قۇلسارىنىڭ تۇرعىندارى سۋ بوگەتىنىڭ قورشاۋىن كۇشەيتىپ جاتىر
اتىراۋ. KAZINFORM - سۋ تاسقىنىنان كەيىنگى العاشقى تاڭدا تۇرعىندار جەرگىلىكتى بيلىك ورگاندارىمەن بىرگە بوگەتتەردىڭ قورشاۋىن كۇشەيتىپ، قۇم تولى قاپ توسەپ، ءوز ۇيلەرىن تاسقىننىڭ كەلەسى لەگىنەن ساقتاۋدىڭ بار امالىن جاساپ جاتىر. بۇل تۋرالى اتىراۋ وبلىسى اكىمدىگىنىڭ باسپا ءسوز قىزمەتى مالىمدەدى.
«قالامىزدىڭ تۇرعىندارىن تولىقتاي ەۆاكۋاتسيالاۋ تۋرالى جەرگىلىكتى حالىق اراسىندا تۇسىنىسپەۋشىلىك تۋىندادى. قازىرگى ۋاقىتتا تەك سۋ باسۋ قاۋپى بار شاعىناۋدانداردىڭ تۇرعىندارى عانا ەۆاكۋاتسيالانادى. بۇگىن اكىمدىك جەم وزەنىنىڭ ارنالارىن تازارتۋعا ايتارلىقتاي كۇش سالدى. ول سۋ دەڭگەيىنىڭ تومەندەۋىنە وڭ اسەرىن تيگىزەدى. مەن سەنىمىن جوعالتپاي، جاعانى بەكىتۋ جۇمىستارىن جۇمىلا جاساپ جاتقان قۇلسارى حالقىنا العىسىمدى بىلدىرەمىن! جاعدايدىڭ قيىندىعىنا قاراماستان، حالىقتى ۇرەيگە ەرىك بەرمەۋگە شاقىرامىن. تۋىنداعان كەلەڭسىزدىكتەردى مەيلىنشە ازايتىپ، سۇيىكتى قالامىزدىڭ ءار تۇرعىنىنىڭ قاۋىپسىزدىگىن قامتاماسىز ەتۋگە بارىمىزدى سالامىز» - دەدى جىلىوي اۋدانىنىڭ اكىمى جۇمابەك قاراجانوۆ.
وڭىردەگى سۋ جەتپەگەن ايماقتارداعى تاسقىن سۋدان قورعانۋ جۇمىستارى مەيىلىنشە جالعاسىپ جاتىر.
«6-ساۋىردە تۇنگى ساعات 02.00-دەن باستاپ تەڭىز كەن ورنىنىڭ ۆاحتالىق قالاشىقتارىنا قۇلسارى قالاسىنان ەۆاكۋاتسيالانعان تۇرعىندار، ونىڭ ىشىندە باسىم كوپشىلىگى - ايەلدەر مەن بالالار كەلە باستادى. ولار ءومىر سۇرۋگە قاجەتتىنىڭ بارىمەن قامتاماسىز ەتىلگەن. قازىرگى ۋاقىتتا تشو بارلىق ەۆاكۋاتسيالانعانداردى ازىق-تۇلىكپەن جانە سۋمەن قامتاماسىز ەتۋگە كۇش سالىپ وتىر» - دەلىنگەن حابارلامادا.
ەسكە سالا كەتەيىك، جىلىوي اۋدانىندا 4-ساۋىردە تاسقىن سۋدان تونگەن قاۋىپكە بايلانىستى توتەنشە جاعداي جاريالاندى. ارتىنشا جىلىوي اۋدانىنىڭ ورتالىعى - قۇلسارى قالاسىنا تاسقىن سۋ كىرە باستادى. اتىراۋ وبلىسىنىڭ جىلىوي اۋدانىندا سۋ تاسقىنى بولۋى مۇمكىن ايماقتا تۇراتىن حالىقتى حاباردار ەتۋ ءۇشىن دابىل سيرەناسى قوسىلىپ، تۇرعىنداردى 10 ەۆاكۋاتسيالىق پۋنكتكە كوشىرە باستادى.
بەينەۋ اۋدانىندا ىرگەلەس كورشى وبلىسقا قاراستى قۇلسارى قالاسىنداعى سۋ تاسقىنىنان كەيىن جەدەل جەلى ىسكە قوسىلدى. قۇلسارى قالاسىندا 500 ءۇيدى تاسقىن سۋ باسىپ، 2400 ادام كوشىرىلدى.
تۇنگە قاراي قۇلسارىدا 2,5 مىڭ عيمارات سۋ استىندا قالىپ، مىڭ بالا ەۆاكۋاتسيالاندى.
سۋ باسقان قۇلسارىداعى اۋرۋحانادان 77 ناۋقاستى ماڭعىستاۋ وبلىسىنا اپارادى.
بۇگىن مەملەكەت باسشىسى قاسىم-جومارت توقايەۆ اتىراۋ وبلىسىنىڭ اكىمى سەرىك شاپكەنوۆپەن تەلەفون ارقىلى سويلەسىپ، وبلىستاعى بىردە- ءبىر وتباسى مەملەكەتتىڭ نازارىنان تىس قالمايتىنىن ايتتى. پرەزيدەنت تۇرعىندارعا سالەم جولداپ، بارىنشا قولداۋ كورسەتىلەتىنىن جەتكىزدى.
