قۇلسارى قالاسىندا ساۋدا ورىندارى اشىلىپ، اۆتوبۋس جۇرە باستادى
اتىراۋ. KAZINFORM - اتىراۋ وبلىسىنداعى قۇلسارى قالاسىندا ساۋدا ورىندارى اشىلىپ، اۆتوبۋس جۇرە باستادى.
جىلىوي اۋدانى اكىمىنىڭ ورىنباسارى گۇلنافيس ايشۋاقوۆانىڭ ايتۋىنا قاراعاندا، سۋدا ورىندارى قالىپتى جۇمىسىنا كىرىستى. ونىڭ ىشىندە 100 ازىق-تۇلىك دۇكەنى، 2 ءىرى سۋپەرماركەت، 3 ءىرى كوتەرمە ساۋدا بازارى بار. سونداي-اق، 20 عا جۋىق ءدارىحانا قايتادان اشىلدى.
«قالاداعى قوعامدىق تاماقتانۋ ورىندارى دا قالىپتى جۇمىسقا كىرىستى. تاۋلىك بويى جۇمىس ىستەيتىندەرى بار. ساۋدا ورىندارىنىڭ يەلەرىنە ءتۇسىندىرۋ جۇمىسى جۇرگىزىلىپ، باعانى نەگىزسىز قىمباتتاتپاۋدى قاداعالاپ وتىرمىز»، - دەدى گۇلنافيس ايشۋاقوۆا.
سونداي-اق، «باتىس تەح ينۆەست» ج ش س باسشىسى اۋەز ابىلاكىمتىڭ مالىمەتىنە سۇيەنسەك، جولاۋشى تاسىمالدايتىن قوعامدىق كولىكتەر رەيسكە شىقتى.
«توتەنشە جاعداي جاريالانعانعا دەيىن قۇلسارى قالاسىندا 55 اۆتوبۋس 12 باعىتتا جولاۋشى تاسىمالداعان ەدى. قازىر قالادا 14 اۆتوبۋس 4 باعىتتا جولاۋشى تاسىمالداپ ءجۇر. بۇدان بولەك قوسشاعىل، جاڭا قاراتون، مايكومگەن، جەم اۋىلدىق وكرۋگتەرىنە قاتىنايتىن اۆتوبۋستار قالىپتى جۇمىسىنا كىرىستى»، - دەدى اۋەز ابىلاكىم.
ونىڭ ايتۋىنشا، قۇلسارى قالاسىنىڭ كوشەلەرى سۋدان تازارتىلعان سوڭ قوعامدىق كولىك سانى ارتادى.
ەسكە سالا كەتەلىك، بۇعان دەيىن قۇلسارى قالاسىنىڭ كوشەلەرىنەن 250 مىڭ تەكشە مەتر سۋ سورىلعانىن حابارلاعان بولاتىنبىز.
سونداي-اق، 500 ۇيگە ەلەكتر جارىعى بەرىلدى.
