قازىعۇرتتىق شارۋا جىلىنا 1 ميلليوننان استام گۇل وسىرەدى
تۇركىستان. KAZINFORM - تۇركىستان وبلىسىنداعى جىلىجايلاردا وسىرىلگەن راۋشان گۇلدەر ساتىلىمعا شىعا باستادى.
قازىعۇرت اۋدانىنداعى «پاسەكا-بال» شارۋا قوجالىعىنىڭ ءتوراعاسى ازيزبەك قاسىموۆ جىلىجاي ءوندىرىسىن دامىتىپ وتىر. 2010 -جىلى باستالعان بيزنەس بۇگىندە وركەندەپ كەلەدى. العاشقىدا قيار مەن قىزاناق ەگىپ كەلگەن شارۋا، ەندى گۇل ءوسىرۋدى قولعا الدى.
جالپى شارۋا قوجالىققا تيەسەلى 18 گەكتار ەگىستىك جەردىڭ 2 گەكتارىنا جىلىجاي ورناتىلعان. سونىڭ تورتەۋىندە گۇل ءوسىرىلىپ جاتىر.
«جىل سايىن 1 ميلليوننان استام گۇل قىرقامىز. گۇل باعىندا راۋشاننىڭ «Misty Bubbles»، «كاتالينا»، «قارا سيقىر» دەپ اتالاتىن ءۇش ءتۇرى وسۋدە. نەگىزگى تۇتىنۋشىلارىمىز شىمكەنت قالاسىنىڭ تۇرعىندارى. سونداعى كاسىپكەرلەر وزدەرى كەلىپ الىپ كەتەدى، كەي جاعدايدا ءوزىمىز جەتكىزىپ بەرەمىز. قازىر 8-ناۋرىز مەرەكەسىنە وراي گۇلدەرىمىز جاقسى ساتىلىپ جاتىر»، - دەيدى شارۋا.
ازيزبەك قاسىموۆتىڭ سوزىنشە، ءبىر عانا جىلىجايدىڭ وزىنەن جىلىنا 400 مىڭعا دەيىن گۇل قىرقىلادى. ءونىمدى شىمكەنت، الماتى، قىزىلوردا قالالارىنا جونەلتەدى. گۇلدەردىڭ ورتاشا باعاسى - 150-170 تەڭگە. بۇگىندە جىلىجايدا تۇراقتى 15 ادام جۇمىس ىستەيدى. ولار گۇلدەردى كۇتىپ-باپتاپ، تولىق ءوسىپ شىققانشا باقىلاپ جۇرەدى.
«گۇل ءوسىرۋدىڭ وزىندىك تاسىلدەرى، قيىندىقتارى بار. بالالار بۇل گۇلدەردىڭ تۇقىمدارىن تاشكەنتتەن الىپ كەلدى. سودان تاۋەكەلگە بەل بۋىپ، ءوسىرىپ جاتىرمىز»، - دەيدى ول.
ايتا كەتەيىك، رەسپۋبليكادا سالىنعان جىلىجايلاردىڭ %70 ى تۇركىستان وبلىسىنا تيەسىلى. جالپى وڭىردەگى جىلىجايلاردىڭ جالپى كولەمى - 1640 گەكتار. وتكەن جىلى جىلىجايلاردان 140 مىڭ توننا ءونىم جينالىپ، رەسپۋبليكا حالقىنىڭ %42 ى كوكونىسپەن قامتاماسىز ەتىلگەن.
اۆتور
قايرات زاينيشيەۆ
