قۇربان ايت: ەلىمىزدە 17-ماۋسىم - جۇمىس كۇنى

استانا. KAZINFORM - بۇگىن قازاقستان مۇسىلماندارى ءدىني باسقارماسى قۇربان ايت مەيرامىنا قاتىستى تۇسىنىك بەردى.

Құрбан айт
Фото: Kazinform

«بۇگىن ھيجري جىل ساناۋى بويىنشا زۋل- حيججا ايى باستالدى. ياعني اراپا كۇنى بيىل 15-ماۋسىمعا سايكەس كەلەدى. 16-ماۋسىم - قۇربان ايت مەرەكەسىنىڭ ءبىرىنشى كۇنى»، - دەلىنگەن حابارلامادا.

ءدىني باسقارمانىڭ اقپاراتىنا سۇيەنسەك، يسلام دىنىندە قاسيەتتى كۇندەر، تۇندەر جانە ايلار قاماري جىل ساناۋى نەگىزىندە انىقتالادى. مۇنداي جىل ساناق اي فازاسىنىڭ وزگەرۋىنە قاراي ەسەپتەلەدى. جاڭا ايدىڭ (ھيلالدىڭ) كورىنۋىمەن جاڭا اي باستالادى. قاماري اي كەيدە 29 نە 30 كۇن بولادى. زۋل-حيججا ايىن انىقتاۋ ءۇشىن زۋل- قاعدا ايىنىڭ 29 ندا ايدى باقىلايدى. كۇن باتقان كەزدە جاڭا اي كورىنسە، كەلەسى كۇنى زۋل- حيججا ايى باستالادى. ەگەر اۋا بۇلتتى بولىپ، اي كورىنبەسە، زۋل- قاعدا ايىن 30 كۇنگە تولىقتىرادى.

«2024 -جىلى 6-ماۋسىمدا جاڭا ايدىڭ كورىنۋىنە بايلانىستى بيىل زۇلحيججا ايى 7 -ماۋسىمدا باستالىپ، اراپا 15-ماۋسىمعا، ال قۇربان ايت 16-ماۋسىمعا ساي كەلەدى»، - دەيدى باسقارمادان.

وسى ورايدا ەڭبەك جانە حالىقتى الەۋمەتتىك قورعاۋ مينيسترلىگى تۇسىنىكتەمە بەردى.

«قۇربان ايتتىڭ ءبىرىنشى كۇنى مۇسىلمان كۇنتىزبەسى بويىنشا اتاپ وتىلەدى. قازاقستان مۇسىلماندارى ءدىني باسقارماسى 16-ماۋسىم (جەكسەنبى) دەپ جاريالادى، ياعني بۇل -دەمالىس كۇنى. سوندىقتان قۇربان ايت مەرەكەسى باسقا كۇنگە اۋىستىرىلمايدى»، - دەيدى مينيسترلىكتەن.

سوڭعى جاڭالىقتار