قۇلدىققا تاپ بولدى: جىل باسىنان ميانما مەن لاوستان 12 وتانداسىمىز شىعارىلدى
استانا. KAZINFORM - ق ر سىرتقى ىستەر مينيسترلىگى قۇلدىققا تاپ بولعانداردى قۇتقارۋ ءىس-شارالارىنا قاتىستى تۇسىنىك بەردى.
- قازاقستان رەسپۋبليكاسىنىڭ سىرتقى ىستەر مينيسترلىگى ءوز قۇزىرەتى شەگىندە شەتەلدە جۇرگەن قازاقستان ازاماتتارىنىڭ قۇقىقتارى مەن زاڭدى مۇددەلەرىن قورعاۋ ماسەلەلەرىنە ەرەكشە باسىمدىق بەرەدى جانە بۇل باعىتتا جۇيەلى جۇمىس جۇرگىزەدى. شەتەلدە ەڭبەك قۇلدىعىندا جۇرگەن ازاماتتاردىڭ سانى بەلگىسىز، دەگەنمەن وسىنداي جاعدايعا تاپ بولعان قازاقستاندىقتار انىقتالعان جاعدايدا، ولارعا قاجەت كونسۋلدىق- قۇقىقتىق كومەك كورسەتىلەدى، - دەپ اتالىپ وتكەن مينيسترلىكتىڭ Kazinform اگەنتتىگىنە بەرگەن جاۋابىندا.
نەگىزىنەن، ازاماتتار الەۋمەتتىك جەلىلەر مەن مەسسەندجەرلەر ارقىلى جوعارى جالاقى ۋادە ەتىلگەن جۇمىس ۇسىنىستارىنا سەنىپ، كوبىنەسە وڭتۇستىك جانە وڭتۇستىك شىعىس ازيانىڭ كەيبىر ەلىنە باراتىنى ءمالىم.
- جالپى، ق ر سىرتقى ىستەر مينيسترلىگى شەتەلگە شىعاتىن ازاماتتارعا تەك رەسمي ارنالار ارقىلى جۇمىسقا ورنالاسۋدى، دەلدالداردىڭ ليسەنزيالارىن مۇقيات تەكسەرۋدى، ەڭبەك شارتى مەن جۇمىس ۆيزاسىن الدىن الا راسىمدەۋدى جانە شەتەل مەملەكەتتەگى قازاقستان ەلشىلىگىنىڭ بايلانىس دەرەكتەرىن وزىمەن بىرگە الىپ جۇرۋگە كەڭەس بەرەدى. قاۋىپسىزدىك شارالارىن ساقتاۋ - ازاماتتاردىڭ ءوز ءومىرى مەن قۇقىقتارىن قورعاۋدىڭ كەپىلى بولاتىنىن اتاپ وتكەن ءجون، - دەلىنگەن مينيسترلىك اقپاراتىندا.
ۆەدومستۆو مالىمەتىنە قاراعاندا، جىل باسىنان بەرى قازاقستاننىڭ سىرتقى ىستەر مينيسترلىگى مەن تايلاندتاعى ق ر ەلشىلىگى اتقارعان شارالار ناتيجەسىندە، ميانما مەن لاوس اۋماعىنان جۇمىس بەرۋشىلەر تاراپىنان الاياقتىققا تاپ بولعان 12 وتانداسىمىز شىعارىلدى. جالپى، كەيىنگى جىلدارى 50 گە جۋىق قازاقستان ازاماتى وسى ەلدەردەن امان-ەسەن ەلگە قايتارىلدى.
