قازىرگى تاڭدا قازاقستاندا قانداي ماماندار تاپشى

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، ەلىمىزدە ەڭ كوپ مامان جەتىسپەيتىن سالالاردىڭ ءبىرى - دەنساۋلىق ساقتاۋ جۇيەسى.

ماسەلەن، اكۋشەر-گينەكولوگتارعا ارنالعان 469 بوس جۇمىس ورنىنا نەبارى 100 تۇيىندەمە تۇسكەن. ال پەدياترلارعا ۇسىنىلعان 448 ورىنعا 139 ادام عانا ۇمىتكەر بولعان. انەستەزيولوگ-رەانيماتولوگتارعا سۇرانىس تا جوعارى. بۇل ماماندىق بويىنشا 300 بوس ورىنعا 75 تۇيىندەمە تىركەلگەن.

بۇدان بولەك، ەلىمىزدە ونكولوگ، نەوناتولوگ جانە ەندوكرينولوگ دارىگەرلەر دە جەتىسپەيدى.

قانداي ماماندىقتارعا سۇرانىس جوعارى؟

مينيسترلىك مالىمەتىنشە، جۇمىسشى ماماندىقتارىنا دەگەن سۇرانىس تا ازايماعان. قازىر جۇمىس بەرۋشىلەر بىلىكتى ەلەكتر ماماندارىن، مەحانيكتەردى، سلەسارلاردى، دانەكەرلەۋشىلەردى، ماشينيستەردى، جابدىق وپەراتورلارىن، قۇرىلىسشىلار مەن جۇرگىزۋشىلەردى ىزدەپ جاتىر.

سونىمەن قاتار ينجەنەرلەر مەن وندىرىستىك پروتسەستەردى اۆتوماتتاندىرۋ سالاسىنىڭ ماماندارى قاجەت.

ۆەدومستۆو مۇنداي سۇرانىستى ونەركاسىپتىڭ دامۋى، جاڭا نىسانداردىڭ سالىنۋى، كاسىپورىنداردىڭ جاڭعىرتىلۋى، سونداي-اق كولىك جانە ەنەرگەتيكا ينفراقۇرىلىمىنىڭ كەڭەيۋىمەن بايلانىستىرادى.

قازىر جۇمىس بەرۋشىلەر ءۇشىن ماماننىڭ كاسىبي بىلىمىمەن قاتار، زاماناۋي تەحنولوگيالاردى مەڭگەرۋى دە ماڭىزدى.

IT ماماندارىنا دا سۇرانىس ارتىپ كەلەدى

ەڭبەك نارىعىندا باعدارلامالىق جاساقتاما ازىرلەۋشىلەر، قوسىمشا باعدارلاماشىلارى جانە باسقا دا IT ماماندارى سۇرانىسقا يە.

مينيسترلىكتىڭ تۇسىندىرۋىنشە، ءوندىرىس ورىندارىندا اۆتوماتتاندىرۋ جۇيەلەرى مەن جاساندى ينتەللەكتىنىڭ ەنگىزىلۋى تسيفرلىق قۇرالداردى پايدالانا الاتىن قىزمەتكەرلەرگە دەگەن قاجەتتىلىكتى ارتتىرىپ وتىر.

ۇزاق مەرزىمدى بولجام بويىنشا، 2035-جىلعا دەيىن قازاقستان ەكونوميكاسىنا 2,9 ميلليون مامان قاجەت بولادى. ونىڭ جارتىسىنان استامى جۇمىسشى ماماندىقتارىنا تيەسىلى.

وسىعان بايلانىستى 2026-جىلى سۇرانىسقا يە ماماندىقتار ءتىزىمى 51 دەن 174 كە دەيىن كەڭەيتىلگەن. وعان ينجەنەريا، قۇرىلىس، وڭدەۋ ونەركاسىبى، بيوتەحنولوگيا، جاسىل جانە اتوم ەنەرگەتيكاسى سالالارىنداعى كاسىپتەر ەنگىزىلگەن.

كادر تاپشىلىعىنىڭ باستى سەبەبى نەدە؟

مينيسترلىك ەڭبەك نارىعىنداعى نەگىزگى ماسەلە جۇمىس كۇشىنىڭ جالپى سانىنىڭ ازدىعىندا ەمەس، مامانداردىڭ بىلىكتىلىگى مەن جۇمىس بەرۋشىلەردىڭ تالاپتارى اراسىنداعى سايكەسسىزدىكتە ەكەنىن اتاپ ءوتتى.

ياعني كەيبىر سالالاردا جۇمىس ىزدەۋشىلەر كوپ بولعانىمەن، ولاردىڭ ءبىلىمى مەن تاجىريبەسى بوس جۇمىس ورىندارىنىڭ تالاپتارىنا ساي كەلمەيدى.

سوندىقتان ۆەدومستۆو سۇرانىسقا يە مامانداردى دايارلاۋعا، ولاردىڭ تاجىريبەلىك داعدىلارىن دامىتۋعا جانە وقۋ ورىندارى مەن جۇمىس بەرۋشىلەر اراسىنداعى بايلانىستى كۇشەيتۋگە باسىمدىق بەرىپ وتىر.

قازىر كاسىپورىندارمەن بىرلەسىپ، دۋالدى وقىتۋ جۇيەسى دامىتىلۋدا. بۇل ءتاسىل ستۋدەنتتەرگە تەوريالىق ءبىلىمدى وندىرىستەگى تاجىريبەمەن ۇشتاستىرۋعا مۇمكىندىك بەرەدى. سونىمەن قاتار ازاماتتار قىسقامەرزىمدى كاسىپتىك كۋرستاردان ءوتىپ، جاڭا ماماندىق مەڭگەرە الادى.

مينيسترلىك وكىلدەرىنىڭ ايتۋىنشا، ەڭبەك نارىعىنداعى سۇرانىستى الدىن الا بولجاۋ بولاشاقتا قاجەت بولاتىن كاسىپتەردى انىقتاۋعا، ءبىلىم بەرۋ باعدارلامالارىن جەتىلدىرۋگە جانە ازاماتتارعا ماماندىق تاڭداۋدا دۇرىس شەشىم قابىلداۋعا كومەكتەسەدى.

el.kz