قازگيدرومەت سۋ باسقان وڭىرلەردەگى اۋا رايى بولجامىن جاريالادى

استانا. KAZINFORM - «قازگيدرومەت» ر م ك سۋ باسقان وڭىرلەردەگى اۋا رايى بولجامىنا تالداۋ جاسادى.

«بۇگىنگى تاڭدا سۋ دەڭگەيىنىڭ كوتەرىلۋى باتىس قازاقستان، اتىراۋ، اقمولا، قوستاناي، سولتۇستىك قازاقستان جانە شىعىس قازاقستان وبلىستارىندا جالعاسىپ جاتىر. سۋ وبەكتىلەرىندە مۇزدىڭ ەرۋى كەپتەلىس قۇبىلىستارى، سۋ دەڭگەيىنىڭ اۋىتقۋى مەن جوعارىلاۋى كۇتىلەدى. كەي جەرلەردە وزەن ارنالارىندا قاردىڭ قارقىندى ەرۋى، سونداي-اق ەرىگەن سۋدىڭ شەكتى مولشەردەن اسىپ كەتۋ جاعدايى ساقتالىپ وتىر»، - دەدى «قازگيدرومەت» مەملەكەتتىك مەكەمەسىنىڭ باسپا ءسوز حاتشىسى الينا يسماعۇلوۆا و ك ق-دە وتكەن بريفينگىدە.

ودان ءارى «قازگيدرومەت» ر م ك وكىلى وڭىرلەردەگى اۋا رايى بولجامىنا جەكە توقتالدى.

قوستاناي وبلىسى

سۋ دەڭگەيى ەرىگەن سۋ اعىستاردىڭ قوسىلۋى جانە جوعارعى جاعىنان سۋدىڭ شىعۋى ەسەبىنەن كوتەرىلۋدە. سۋ دەڭگەيىنىڭ ودان ءارى جوعارىلاۋى كۇتىلۋدە، قاۋىپتى بەلگىلەردەن اسىپ كەتۋى مۇمكىن، بۇل سۋ دەڭگەيىنىڭ جوعارىلاۋىنا جانە وزەندەردىڭ جايىلما ۋچاسكەلەرگە شىعۋىنا اكەلەدى.

اباي جانە شىعىس قازاقستان وبلىسى

2024 -جىلعى 8-10-ءساۋىر ارالىعىندا قاتتى جاۋىن-شاشىننىڭ جانە تەمپەراتۋرالىق فوننىڭ ودان ءارى جوعارىلاۋىنىڭ، قاردىڭ قارقىندى ەرۋى مەن وزەندەردىڭ مۇزدان اشىلۋىنىڭ بولجامىنا بايلانىستى سۋ دەڭگەيىنىڭ كۇرت كوتەرىلۋى، مۇز كەپتەلىستەرىنىڭ پايدا بولۋى، ەرىگەن اعىستاردىڭ قوسىلۋى جانە بەتكەيلىك اعىنداردىڭ قالىپتاسۋى كۇتىلۋدە.

اتىراۋ وبلىسى

2024 -جىلعى 7-9-ءساۋىر ارالىعىندا ەمبى وزەنى باسسەينىندەگى سۋ دەڭگەيىنىڭ جوعارى بولۋىنا بايلانىستى وزەن اعىسى بويىنشا تومەن ورنالاسقان ەلدى مەكەندەردى، شارۋاشىلىق قۇرىلىستار مەن جەرگىلىكتى ماڭىزى بار جولداردى سۋ باسۋ قاۋپى ساقتالادى.

اقمولا وبلىسى

2024 -جىلعى 7-10-ءساۋىر ارالىعىندا جاباي جانە قالقۋتان (كولۋتون) وزەندەرىندە، ولاردىڭ سالالارى مەن جوعارعى اعىستارىندا سۋ دەڭگەيىنىڭ سىني بەلگىلەرگە دەيىن كۇرت كوتەرىلۋى كۇتىلەدى جانە جايىلما ۋچاسكەلەرىنە سۋدىڭ شىعۋىمەن، مۇزدىڭ وتۋىمەن جانە كەپتەلىس قۇبىلىستارىمەن شەكتىك مولشەردەن اسىپ كەتۋ جاعدايى مۇمكىن.

اۆتور

داۋلەت ىزتىلەۋ