قازاقتىڭ توعىزقۇمالاعى قىتايدا ۇزدىك ۇلتتىق سپورت اتاندى
استانا. KAZINFORM - استاناداعى V دۇنيەجۇزىلىك كوشپەندىلەر ويىنىندا توعىزقۇمالاق باسەكەسى جالعاسۋدا. وسى ورايدا Kazinform ءتىلشىسى قىتاي توعىزقۇمالاق سپورتى ارنايى كوميتەتىنىڭ ءتوراعاسى توقتاربەك مۇحامەتقاليدى اڭگىمەگە تارتتى.
- استاناعا قوش كەلدىڭىز. قىتايداعى توعىزقۇمالاق سپورتىنىڭ جاي-كۇيى تۋرالى ايتا كەتسەڭىز.
- توعىزقۇمالاق ويىنى قىتايدا ءبىرشاما تانىمال. 2015 -جىلى شينجاڭ- ۇيعىر اۆتونوميا ولكەسىندە شاحمات تۇرلەرى قوعامىنا قاراستى توعىزقۇمالاق سپورتى ارنايى كوميتەتى قۇرىلدى. بۇل قادام وسى ينتەلتەكتۋالدى ويىننىڭ قىتايدا دامۋىنا ايتارلىقتاي سەرپىن بەردى. 2016 -جىلى توعىزقۇمالاق ويىنى ءۇرىمجى قالالىق ماتەريالدىق ەمەس مادەني مۇرا تىزىمىنە ەندى. ال 2022 -جىلى قىتايدىڭ ۇزدىك ۇلتتىق سپورت ءتۇرى بولىپ باعالاندى.
- قىتاي ەلىندە توعىزقۇمالاقتان جارىستار وتكىزىلە مە؟
- ارينە! ولكە، وبلىس جانە قالالىق دەڭگەيدەگى سايىستار وتكىزىپ وتىرامىز. مىسالعا ايتار بولساق، وتكەن جىلى التاي قالاسىندا وتكەن ش ۇ ا ءو-نىڭ X ۇلتتىق سپورت جارىسى اياسىنداعى توعىزقۇمالاق باسەكەسىنە 8 كوماندادان 48 ادام ءوزارا مىقتىنى انىقتادى. ال وسى جىلى ش ۇ ا ءو-نىڭ ءى ينتەلەكتۋالدى سپورت جارىسى جانە اقساي قازاق اۆتونوميالى اۋدانىنىڭ 70 جىلدىق مەرەي تويى اياسىندا توعىزقۇمالاقتان باسەكەلەر وتكىزىلدى.
سونىمەن قاتار، قىتايداعى قازاق اۆتونوميا اۋدانىنىڭ ءۇش توعىزقۇمالاق تۋرنيرىن جانە بوروتالا- موڭعول اۆتونوميا وبلىسىندا توعىزقۇمالاق اشىق تۋرنيرىن ءساتتى وتكىزدىك.
- وتە كەرەمەت! قىتاي توعىزقۇمالاق سپورتى ارنايى كوميتەتىتى قازىرگى ۋاقىتتا قانداي جۇمىستار اتقارۋدا؟
- كوميتەتىمىز جارىستىڭ وتكىزىلۋىنە جانە ويىنشىلارىمىزدى حالىقارالىق دودالارعا قاتىستىرۋعا جاۋاپتى. سونداي-اق، جەرگىلىكتى ۇكىمەتتىڭ قولداۋى ارقاسىندا توعىزقۇمالاق جارىسىنىڭ تورەشىلەر كۋرسىن وتكىزىپ وتىرامىز. بارلىق جارىس توعىزقۇمالاق سپورتىنىڭ بەكىتىلگەن حالقارالىق ەرەجەسىنە ساي وتكىزىلەدى. قازىرگى ۋاقىتتا توعىزقۇمالاقشىلارىمىز ءارتۇرلى حالىقارالىق جارىستارعا بەلسەندى قاتىسىپ ءجۇر. استاناداعى كوشپەندىلەر ويىنى توعىزقۇمالاق، وۆاري جانە مانگالا جارىسىنا قىتايدان 8 سپورتشى كەلدى.
ايتا كەتەيىك، V دۇنيەجۇزىلىك كوشپەندىلەر ويىندارىنىڭ توعىزقۇمالاق باسەكەسى استانا قالاسىنداعى «دۋمان» قوناق ۇيىندە ءوتىپ جاتىر.
بايراقتى باسەكەدە الەمنىڭ 41 ەلىنەن كەلگەن 114 سپورتشى جۇلدەگە تالاسىپ جاتىر.
اۆتور
مۇحتار قاليموللا ۇلى
