قۇلسارىنىڭ 200 دەن استام تۇرعىنى باسپاناسىن قالپىنا كەلتىرۋ ءۇشىن وتەماقى الدى

өтемақы
Фото: Kazinform

اتىراۋ. KAZINFORM - قۇلسارى قالاسىندا سۋ تاسقىنىنان زارداپ شەككەن 200 دەن استام تۇرعىن باسپاناسىن قالپىنا كەلتىرۋ ءۇشىن وتەماقى الدى.

اتىراۋ وبلىسى جەدەل شتابىنىڭ مالىمەتىنشە، بۇگىنگە دەيىن ارنايى كوميسسيا 1500 گە جۋىق ءۇيدىڭ باعالاۋ قورىتىندىسىن دايىنداعان.

«قۇلسارى قالاسىندا سۋ كىرگەن ۇيلەردى باعالاۋ جانە وتەماقى تولەۋ جۇمىستارى جالعاسىپ جاتىر. قازىر 20 موبيلدى توپتىڭ مۇشەلەرى زارداپ شەككەن تۇرعىندارعا بۇلىنگەن مۇلىكتىڭ زالالىن انىقتاۋ جانە تەحنيكالىق ساراپتاما ناتيجەسىن تانىستىرۋدى قولعا الدى. بۇگىنگى كۇنى قۇلسارى قالاسىنىڭ 209 تۇرعىنى بۇلىنگەن ءۇيىن قالپىنا كەلتىرۋگە قاجەتتى وتەماقىنى الدى. ونىڭ ىشىندە 47 وتباسىنا جاڭا ءۇي سالۋ نەمەسە ساتىپ الۋ، 162 ادامعا جوندەۋ-قالپىنا كەلتىرۋ جۇمىسى ءۇشىن وتەماقى تولەندى»، - دەپ حابارلادى وبلىستىق جەدەل شتاب.

ماسەلەن، قۇلسارى قالاسىنىڭ تۇرعىنى گۇلبارشىن قوڭىربايەۆانىڭ وتباسى اپاتتى دەپ تانىلعان ءۇيىن بۇزعالى وتىر. ول وتەماقى تولەۋ تۋرالى كەلىسىمگە قول قويعان.

«ءۇيىمىز اپاتتى دەپ تانىلعان سوڭ اقشالاي وتەماقى الۋ ءۇشىن 19-مامىردا بارلىق قۇجاتتى تاپسىرىپ، بانكتەن ەسەپشوت اشتىق. سول ەسەپشتوتقا 21-مامىردا وتەماقى قارجىسى اۋدارىلدى. ەندى جاڭا ءۇي ساتىپ الامىز»، - دەيدى گۇلبارشىن قوڭىربايەۆا.

ال، گالينا قاراجانوۆا 20-مامىردا اقشالاي وتەماقى الۋ ماقساتىندا قۇجات تاپسىرعان. ونىڭ ەسەپشوتىنا 21-مامىردا مۇلىكتىك زالال ءۇشىن قارجى تۇسكەن.

مونوقالانىڭ تاعى ءبىر تۇرعىنى مەيرام تىلەكبايەۆ باعالاۋ پاراعىندا كورسەتىلگەن سوماعا كەلىسىپ وتىر. قازىر اقشالاي وتەماقى الۋ ءۇشىن قۇجات جيناپ ءجۇر.

«مەنىڭ ءۇيىم تۇرۋعا قاۋىپتى دەپ تانىلدى. قازىر بۇزىلىپ جاتىر. جاقىندا ماماندار ماعان بالدىق پاراق اكەلدى. كەلتىرىلگەن شىعىن كولەمىنە كوڭىلىم تولادى»، - دەدى مەيرام تىلەكبايەۆ.

تۇرعىندارىنىڭ بۇلىنگەن مۇلكىن باعالاۋ وسى اپتانىڭ سوڭىنا دەيىن اياقتالادى. موبيلدى توپتاردىڭ جۇمىسى ۇيلەردى باعالاۋ تولىق اياقتالعانعا دەيىن دەمالىسسىز جۇرگىزىلەدى.

ەسكە سالا كەتەلىك، بۇدان بۇرىن قۇلسارىنىڭ 357 تۇرعىنى وتەماقى الۋ ءۇشىن كەلىسىمشارتقا قول قويعانىن حابارلادىق.

سوڭعى جاڭالىقتار