قۇلپىناي مەن شيە - ءدامى ءتاتتى، باعاسى «اشى»-قاي وڭىردە قانشا تۇرادى
استانا. KAZINFORM - مامىر باستالعالى ساۋدا سورەلەرىندە قۇلپىناي مەن شيە كوپتەپ ساتىلادى باستادى. ەگەر قۇلپىنايدى قىستا دا ساتىپ الۋ مۇمكىن بولسا، ال شيە ەندى عانا ساتىلىمعا شىعا باستادى. ەل اۋماعىندا ەكى جەمىستىڭ باعاسىن سالىستىرا وتىرىپ، شولۋ جاساعان ەدىك.
ەلىمىزدە ساتىلىپ جاتقان قۇلپىنايدىڭ دەنى - يمپورتتالعان، ياعني تۇركيا، ازەربايجان جانە قىرعىزستان ەلىنەن كەلىپ جاتىر. دەگەنمەن، وتاندىق قۇلپىنايدىڭ ساتىلىمعا شىعۋى باعانىڭ ارزانداۋىنا اكەلۋى مۇمكىن دەپ وتىرمىز. ازىرگە، ارزان ءارى ءدامدى قۇلپىنايدى تالدىقورعاننان تابۋعا بولادى، وڭىردە كەلىسى 500-850 تەڭگەدەن ساتىلىپ جاتىر. الماتى، شىمكەنت، قىزىلوردا، قونايەۆ، تۇركىستان جانە تارازدا قۇلپىناي قىمباتىراق، مۇندا ەڭ تومەنگى باعا - 700-900 تەڭگە. ال پاۆلودار، قاراعاندى، سەمەي، كوكشەتاۋ، جەزقازعان جانە وسكەمەندە اتالعان جەمىستىڭ باعاسى الدەقايدا جوعارى، كەلىسى كەم دەگەندە 1600-2000 تەڭگەدەن باستالادى. سونداي- اق، قوستاناي، پەتروپاۆل، ورال، اتىراۋ، اقتوبە جانە استانادا ءبىر كەلى قۇلپىناي 2 مىڭ تەڭگەگە دەيىن بارادى، اقتاۋدا ودان دا قىمبات كەلىسى 3000 تەڭگە.
قۇلپىنايدىڭ قىمباتتاۋى كورشى رەسەيدە دە بايقالادى، ەلدەگى ۇسكىرىك ايازدان كەيىن باعا %20 عا كوتەرىلىپ كەتتى. ءبىر كەلى قۇلپىنايدىڭ ورتاشا باعاسى شامامەن 3 مىڭ تەڭگەنى قۇرايدى. اۋا رايىنا بايلانىستى اتالعان جەمىس ءالى دە قىمباتتاۋى مۇمكىن دەپ كۇتىلىپ وتىر.
شيە - بيىل ەلىمىزدىڭ سولتۇستىك ايماقتارىنا ادەتتەگىدەن كەش جەتكىزىلدى ءارى ونىڭ كەلىسى 3000 تەڭگەدەن ساتىلىپ جاتىر. مىسالى، پەتروپاۆلدا ۇساق شيەلەردى 1900 تەڭگەگە ساتىپ الۋعا بولادى. 30-مامىرداعى مالىمەتتەر بويىنشا، تالدىقورعان، الماتى، شىمكەنت، تاراز، سەمەي جانە تۇركىستاندا ەڭ ارزان شيەنىڭ كەلىسى 1200 تەڭگەدەن 1900 تەڭگە ارالىعىندا ساتىلىپ جاتىر.
قىزىلوردا، پاۆلودار، قاراعاندى، وسكەمەن، قونايەۆ، كوكشەتاۋ جانە استانادا كەلىسى 2000 تەڭگەدەن 2500 تەڭگەگە دەيىن بارادى. اقتوبە، اتىراۋ، جەزقازعان جانە قوستانايدا باعا جوعارى، ءبىر كەلى شيە 2500-2900 تەڭگە تۇرادى. ال ورال، اقتاۋ تۇرعىندارى اتالعان جەمىستىڭ كەلىسىن 3000 تەڭگەدەن جانە ودان دا قىمبات باعاعا ساتىپ الىپ جاتىر.
قىزىقتى مالىمەت، الەمدەگى ەڭ قىمبات قۇلپىنايدىڭ ءبىر ءتۇيىرى 350-450 دوللار تۇرادى. بيدزين- حيمە (سۇلۋ حانشايىم) جيدەك سۇرىپىن جاپوندىق فەرمەر ميكيو وكۋدا شىعارعان، وعان 15 جىلىن جۇمساپتى. اتالعان قۇلپىناي سورتى تاتتىلىگى ءارى كولەمىمەن ەرەكشەلەنەدى. ونىڭ ءبىر ءتۇيىرى تاۋىقتىڭ ۇلكەن جۇمىرتقاسى كولەمىنە جەتەدى، سالماعى شامامەن 100 گرامم. فەرمەر جىلىنا 500 ءتۇيىر قۇلپىناي وندىرەدى جانە تەك قىستا وسىرەدى، سوندىقتان دا باعاسى قىمبات.
ەڭ قىمبات شيە جاپونيادا دا كەزدەسەدى. وتكەن جىلى حونسيۋ ارالىنداعى حاتينوحە قالاسىندا وتكەن اۋكتسيوندا ىشىندە 15 ءتۇيىر بار شيەنىڭ قورابى 500 مىڭ يەنگە ساتىلعان. «اوموري حارتبيت» سۇرىپى اتتى شيە كولەمى جانە جۇرەك ءتاندى پىشىنىمەن ەرەكشەلەنەدى.
