قۇران كىتابىن قولمەن جازىپ شىققان كالليگراف شىمكەنتتەگى ەڭ ۇلكەن مەشىتتىڭ اشىلۋ سالتاناتىنا قاتىستى
شىمكەنت. KAZINFORM - شىمكەنتتە اق مارمارمەن كومكەرىلگەن ۇلكەن مەشىت پايدالانۋعا بەرىلىپ، العاش رەت جۇما نامازى وقىلدى. ونىڭ اشىلۋ سالتاناتىنا قۇران كىتابىن 3 جىل بويى قولمەن جازىپ شىققان شەيح وسمان ءتوھا ارنايى كەلدى.
ۇلكەن مەشىت «ءنۇرسات» شاعىناۋدانىنداعى اكىمشىلىك-ىسكەرلىك ورتالىعىندا ورنالاسقان. مۇسىلمان جۇرتشىلىعى قۇلشىلىق جاساپ، دۇعا ەتەتىن ورىنعا سەيىتجان قاري ەسجان ۇلىنىڭ ەسىمى بەرىلدى.
مەشىتتىڭ اشىلۋ سالتاناتىنا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى، شىمكەنت اكىمى عابيت سىزدىقبەكوۆ، ءدىن عالىمدارى مەن مەملەكەت جانە قوعام قايراتكەرلەرى، قالا تۇرعىندارى قاتىستى.
قالا اكىمى كوپشىلىككە مەملەكەت باسشىسىنىڭ قۇتتىقتاۋىن جەتكىزىپ، قاسيەتتى قۇراندى قولىمەن جازعان شەيح وسمان توھاگە سىي-سىياپات جاسادى.
ءىس-شارا سوڭىندا باس ءمۇفتي جاماعاتقا ۋاعىز ايتىپ، جۇما نامازىن وتكىزدى.
ەلىمىزگە بەلگىلى ۇستاز، يسلامتانۋشى، قۇراننان بەس قىراعات يەسى، حافيز ەرسىن امىرە اتالعان مەشىتتىڭ باس يمامى بولىپ بەكىتىلدى.
رۋحاني ورتالىق الاڭىنىڭ جالپى اۋماعى - 12 گەكتار. عيمارات الاڭى - 47 مىڭ م². نىساننىڭ سەيسموتوزىمدىلىگى - 7-9 بال. ال مۇنارا بيىكتىگى 63 مەترگە جەتەدى. مەشىتتىڭ باس كۇمبەزىنىڭ بيىكتىگى - 56 مەتر، ديامەترى - 45 مەتر.
مەشىت عيماراتىندا ءبىر مەزەتتە 12 مىڭعا جۋىق ءمىناجات ەتۋشى قۇلشىلىق جاساۋعا مۇمكىندىك بار.
ال كىرەبەرىس الاڭدا بىردەن 10 مىڭعا جۋىق كەلۋشى جينالا الادى.
ەرەكشە اتاپ وتەرلىگى، مۇندا قولايسىز اۋا رايىنان قورعانۋ ءۇشىن اۆتوماتتى تۇردە اشىلاتىن قولشاتىرلار جۇيەسى دە قاراستىرىلعان. مەشىت ۇلتتىق ناقىشپەن ۇيلەستىرىلە وتىرىپ كلاسسيكالىق يسلام ستيلىندە بەزەندىرىلگەن.
مەشىتتە ەرلەر مەن ايەلدەرگە ارنالعا ءمىناجات ەتۋ ورنى بار. سونىمەن قاتار 600 ورىنعا ارنالعان اس بەرۋ زالى ورنالاسقان. 1100 ادامعا ارنالعان كونفەرەنتس-زالى، 100 ورىنعا ارنالعان نەكە قيۋ زالى، 428 ورىنعا ارنالعان كىشى دارەت الۋ ورنى بار.
مەشىت كەشەنىندە يسلام تاريحىنىڭ مۇراجايى، ايەلدەرگە ارنالعان وقۋ ورنى، مەدرەسە، كىتاپ وقيتىن زالى بار كىتاپحانالار ورنالاسقان. سونىمەن قاتار اكىمشىلىك بولمەلەر، تەلەورتالىق، فيتنەس ورتالىق پەن اسحانا دا قاراستىرىلعان. 736 ورىنعا ارنالعان جەراستى پاركينگى دە جۇمىس ىستەپ تۇر. مەشىت اينالاسىندا جاسىل باقتار مەن ساياباق اللەياسى ورنالاسقان. كوگالداندىرۋدىڭ جالپى اۋماعى - 4 گەكتار.
مەشىت قۇرىلىسىنىڭ يدەياسىن ۇسىنۋشى - «ساۋتس-ويل» كومپانياسىنىڭ باسشىسى سەرىكجان سەيىتجان ۇلى.
سەيىتجان قاري ەسجان ۇلى اتىنداعى ۇلكەن مەشىتكە سەرىكجان سەيىتجان ۇلىنىڭ اكەسىنىڭ اتى بەرىلگەن.
ايتا كەتەيىك، سەيتجانوۆتار اۋلەتى Forbes.kz تىزىمىنە ەنگەن ەڭ باي 75 قازاقستاندىقتىڭ ىشىندە 20-ورىندا.
