قۇنى - 50 ميلليارد تەڭگە: قوستاناي وبلىسىندا ءبيدايدى تەرەڭ وڭدەيتىن زاۋىت سالىنادى

قوستاناي. KAZINFORM - قوستاناي وبلىسىندا ءبيدايدى تەرەڭ وڭدەيتىن زاۋىت سالۋ جوباسىن KazFoodProducts جۇزەگە اسىرىپ جاتىر. بۇل تۋرالى اۋىل شارۋاشىلىعى مينيسترلىگى حابارلادى.

قازاقستان-قىتاي ىسكەرلىك كەڭەسى اياسىندا «Baiterek Venture Fund» ا ق، Myande Group Co.،Ltd قىتايلىق كومپانياسى، KazFoodProducts اگروحولدينگى جانە قوستاناي وبلىسىنىڭ اكىمدىگى اراسىنداعى ينۆەستيتسيالىق جوبانى ىسكە اسىرۋ جونىندەگى ىنتىماقتاستىق تۋرالى مەموراندۋمعا قول قويىلدى. جوبانىڭ قۇنى 50 ميلليارد تەڭگەدەن اسادى.

KazFoodProducts باس ديرەكتورى ءاليحان قايراتبەكتىڭ ايتۋىنشا، جاڭا Qostanay Grain Industry زاۋىتىنىڭ قۋاتتىلىعى جىلىنا 400 مىڭ توننا ءبيداي وڭدەيدى دەپ جوسپارلانعان. مۇندا امينقىشقىلدار، بيوەتانول، گليۋتەن، مال ازىعى، ءبيداي كەبەك وندىرىلەتىن بولادى. «Qostanai Grain Industry» ج ش س جوباسىن ىسكە قوسۋ مەرزىمى - 2027-جىلعى جەلتوقسان. جاڭا وندىرىستە 600 جاڭا جۇمىس ورنى اشىلادى.

سونىمەن قاتار مەموراندۋم اياسىندا الماتى وبلىسىندا ءبيداي مەن جۇگەرىنى تەرەڭ وڭدەۋ سالاسىندا كوشباسشى «ازيااگروفۋد» زاۋىتىنىڭ وندىرىستىك قۋاتىن تاۋلىگىنە 200 توننادان 300 تونناعا دەيىن ارتتىرۋ جوباسى قاراستىرىلعان.

اتالعان جوبالار ازىق-تۇلىك قاۋىپسىزدىگى مەن ەكسپورتتىق الەۋەتتى ارتتىرۋعا، سونداي-اق اگروونەركاسىپتىك كەشەندى دامىتۋعا وڭ اسەرىن تيگىزەدى دەپ جوسپارلانعان.