالارى بويىنشا پىكىر الماستى.
تالقىلاۋعا قۇرىلتاي دەپۋتاتتارى اسەل بادەنوۆا، ەۆگەني بولگەرت، شاحماردان بايمانوۆ، يۋليا كۋچينسكايا، ايدوس سارىم جانە نۇرگۇل تاۋ قاتىستى.
كەزدەسۋ قورىتىندىسى بويىنشا تاراپتار كليماتتىق جانە دەموگرافيالىق قاۋىپسىزدىك ماسەلەلەرى بويىنشا ءوزارا ءىس-قيمىلدى جالعاستىرۋعا كەلىستى.
