قۇلسارى قالاسىنىڭ كوشەلەرىنەن 250 مىڭ تەكشە مەتر سۋ سورىلدى
اتىراۋ. KAZINFORM - جىلىوي اۋدانىنىڭ ورتالىعى - قۇلسارى قالاسىن باسقان تاسقىن سۋ ءالى تۇر. قازىر تاسقىن سۋدى سورۋ جالعاسىپ جاتىر.
قۇلسارى 1954-جىلدان بەرى جىلىوي اۋدانىنىڭ ورتالىعى بولعان. ال، 2001-جىلدان بەرى مونوقالالار تىزىمىنە ەنگىزىلگەن. مونوقالادا اۋدانداعى 86939 تۇرعىننىڭ 66 مىڭعا جۋىعى تۇرادى.
جىلىوي اۋدانى اكىمدىگىنىڭ مالىمەتىنە سۇيەنسەك، 4-ساۋىردە توتەنشە جاعداي جاريالاندى. مۇنداي شەشىم قابىلداۋعا جەم وزەنىنىڭ ارناسىنان اسقان تاسقىن سۋدىڭ قاراعاي ەلدى مەكەنىنە كىرگەنى سەبەپ بولعان. سول كۇنى «دوسسور-قۇلسارى» جولىنىڭ ءبىر بولىگىن سۋ شايدى.
ال، 5-ساۋىردە جەمنىڭ سۋى قۇلسارى قالاسىنىڭ ورتاسىمەن اعاتىن قۇرساي وزەگىنىڭ ارناسىنان استى. سۋ تاسقىنى قاۋپىنە بايلانىستى 36738 ادام ەۆاكۋاتسيالاندى. ونىڭ ىشىندە 8382 بالا بار.
قۇلسارىدا 2800 دەن استام تۇرعىن ءۇي مەن وزگە دە نىساندى سۋ باستى. ماسەلەن، جىلىوي اۋدانىنداعى 2-جانە 9-مەملەكەتتىك ءورت ءسوندىرۋ بولىمدەرىندە جۇمىس ىستەيتىن 8 قىزمەتكەردىڭ ءۇيى تاسقىن سۋ استىندا قالعان.
«تۇرعىنداردى قۇتقارۋ جۇمىستارىن جۇرگىزدىم. وقيعا ورنىنان كەتىپ قالۋعا بولمايدى. ءتىپتى سۋ باسقان ۇيىمە بارۋدى ويلامادىم. ويتكەنى، وزىمە تاپسىرىلعان مىندەتتى ورىنداۋى قاجەت. ارىپتەستەرىم مەنىڭ اتا-انامدى، بالالارىمدى سۋ باسقان ۇيدەن الىپ شىعىپ، ەۆاكۋاتسيالىق پۋنكتكە جەتكىزدى. قازىر وتباسىم ماڭعىستاۋ وبلىسىنىڭ بەينەۋ اۋدانىنا ۋاقىتشا تۇراقتادى»، - دەيدى نۇربولات ورازوۆ.
قازىر قۇلسارى قالاسىندا تاسقىن سۋدى سورۋ، بوگەتتەردى نىعايتۋ جالعاسىپ جاتىر. بۇل جۇمىسقا 5658 ادام، 187 تەحنيكا، 17 ءجۇزۋ قۇرالى، 21 موتوپومپا تارتىلعان. وسى كەزگە دەيىن 250 مىڭنان استام تەكشە مەتر سۋ سورىلعان.
اۋداندىق اكىمدىكتىڭ اقپاراتىنا قاراعاندا، جەرگىلىكتى كاسىپكەرلەر سۋ سورۋعا 42 ۆاكۋۋم بولگەن.
ەسكە سالا كەتەلىك، بۇعان دەيىن اتىراۋداعى جىلىوي اۋدانىنان 35 مىڭعا جۋىق تۇرعىن ەۆاكۋاتسيالانعانىن جازعان ەدىك.
