قازپوشتانىڭ شاتىرى ۇستىنە قۇلاعان جامبىلدىق ازاماتشا 10 ميلليون تەڭگە مورالدىق وتەماقى ءوندىرىپ الدى

تاراز. قازاقپارات - 2023 -جىلدىڭ كوكتەمىندە جامبىل اۋدانى، اسا اۋىلىندا قاتتى جەل «قازپوشتا» ا ق فيليالى عيماراتىنىڭ شاتىرىن ۇشىرىپ كەتىپ، ول ايەلدىڭ ۇستىنە قۇلاعان. زارداپ شەككەن ازاماتشا شۇعىل تۇردە رەانيماتسياعا جەتكىزىلگەن بولاتىن. وسى وقيعاعا بايلانىستى ق ر جوعارعى سوتى شەشىم شىعاردى. بۇل تۋرالى سوتتىڭ باسپا ءسوز قىزمەتى ءمالىم ەتتى.

«جابىرلەنۋشىگە جابىق باس ميىنىڭ جاراقاتى، كەۋدە قۋىسىنىڭ جانە جۇلىننىڭ زاقىمدانۋى، بەت پەن بىلەكتىڭ كەڭ سكالپيرلەنگەن جاراسى، 3-4 ومىرتقانىڭ قىسىلىپ سىنۋى سياقتى اۋىر دەنە جاراقاتتارى كەلتىرىلگەن. ايەلگە 1 توپتاعى مۇگەدەكتىگى ساناتى بەلگىلەنگەن»، - دەلىنگەن حابارلامادا.

ءمالىم بولعانداي، قازپوشتانىڭ جامبىلداعى فيليالى زارداپ شەككەن ازاماتشانىڭ قىزى تۇسىرگەن شاعىمعا جاۋاپ بەرە وتىرىپ، وعان 7 ميلليون تەڭگە كومەك كورسەتكەن. الايدا قاراجات شەتەلدە ەمدەلۋگە جانە وڭالتۋعا جۇمسالعان بارلىق شىعىنداردى وتەۋگە جەتپەي قالعان.

«سوندىقتان جابىرلەنۋشى دەنساۋلىققا كەلتىرىلگەن زيان مەن مورالدىق زيان ءۇشىن وتەماقى ءوندىرىپ الۋ تۋرالى تالاپ قويۋمەن سوتقا جۇگىنگەن. سوتتا اق وكىلى تالاپ قويۋدى مويىندامادى، 2021-2022 -جىلدارى ا ق-مەن شاتىرعا جوندەۋ جۇرگىزىلگەنىن، ءبىراق ارحيۆتەن جوندەۋ جۇمىستارىنا قاتىستى قۇجاتتار تابىلماعانىن، سايكەسىنشە شاتىردى اۋىستىرعان مەردىگەردى انىقتاۋ مۇمكىن بولماعانىن ايتىپ تۇسىندىرگەن»، - دەپ حابارلادى سوتتان.

سوتتا شاتىردىڭ قۇلاۋى مەردىگەر ساپاسىز ورىنداعان جوندەۋ جۇمىستارىنىڭ سالدارىنان ونىڭ جەتكىلىكسىز نىعايتىلماعانىنا بايلانىستى بولعاندىعى انىقتالدى.

«سوت قازپوشتا عيماراتىنىڭ قاۋىپسىزدىگى مەن پايدالانۋىنىڭ ءتيىستى دەڭگەيىن قامتاماسىز ەتپەدى دەگەن قورىتىندىعا كەلدى، سەبەبى اق عيماراتتى كۇتىپ ۇستاۋعا جانە شاتىردىڭ كۇردەلى جوندەۋ جۇمىستارىن باقىلاۋعا جاۋاپتى بولىپ تابىلادى. وسىنى ەسكەرە وتىرىپ، تالاپ قويۋ ءىشىنارا قاناعاتتاندىرىلدى: قازپوشتادان 8,5 ميلليون تەڭگە ماتەريالدىق زالالدىڭ وتەماقىسى جانە 10 ميلليون تەڭگە مورالدىق زيان ءوندىرىلدى»، - دەلىنگەن سوتتىڭ حابارلاماسىندا.

شەشىم زاڭدى كۇشىنە ەنگەن جوق.

اۆتور
باقىتگۇل اباي قىزى