قۇقىق قورعاۋ ورگاندارى قىزمەتكەرلەرىن فوتو، ۆيدەوعا تۇسىرۋگە تىيىم سالىنۋى مۇمكىن
استانا. KAZINFORM - قىرعىزستان جوگوركۋ كەنەشىنىڭ قۇقىق ءتارتىبى، قىلمىسقا قارسى كۇرەس جانە سىبايلاس جەمقورلىققا قارسى ءىس-قيمىل كوميتەتى ءبىرىنشى وقىلىمدا قۇقىق قورعاۋ ورگاندارى قىزمەتكەرلەرىن فوتو، ۆيدەوعا ءتۇسىرىپ، كەيىن ينتەرنەتتە تاراتۋعا تىيىم سالاتىن كەيبىر زاڭنامالىق اكتىلەرگە ەنگىزىلگەن تۇزەتۋلەردى ماقۇلدادى.
زاڭ جوباسى بيلىك وكىلىنە نەمەسە قوعامدىق ءتارتىپتى قورعاۋ جونىندەگى مىندەتتەردى اتقاراتىن نەمەسە قوعامدىق ءتارتىپتى بۇزۋدىڭ جولىن كەسەتىن وزگە ادامعا قارسىلىق كورسەتۋگە بايلانىستى بۇزاقىلىق بويىنشا سانكتسيالاردى قۇقىقتىق قورعاۋعا جانە كۇشەيتۋگە باعىتتالعان.
قوعامدا ىشكى ىستەر ورگاندارى مەن باسقا دا قۇقىق قورعاۋ ورگاندارىنىڭ قىزمەتكەرلەرىنە باعىنباۋ، قورلاۋ جانە قارسىلىق كورسەتۋ فاكتىلەرى، سونداي-اق قىزمەتتىك مىندەتتەرىن اتقارۋ كەزىندە ولاردىڭ جۇمىسىنا زاڭسىز ارالاسۋ، فوتو جانە ۆيدەو ءتۇسىرىلىم ارقىلى بەدەلىن ءتۇسىرۋ ماقساتىندا ولاردى الەۋمەتتىك جەلىلەردە تاراتۋ جيىلەپ كەتكەنى اتالىپ ءوتتى.
زاڭ جوباسىنا سايكەس، قۇقىق قورعاۋ ورگانى قىزمەتكەرىنىڭ زاڭدى تالابىنا، سونداي-اق قوعامدىق ءتارتىپتى ساقتاۋ جانە قوعامدىق قاۋىپسىزدىكتى قامتاماسىز ەتۋ جونىندەگى مىندەتتەردى اتقاراتىن وزگە ادامعا باعىنباۋ، سول سياقتى ءوزىنىڭ قىزمەتتىك مىندەتتەرىن ورىندايتىن قىزمەتكەرلەردىڭ قىزمەتىنە قۇقىققا قايشى ارالاسۋ، قۇقىق قورعاۋ ورگاندارى قىزمەتكەرلەرىنىڭ جۇمىسىن بەدەلىن ءتۇسىرۋ ماقساتىندا كەيىن ينتەرنەتتە تاراتا وتىرىپ، فوتو جانە ۆيدەوعا تۇسىرگەن جەكە تۇلعالارعا 50 ەسەپتىك كورسەتكىش (5000 سوم) مولشەرىندە ايىپپۇل سالۋ نەمەسە بەس تاۋلىكتەن جەتى تاۋلىككە دەيىن قاماۋعا الۋ جازاسى قاراستىرىلادى.
بۇعان دەيىن قىرعىزستاندا بىلىكتىلىگى جوق پسيحولوگتاردىڭ جارناماسىنا تىيىم سالىناتىنى حابارلانعان بولاتىن. سونداي-اق، ەلەكتر سكۋتەرلەرىن، ۆەلوسيپەدتەر، گيروسكۋتەرلەردى جانە باسقا دا جەكە كولىك قۇرالدارىن پايدالانۋ ماسەلەسىن رەتتەۋ ۇسىنىلدى.
اۆتور
ەركەجان سماعۇلوۆا
