قازاقتىڭ ۇلتتىق كيىمىنە الەم كوز تىگىپ وتىر - دينارا ءساتجان
استانا. KAZINFORM - ديزاينەر دينارا ءساتجان 14 جىل بويى ۇلتتىق كيىمدى الەمگە پاش ەتۋ جولىندا ەڭبەكتەنىپ ءجۇر. ناتيجە جوق ەمەس. بۇگىندە Dinara SATZHAN برەندىمەن تانىمال ساپالى كيىمدەرگە قازاقستاندىقتار عانا ەمەس، شەتەلدىكتەر دە قىزىعۋشىلىق تانىتىپ وتىر.
سۇلۋلىققا جانى قۇشتار جان كيىمدەگى ءار ەلەمەنتتى سۇزگىدەن وتكىزىپ، ەرەكشە ءارى ساپالى ءونىمدى جۇرت نازارىنا ۇسىنۋعا اسىق.
- ءوز باسىم 14 جىل بويى قازاق ۇلتتىق برەندىن دامىتىپ كەلەمىن. بۇل مەنىڭ ءاۋ باستاعى ماقساتىم، ادال نيەتىم. ەشكىمنىڭ كومەگىنسىز-اق جوعارى ناتيجەلەرگە قول جەتكىزدىم دەپ نىق سەنىممەن ايتا الامىن. ساپالى ءارى ادەمى كيىم ءارقاشان سۇرانىسقا يە. تۇتىنۋشىلاردىڭ تالابى مەن تىلەگى دە ەسكەرىلەدى. مەنىڭ دۇكەنىمدە ءار كويلەك زاماناۋي ستيلدە بولسا دا، ۇلتتىق ەلەمەنتتەر قامتىلعان، - دەيدى دينارا ءساتجان.
بۇل رەتتە تانىمال ديزاينەر سوڭعى كەزدە ۇلتتىق ەلەمەنتتەر بار كيىمدەرگە سۇرانىس اجەپتاۋىر ارتقانىن ايتادى.
- مەنىڭ دوسىم بەيبىت الىبەكوۆ رۋ اتى جازىلعان جەڭىل جەيدەلەردى ساتىپ جاتىر. سۇرانىس وتە كوپ. ۇلتتىق كيىم قازاقستاندا عانا ەمەس، الەمدە ترەندكە اينالىپ جاتىر دەۋگە تولىق نەگىز بار. مىسالى تانىمال برەند Louis Vuitton ءوز دۇكەنىن قازاق ءۇي قىلىپ سالدى،- دەيدى ول.
ۇلتتىق ستيلدەگى fashion-فەستيۆالدەردىڭ باسى-قاسىندا جۇرەتىن دينارا ءساتجان وتاندىق ديزاينەرلەردىڭ الەۋەتىن وڭ باعالادى.
ونىڭ ايتۋىنشا، ۇلتتىق كيىم ارقىلى ۇلتتىق رۋحتى ارتتىرۋ ازدىق ەتەدى.
- ۇلتتىق رۋحتى وياتۋ ءۇشىن ۇلتتىق يدەولوگيا قاجەت. سودان كەيىن ماتەريالدىق جاعدايدى جاقسارتۋ كەرەك. سودان كەيىن عانا مادەنيەت، ونەر، ۇلتتىق كيىم… نە دەسەك تە، ۇلتتىق كيىمدى دامىتۋداعى ەڭبەگىمىز ۇرپاق تاربيەسىنە وڭ اسەر ەتىپ جاتقانى انىق، - دەيدى دينارا ءساتجان.
اۆتور
ورالحان قوجانوۆ
