قۇمار ويىندى جارنامالاۋعا تىيىم سالىنادى - زاڭ جوباسى
استانا. KAZINFORM - بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى.
«قۇمار ويىننىڭ بىلايشا ەتەك الىپ كەتۋىنە ونىڭ ەشبىر تەجەۋسىز جارنامالانۋى دا اسەر ەتىپ وتىر. بۋكمەكەرلىك كەڭسەلەر جارناماعا قوماقتى قاراجات جۇمساپ جاتىر. تەلەارنالار، رەسمي ينتەرنەت سايتتار، Youtube ارنالارى، tik-tok, Instagram, Telegram سياقتى الەۋمەتتىك جەلىلەردە بۋكمەكەرلىك كەڭسەلەردىڭ جارناماسى تولىپ ءجۇر. سونىمەن قاتار، كەيبىر قوعامدىق پىكىر كوشباسشىلارى، بەلگىلى بلوگەرلەر، مەديا جۇلدىزدار دا وسى زياندى قۇبىلىستى جارنامالاپ جۇرگەنىن بىلەمىز. ۇسىنىلىپ وتىرعان زاڭدا قۇمار ويىندى جارنامالاۋعا دا تىيىم قاراستىرىلعان. ەندى وسى زاڭ جوباسىن تاعى دا جان-جاقتى پىسىقتاپ، تەز ارادا قابىلداۋىمىز كەرەك» - دەدى ءماجىلىس دەپۋتاتى ەلنۇر بەيسەنبايەۆ.
ونىڭ ايتۋىنشا، زاڭ جوباسىندا ماكسيمالدى تۇردە بۋكمەكەرلىك كەڭسەلەر مەن كازينولاردىڭ جارناماسىن شەكتەۋ ەسكەرىلگەن. وندا ۇيلەردىڭ قاسبەتتەرىندە، فاسادتارىندا، عيماراتتاردا، قۇرىلىستاردىڭ قورشاۋلارىندا، كولىك قۇرالدارىندا سىرتقى جارناماعا تىيىم سالىنادى. ينتەرنەت رەسۋرستارىندا، رەسمي سايتتاردا، تەلەارنالار مەن راديودا، مەرزىمدى باسپا باسىلىمدارىندا، كينودا جارناماعا تولىق تىيىم سالىنادى.
«ويناۋ جاسىنا كەلمەگەن ازاماتتاردىڭ قۇمار ويىندارىنا جانە ءباس تىگۋگە قاتىسۋى شەكتەلەدى. ولارعا زاڭسىز ويىن ويناۋعا مۇمكىندىك بەرگەن زاڭدى تۇلعالارعا قوماقتى كولەمدە ايىپپۇل سالىنادى. بۇدان بولەك، ونلاين كازينو ۇيىمداستىرۋشىلارعا قىلمىستىق كودەكستىڭ 307-بابى بويىنشا جازا قولدانىلادى»، - دەدى دەپۋتات.
قۇجات اياسىندا زاڭسىز لوتوماتيكتەرگە مۇلدەم تىيىم سالىنادى. ويىندا ءباس تىگۋ جاسى 21 جاستان 25 جاسقا دەيىن كوتەرىلەدى.
سونىمەن قاتار، بالالار، ءبىلىم بەرۋ، مەديتسينالىق، ءدىني جانە ءدىني ۇيىمدار ورنالاسقان تۇرعىن ۇيلەر مەن عيماراتتاردا لوتەرەيا بيلەتتەرىن تاراتۋعا جانە لوتەرەيا تەرمينالدارىن ورناتۋعا تىيىم سالىنادى.
«سوت اكتىسى نەگىزىندە قىزمەتى زاڭسىز دەپ تانىلعان شەتەلدىك ويىن بيزنەسىن ۇيىمداستىرۋشىلاردىڭ ءتىزىمى جۇرگىزىلىپ، سونداي-اق بانكتەر مەن تولەم جۇيەلەرىنە ولاردىڭ پايداسىنا قارجىلىق وپەراتسيالار جۇرگىزۋگە تىيىم سالىنادى. مۇنىمەن قوسا، بۋكمەكەرلىك كەڭسەنىڭ نەمەسە توتاليزاتوردىڭ قىزمەتىن جۇزەگە اسىراتىن ويىن بيزنەسىن ۇيىمداستىرۋشىلاردىڭ ءوز اپپاراتتىق-باعدارلامالىق كەشەندەرىنىڭ مەملەكەتتىك كىرىستەر ورگانىنىڭ اقپاراتتىق جۇيەلەرىمەن ينتەگراتسيالانۋىن قامتاماسىز ەتۋ مىندەتى بەلگىلەنەدى»، - دەدى دەپۋتات.
