قازى-قارتا، جال-جايا مەن شۇجىققا حالىقارالىق ساپا ستاندارتتارى ەنگىزىلۋى مۇمكىن

قازاقستان نە ۇسىندى؟

19-تامىزدا ەلوردادا ISO/TC 34/SC 6 «ەت، قۇس، بالىق، جۇمىرتقا جانە ولاردان جاسالعان ونىمدەر» پلەنارلىق وتىرىسى اياسىندا ەت ونىمدەرىنىڭ ساپاسى جونىندەگى فورۋم ءوتتى.

ءىس-شارانى ق ر ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتى مەن «قازستاندارت» ر م ك ۇيىمداستىردى. فورۋمعا ISO وكىلدەرى، مەملەكەتتىك ورگاندار، بيزنەس، عىلىمي ۇيىمدار جانە سالالىق ساراپشىلار قاتىستى.

قازاقستان جىلقى ەتىنەن دايىندالعان دايىن ونىمدەرگە ارنالعان العاشقى حالىقارالىق ISO ستاندارتىن ازىرلەۋدى ۇسىندى. قازىرگى ۋاقىتتا مۇنداي ونىمدەرگە ارنالعان ءبىرىڭعاي حالىقارالىق قۇجات جوق.

ءبىرىڭعاي ستاندارت نە ءۇشىن قاجەت؟

جالپى تالاپتاردىڭ بولماۋى تەرمينولوگيادا، جىكتەۋدە، تاڭبالاۋدا جانە ءونىم ساپاسىن باعالاۋدا ايىرماشىلىقتاردىڭ تۋىنداۋىنا اكەلەدى. بۇل ءوز كەزەگىندە ونى ەكسپورتتاۋعا قوسىمشا كەدەرگىلەر جاساۋى مۇمكىن.

بولاشاق حالىقارالىق ستاندارتتىڭ نەگىزى رەتىندە قازاقستان گوست 34921-2023 «ۇلتتىق جىلقى ەتى ونىمدەرى. تەحنيكالىق شارتتار» ستاندارتىن پايدالانۋدى ۇسىنادى.

قۇجاتقا ءداستۇرلى جىلقى ەتى ونىمدەرىنە قويىلاتىن تالاپتار - قازى، شۇجىق، جال، جايا، سونداي-اق ىستالعان شۇجىق ونىمدەرى كىرۋى مۇمكىن.

ستاندارتتى كىم ازىرلەيدى؟

قازاقستان ستاندارت جوباسىن دايىنداپ، ونى ءوندىرۋشى ەلدەردىڭ تالقىلاۋىنا شىعاراتىن حالىقارالىق جۇمىس توبىن قۇرىپ، ونى باسقارۋعا دايىن.

ق ر ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتى ءتوراعاسىنىڭ ورىنباسارى قانات قابىلبەكوۆ قازاقستاننىڭ ISO كەڭەسى سايلاۋىنا قاتىسۋى ەلگە حالىقارالىق شەشىمدەر قابىلداۋعا بەلسەندىرەك قاتىسۋعا جانە وتاندىق ەكونوميكا ءۇشىن ماڭىزدى باستامالاردى ىلگەرىلەتۋگە مۇمكىندىك بەرەتىنىن اتاپ ءوتتى.

فورۋمدا سونداي-اق قازاقستان مەن قىتايدىڭ ستاندارتتاۋ جانە سايكەستىكتى باعالاۋ سالاسىنداعى ىنتىماقتاستىعى تالقىلاندى.

تاراپتار بىرلەسكەن زەرتتەۋلەر جۇرگىزۋ، زەرتحاناارالىق سالىستىرۋلار جاساۋ جانە سىناق ادىستەرىن جەتىلدىرۋ ماسەلەلەرىن قاراستىرۋدا.

فورۋم قورىتىندىسى بويىنشا ءارى قارايعى جۇمىستىڭ نەگىزگى باعىتتارى ايقىندالدى: جىلقى ەتى ونىمدەرىنە ارنالعان ISO ستاندارتىن ىلگەرىلەتۋ، قازاقستاندىق ساراپشىلار مەن بيزنەستىڭ حالىقارالىق ستاندارتتاۋعا قاتىسۋىن كەڭەيتۋ، زەرتحانالىق بازانى دامىتۋ جانە حالىقارالىق ىنتىماقتاستىقتى نىعايتۋ.

ەسكە سالايىق، بۇعان دەيىن قازاقستاندىق جىلقى ەتى جاپونيا نارىعىنا شىعۋى مۇمكىن ەكەنى حابارلاندى.