قۇلسارىدا ازىق-تۇلىككە تالاسقان ايەلدەردىڭ ءىسى سوتتا قارالدى

اتىراۋ. KAZINFORM - اتىراۋ وبلىسىنىڭ قۇلسارى قالاسىندا ازىق-تۇلىككە تالاسقان ايەلدەردىڭ ءىسى سوتتا قارالدى.

جىلىوي اۋداندىق سوتىنىڭ مالىمەتىنشە، جانجال مامىر ايىندا قۇلسارى قالاسىنداعى «ناقىش» عيماراتىندا بولعان.

«گۋمانيتارلىق كومەك رەتىندە جەتكىزىلگەن ازىق-تۇلىككە تالاسقان ەكى ايەل ت. مەن د. ءوزارا كەلىسە الماي قالعان. سول كەزدە د. جابىرلەنۋشى ت. -نى يتەرىپ قۇلاتقان. سونىڭ ناتيجەسىندە جابىرلەنۋشى جەڭىل دەنە جاراقاتىن العان. بۇل ءىس ق ر اكىمشىلىك قۇقىق بۇزۋشىلىق تۋرالى كودەكسىنىڭ 73-1-بابىنىڭ 1-بولىگىمەن (دەنساۋلىقتىڭ قىسقا مەرزىمگە بۇزىلۋىنا نەمەسە جالپى ەڭبەك قابىلەتىن تۇراقتى تۇردە بولماشى جوعالتۋعا اكەپ سوققان، دەنساۋلىققا قاساقانا جەڭىل زيان كەلتىرۋ) قارالدى»، - دەپ حابارلادى اۋداندىق سوت.

قۇقىق بۇزۋشى د. -نىڭ كىناسى سوت-مەديتسينالىق ساراپتاما قورىتىندىسىمەن، بەينە-دىبىس جازباسىمەن، ارىزبەن، تۇسىنىكتەمەلەرمەن، اكىمشىلىك قۇقىق بۇزۋشىلىق تۋرالى حاتتامامەن جانە باسقا دا ءىس قۇجاتتارىمەن تولىقتاي دالەلدەنىپ وتىر. سوت-مەديتسينالىق ساراپتاما قورىتىندىسىنا سايكەس، جابىرلەنۋشى ت.-نىڭ دەنساۋلىعىنا جەڭىل دارەجەلى زيان كەلگەنى انىقتالعان.

«د.-نىڭ كىناسىن جەڭىلدەتەتىن ءمان-جاي رەتىندە ونىڭ بۇرىن اكىمشىلىك جاۋاپتىلىققا تارتىلماعانى، 14 جاسار بالاسىنىڭ بارى ەسكەرىلدى. اۋىرلاتاتىن ءمان-جايلار انىقتالمادى. سوت د.-نىڭ جەكە باسىن، قۇقىق بۇزۋشىلىقتىڭ سيپاتىن، جاۋاپتىلىعى مەن جازاسىن جەڭىلدەتەتىن ءمان-جايلاردى ەسكەرىپ، وعان ق ر اكىمشىلىك قۇقىق بۇزۋشىلىق تۋرالى كودەكسىنىڭ 829-11-بابىنىڭ 2-بولىگىمەن 38 مىڭ 766 تەڭگە كولەمىندە اكىمشىلىك ايىپپۇل سالدى»، - دەپ ءمالىم ەتتى اۋداندىق سوتتان.

سوت قاۋلىسى زاڭدى كۇشىنە ەنگەن جوق.

اۆتور
جولداسبەك شوپەعۇل