قۇرىلتاي جانىنان ماسليحاتتارمەن ءوزارا ءىس-قيمىل جونىندەگى كەڭەس قۇرىلادى

- جەرگىلىكتى وكىلدى ورگاندار رەتىندە ءماسليحاتتار حالىقپەن تىكەلەي جۇمىس ىستەيدى، وڭىرلەردىڭ وزىندىك ەرەكشەلىكتەرىن بىلەدى جانە ءبىز قابىلداعان زاڭنامالىق شەشىمدەردىڭ ءىس جۇزىندە قالاي جۇزەگە اسىرىلاتىنىمەن بەتپە-بەت كەلەدى. قازاقستان رەسپۋبليكاسى قۇرىلتايىنىڭ جانىنداعى ماسليحاتتارمەن ءوزارا ءىس-قيمىل جاساۋ جونىندەگى كەڭەستى ناقتى وسىنداي تۇراقتى ءوزارا ءىس-قيمىل جاساۋ تەتىگى رەتىندە قۇرىلادى، - دەدى قاۋلىنى تانىستىرعان قۇرىلتاي دەپۋتاتى امىربەك وسپانبەكوۆ.

ونىڭ سوزىنشە، باستامانىڭ نەگىزگى ماقساتى - قازاقستان حالىق كەڭەسىنىڭ العاشقى وتىرىسىندا پرەزيدەنت ايتقان وڭىرلەر مەن ورتالىق مەملەكەتتىك ورگاندار اراسىندا تىكەلەي بايلانىستى قامتاماسىز ەتۋ جونىندەگى تاپسىرمانى ىسكە اسىرۋ.

كەڭەس ءماسليحاتتاردىڭ زاڭداردى ازىرلەۋگە تۇراقتى قاتىسۋىن جانە قابىلدانعان زاڭداردىڭ جەرگىلىكتى جەرلەردە ءىس جۇزىندە قولدانىلۋى بويىنشا كەرى بايلانىس الۋدى جولعا قويادى. سونداي-اق جۇيەلى شەشىمدەر ازىرلەۋ ءۇشىن وڭىرلەردەگى پروبلەمالاردى انىقتاپ، جيناقتاپ وتىرادى. كەڭەستىڭ مىندەتىنە وڭىرلەردەگى تابىستى تاجىريبەنى زەردەلەۋ مەن ونى تاراتۋعا ىقپال ەتۋ دە كىرەدى.

كەڭەس قۇرامىنا ءماسليحاتتاردا جۇمىس ىستەۋ نەمەسە ولارمەن ءوزارا ءىس-قيمىل جاساۋ تاجىريبەسى بار قۇرىلتايدىڭ تۇراقتى كوميتەتتەرىنىڭ دەپۋتاتتارى، ساياسي پارتيالار مەن مەملەكەتتىك ورگانداردىڭ وكىلدەرى، سونداي-اق استانا قالاسىنىڭ، وبلىستار مەن رەسپۋبليكالىق ماڭىزى بار قالالاردىڭ ءماسليحات ءتوراعالارى كىرەدى.

وڭىرلەرمەن تۇراقتى بايلانىس ورناتۋ ءۇشىن قۇرىلتايدىڭ ءتورت دەپۋتاتىنان تۇراتىن حاتشىلىق قۇرىلادى. ولاردىڭ ءارقايسىسىنا بەس وڭىردەن بەكىتىلەدى.

قاجەت بولعان جاعدايدا جەكەلەگەن ماسەلەلەردى قاراۋ ءۇشىن تاقىرىپتىق جۇمىس توپتارى قۇرىلۋى مۇمكىن. ولاردىڭ جۇمىسىنا قۇرىلتاي مەن ءماسليحات دەپۋتاتتارى، ساراپشىلار، ازاماتتىق قوعام، مەملەكەتتىك ورگاندار مەن ۇيىمداردىڭ وكىلدەرى تارتىلادى.

ايتا كەتەيىك، بۇعان دەيىن قۇرىلتاي مەملەكەتتىك ناگرادالار تۋرالى زاڭ جوباسىن ماقۇلداعانىن جازعانبىز.