قۇرىلتاي دەپۋتاتى جاستاردىڭ مەملەكەتتىك شەشىمدەرگە ىقپال ەتۋ جولدارىن ءتۇسىندىردى
استانا. KAZINFORM - جاستار ەلدەگى ساياسي رەفورمالاردى سىرتتاي باقىلاپ قانا قويماي، زاڭنامالىق وزگەرىستەرگە قاتىستى ءوز ۇسىنىستارىن ءبىلدىرىپ، مەملەكەتتىك شەشىمدەر قابىلداۋ پروتسەسىنە بەلسەندى قاتىسۋى كەرەك.
بۇل تۋرالى قۇرىلتاي دەپۋتاتى اقەركە يسكاندەروۆا استانادا وتكەن «ۇلتتىق دامۋ كۇن تارتىبىندە - جاستار» اتتى ساراپشىلىق ديالوگ الاڭىندا ايتتى.
ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە وتكەن كەزدەسۋدە دەپۋتات جاستاردىڭ مەملەكەتتىك باسقارۋ ىسىنە ارالاسۋى، زاڭ شىعارۋ پروتسەسىنە قاتىسۋى جانە ءوز باستامالارىن جۇزەگە اسىرۋ مۇمكىندىكتەرىنە توقتالدى. ونىڭ ايتۋىنشا، جاستاردى مەملەكەتتىك باسقارۋ جۇيەسىنە تارتۋداعى باستى ماقسات - ولاردى بەلگىلى ءبىر قىزمەتكە تاعايىنداۋ ەمەس، ناقتى شەشىمدەر قابىلداۋعا ىقپال ەتۋىنە مۇمكىندىك بەرۋ.
وسى ورايدا دەپۋتات جاستاردىڭ زاڭ جوبالارىنا قاتىستى ۇسىنىستارى مەن قوعامدىق ماڭىزى بار باستامالارىن تىكەلەي حالىق قالاۋلىلارىنا جولداي الاتىنىن اتاپ ءوتتى.
- ەگەر دە ءبىر سالادا ۇسىنىس-پىكىرلەرىڭىز بولسا، قانداي دا ءبىر جوبالارىڭىز بولسا، ءبىر زاڭعا قاتىستى وزدەرىڭىزدىڭ پىكىرلەرىڭىز بولسا، ونى بىزگە جولداي الاسىز. بۇل جەردە دە تسيفرلاندىرۋدى اتاپ وتكەن ءجون. وتە جاقسى پورتال بار - e-Otinish. e-Otinish-تە قانداي دا ءبىر ءوتىنىش جاۋاپسىز قالمايدى. مىندەتتى تۇردە كىمگە جولدادىڭىزدار، سول ادامعا تۇسەدى، سول ءوتىنىش قارالادى جانە ءتيىستى جاۋابىن الاسىز، - دەدى ول.
اقەركە يسكاندەروۆا سيفرلاندىرۋدىڭ وڭىرلەردەگى جاستارعا دا جاڭا مۇمكىندىكتەر اشىپ وتىرعانىن اتاپ ءوتتى. ونىڭ سوزىنشە، بۇگىندە اۋىلدا نەمەسە اۋدان ورتالىعىندا تۇراتىن جاستاردىڭ ءوز جوبالارىن ۇسىنىپ، مەملەكەتتىك قولداۋ تەتىكتەرىن پايدالانۋى ءۇشىن ەلورداعا ارنايى كەلۋى مىندەتتى ەمەس.
- ماسەلەن، ءتۇرلى گرانتتىق باعدارلامالار مەن جاستارعا ارنالعان بايقاۋلارعا ەلەكتروندى فورماتتا قاتىسۋعا بولادى. بۇل شالعاي ەلدى مەكەندەردەگى جاستاردىڭ دا ءوز يدەيالارىن جۇزەگە اسىرۋىنا جول اشادى، - دەدى سپيكەر.
دەپۋتات پرەزيدەنت جولداۋىن تەك مەملەكەتتىك ورگاندارعا بەرىلگەن تاپسىرمالار جيىنتىعى رەتىندە قابىلداماۋ كەرەكتىگىن دە ەسكە سالدى. ونىڭ پىكىرىنشە، قۇجاتتا كورسەتىلگەن باسىمدىقتار ءار ازاماتقا، سونىڭ ىشىندە جاستارعا ءوز سالاسىنداعى مۇمكىندىكتەردى باعامداۋعا باعىت بەرەدى.
سونىمەن قاتار ول جاستاردى ەلدەگى ساياسي وزگەرىستەرگە سانالى تۇردە قاتىسۋعا، ۇسىنىلعان باستامالاردى جان-جاقتى زەردەلەپ، وزىندىك پىكىر قالىپتاستىرۋعا شاقىردى.
- ول جەردە ەندى ءبىر پوپۋليستىك، تەك قانا الەۋمەتتىك جەلىدە سىزدەرگە ۇسىنىلعان اقپاراتتى ەمەس، وزدەرىڭىز ناقتى ماتىندىك فورماتتا نەمەسە تولىق نۇسقاسىن تىڭداپ، ءارى قاراي سارالاپ، وزدەرىڭىز اناليز جاساۋلارىڭىز كەرەك. سەبەبى بۇل جەردە وزدەرىڭىزدىڭ كريتيكالىق ويىڭىز قوسىلۋ كەرەك، - دەدى اقەركە يسكاندەروۆا.
قۇرىلتاي دەپۋتاتى جاستاردىڭ ەل بولاشاعىنا جاۋاپكەرشىلىگى بۇگىننەن باستالاتىنىن دا جەتكىزدى.
- بۇرىن دا ايتىلاتىن: «جاستار - ەلدىڭ بولاشاعى، سىزدەردىڭ ۋاقىتتارىڭىز كەلەدى» دەپ. مەنىڭ ايتقىم كەلەتىنى، جاستاردىڭ ۋاقىتى - قازىرگى ءسات. ءبىزدىڭ بۇگىنگى قادامدارىمىزدان ەرتەڭىمىز جاساقتالادى، - دەپ تۇيىندەدى ول.
ايتا كەتەيىك، قازاقستانداعى جاستار سانى 6 ميلليونعا جۋىقتادى. ولاردىڭ باسپانا الۋىنا، جۇمىسقا ورنالاسۋىنا، كاسىپ باستاۋىنا جانە جاڭا جوبالارىن جۇزەگە اسىرۋىنا باعىتتالعان ءتۇرلى مەملەكەتتىك باعدارلامالار جۇمىس ىستەپ جاتىر.
