قۇلسارىدا 28 مىڭنان استام ادام قاۋىپسىز جەرگە كوشىرىلدى
اتىراۋ. KAZINFORM – ق ر توتەنشە جاڭدايلار ءمينيسترلىىنىڭ باسپا ءسوز قىزمەتى اتىراۋ وبلىسى جىلىوي اۋدانىنىڭ قۇلسارى قالاسىندا قۇتقارۋ جۇمىستارى ءالى دە جالعاسىپ جاتقانىن حابارلادى.
«قۇتقارۋشىلار تۇرعىندار مەن ولاردىڭ ءۇي جانۋارلارىن ەۆاكۋاتسيالاۋعا كومەكتەسىپ جاتىر. قازىرگە دەيىن جىلىوي اۋدانىندا 28501 تۇرعىن، ونىڭ ىشىندە 6781 بالا ەۆاكۋاتسيالاندى» - دەلىنگەن حابارلامادا.
ەسكە سالا كەتەلىك، بۇدان بۇرىن تاسقىن سۋدىڭ قاۋپىنە بايلانىستى جىلىوي اۋدانىندا توتەنشە جاعداي جاريالاندى.
كۇندىز قۇلسارىدان دوسسورعا دەيىنگى جولدىڭ ءبىر بولىگىن سۋ باستى.
5-ءساۋىر كۇنى تاسقىن سۋ قۇلسارى قالاسىنا كىرە باستاعانىن حابارلاعان بولاتىنبىز.
بەينەۋ اۋدانىنا ماڭعىستاۋ وبلىستىق اۋرۋحاناسىنىڭ دارىگەرلەرى مەديتسينيالىق كومەك كورسەتۋگە ارنايى باردى.
سونداي-اق بەينەۋ اۋدانىندا قۇلسارىدان كەلگەن 2,5 مىڭ ادام ورنالاسىپ ۇلگەردى. اقتاۋ قالاسىندا دا سۋدان زارداپ شەككەن قۇلسارى تۇرعىندارى ءۇشىن ەۆاكۋاتسيالىق پۋنكت اشىلدى.
سونىمەن قاتار ماڭعىستاۋدا ازىق-تۇلىك قورى جەتكىلىكتى ەكەنىن رەسمي ورىندار مالىمدەدى.
سۋ باسۋ كەزىندە قۇلسارىداعى اۋرۋحانادان 77 ناۋقاستى ماڭعىستاۋ وبلىسىنا جەتكىزدى.
