قازپوشتانىڭ جۇمىسىنان مىڭداعان كەمشىلىك انىقتالدى - باس پروكۋراتۋرا

استانا. KAZINFORM - باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتى «قازپوشتا» ا ق جۇمىسىنىڭ اكىمشىلىك راسىمدىك- پروتسەستىك كودەكس تالاپتارىنا قانشالىقتى ساي ەكەنىن تەكسەردى.

تەكسەرۋ بارىسىندا جولدانىمداردى تىركەمەۋدىڭ 10 مىڭنان استام فاكتىسى، 2 مىڭعا جۋىق مەملەكەتتىك قۇقىقتىق ستاتيستيكانى بۇرمالاۋ، جولدانىمدى ۋاقتىلى تىركەمەۋدىڭ 249 فاكتىسى، ءوتىنىشتى قاراۋ مەرزىمىن بۇزۋدىڭ 94 فاكتىسى جانە وزگە دە كەمشىلىكتەر انىقتالدى.

بۇدان باسقا، «قازپوشتا» ا ق پايدالاناتىن ەلەكتروندى قۇجات اينالىمى جۇيەسىن قۇجاتتاۋ، پايدالانۋ ءتارتىبىن رەتتەيتىن قۇقىقتىق اكتىلەر اكىمشىلىك راسىمدىك-پروتسەستىك كودەكس تالاپتارىنا سايكەس كەلمەگەنى انىقتالدى.

تەكسەرۋ ناتيجەلەرى بويىنشا كوميتەت جانە ونىڭ اۋماقتىق ورگاندارى زاڭ بۇزىلۋىن جويۋ تۋرالى 21 ۇسىنىم ەنگىزدى، 20 اكىمشىلىك ءىس قوزعالدى.

قاداعالاۋ اكتىلەرىنىڭ قارالۋ ناتيجەسىندە 48 قىزمەتكەر تارتىپتىك جاۋاپكەرشىلىككە جانە 20 سى اكىمشىلىك جاۋاپقا تارتىلدى.

سونىمەن قاتار، قۇقىق قورعاۋ ورگاندارىنا حابارلانباعان بوتەننىڭ مۇلكىن ۇرلاۋ، سونداي-اق الاياقتىق فاكتىلەرى انىقتالدى، وسىلايشا اتالعان قىلمىستار ەسەپكە الىنباي، ولار بويىنشا پروتسەستىك شەشىم قابىلدانباعان.

وسى رەتتە كوميتەتتىڭ باستاماسى بويىنشا «قازپوشتا» اق فيليالدارى ارقىلى جىبەرىلگەن سالەمدەمەلەردى ۇرلاۋدىڭ 3 فاكتىسى، سونداي-اق كوممۋنالدىق قىزمەتتەردى تولەۋ ءۇشىن قابىلدانعان اقشالاي قاراجاتتى ۇرلاۋ دەرەگى تىركەلدى.