قۇلسارى تۇرعىندارىنا ولگەن مال ءۇشىن 123,8 ميلليون تەڭگە وتەماقى تولەندى
اتىراۋ. KAZINFORM - اتىراۋداعى قۇلسارى قالاسىنىڭ تۇرعىندارىنا سۋ تاسقىنى كەزىندە ولگەن مال ءۇشىن 123,8 ميلليون تەڭگە وتەماقى تولەندى.
جىلىوي اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى نۇرتاس قۋاتبايەۆتىڭ ايتۋىنشا، وسى كەزگە دەيىن تۇرعىنداردان 101 ءوتىنىش تۇسكەن.
«تۇرعىنداردان ءوتىنىش قابىلداۋ ءالى دە جالعاسىپ جاتىر. ارنايى كوميسسيا 15 جۇمىس كۇنى ىشىندە بارلىق قۇجاتتى قارايدى. وتەماقى مالىنان ايىرىلعان ازاماتتىڭ جەكە ەسەپشوتىنا اۋدارىلادى. بۇعان دەيىن قابىلدانعان وتىنىشتەر بويىنشا زالال تولىعىمەن وتەلدى. وسى كەزگە دەيىن مالىنان ايىرىلعان تۇرعىنداردىڭ ەسەپشوتىنا 123,8 ميلليون تەڭگە وتەماقى اۋدارىلدى»، - دەپ حابارلادى نۇرتاس قۋاتبايەۆ.
ماسەلەن، قوسشاعىل اۋىلدىق وكرۋگىندە تىركەلگەن «قاراعاي» شارۋا قوجالىعىنىڭ جەتەكشىسى ايتۋار مىرزاعاليەۆتىڭ 2 جىلقىسى تاسقىن سۋعا باتىپ كەتكەن.
ول وسىعان بايلانىستى كاسىپكەرلىك جانە اۋىل شارۋاشىلىعى بولىمىنە ءوتىنىش بەرگەن.
«بىزگە باعالاۋ كوميسسياسىنىڭ مۇشەلەرى كەلىپ، بارلىق قۇجاتتى زەردەلەدى. ءبىراز ۋاقىتتان كەيىن زالالدى باعالاۋ قورىتىندىسىن حابارلادى. ەسەپتەلگەن قارجى كولەمىنە كەلىسىم بەرگەن سوڭ، ەسەپشوتقا وتەماقى ءتۇستى»، - دەدى ايتۋار مىرزاعاليەۆ.
ال، ايدا ەركىنعاليەۆا جەتەكشىلىك ەتەتىن «ەركىنقاليەۆا» شارۋا قوجالىعىنان 2 سيىر مەن 4 قوشقار ولگەن. ارنايى كوميسسيانىڭ قورىتىندىسىمەن زالالدىڭ جالپى سوماسى 1,2 ميلليون تەڭگەنى قۇراپ وتىر.
«سۋ تاسقىنى كەزىندە مالىمنىڭ ولگەنى تۋرالى كاسىپكەرلىك جانە اۋىل شارۋاشىلىعى بولىمىنە جۇگىنگەن ەدىم. كوميسسيانىڭ باعالاۋ قورىتىندىسىمەن ولگەن مال ءۇشىن زالال كولەمى تولىعىمەن وتەلدى»، - دەيدى ايدا ەركىنقاليەۆا.
ەسكە سالا كەتەلىك، بۇدان بۇرىن قۇلسارى تۇرعىندارىنىڭ 876 مالى مەن 532 قۇسى تاسقىن سۋدان ولگەنىن حابارلاعان بولاتىنبىز.
