ەلىمىزدە قوعامدىق ورىندارعا QR كودپەن كىرگىزۋ پيلوتتى جوباسى باستالدى
ەندى وسى ورىندارعا بارۋ ءۇشىن ارنايى QR- كودتى سكانەرلەپ، كىرەبەرىستە كورسەتۋ قاجەت. باعدارلاما ءوز كەزەگىندە قىزىل، سارى، كوك جانە جاسىل ءتۇسىن كورسەتەدى. قىزىلى قوزعالىستى شەكتەۋدى، امبۋلاتوريالىق باقىلاۋداعى ادامدار ءۇشىن ۇيدە وقشاۋلاۋدىڭ قاتاڭ رەجيمىن ساقتاۋدى بىلدىرەدى. سارى - قوزعالىستى ءىشىنارا شەكتەۋ، ياعني ۇيىنەن 500 مەتردەن اسپايتىن ازىق- تۇلىك جانە شارۋاشىلىق دۇكەندەرگە، ءدارىحانالارعا بارۋعا رۇقسات ەتىلەدى. كوك – پ ت ر- تەست سۇرالمايتىن جەرلەرگە شەكتەۋ جوق دەگەن بەلگى. جاسىل - قوزعالىستا ەشقانداي شەكتەۋلەر جوق ەكەنىن ۇقتىرادى.
پ ت ر- تەست تاپسىرعان بولساڭىز، ارنايى بازادا مالىمەتىڭىز تۇرادى. سول جەردە تەست ناتيجەسى ءتۇستىڭ ءبىرىن كورسەتەدى. «اشىق» قوسىمشاسىن تەلەفونعا جۇكتەپ الۋعا بولادى. دەگەنمەن، قازىر باعدارلاما جۇمىس ىستەپ تۇرعان جوق.
اسەت تۇرىسوۆ، ق ر تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە- ءمينيسترى:
- قازىر بۇل ەرىكتى جوبا. قالاعان ادام تەست ناتيجەسىن كورسەتەدى، باعدارلامانى جۇكتەيدى. ادامدارعا ەشكىم مىندەتتەي المايدى. ازىرگە پيلوتتى جوبا رەتىندە قولعا الدىق. كەيىن ناتيجەسىنە قاراي شەشىم قابىلدانادى.