قازاقتىڭ ۇلتتىق كيىمى لوندون جۇرتشىلىعىن ءتانتى ەتتى

киім
فوتو: Tumurtogtokh Davaakhuu

لوندون. KAZINFORM - لوندوندا 17 مەملەكەت وكىلىنىڭ سالت-داستۇرلەرى مەن مادەنيەتى پاش ەتىلگەن شارا بولىپ ءوتتى. شەتەلدىك كورەرمەن نازارىنا قازاقتىڭ ۇلتتىق كيىمدەرى دە ۇسىنىلدى. كورسەتىلىمگە قازاقستاننىڭ ۇلى بريتانياداعى ەلشىلىگىنىڭ جانە «قازفەشن پاريج» فرانسۋز قاۋىمداستىعىنىڭ قولداۋىمەن اقتوبەلىك ديزاينەر دە قاتىستى، دەپ حابارلايدى Kazinform-نىڭ وسى ەلدەگى مەنشىكتى ءتىلشىسى عالىمجان قارامان ۇلى.

سابينا ناۋرىزالينا 15 جىلعا جۋىق ۋاقىتتان بەرى ۇلتتىق كيىم تىگۋمەن اينالىسادى. ءوز ونىمدەرىن 2 چەمودانعا سالىپ، اقتوبەدەن لوندونعا جالعىز كەلگەن.

сән
فوتو: Tumurtogtokh Davaakhuu

اشەكەي بۇيىمدارى مەن ءساندى سومكەلەرىن قوسا ەسەپتەگەندە قولمەن كەستەلەپ تىگىلگەن ءار كويلەگىنىڭ سالماعى اجەپتاۋىر.

قالىڭدىق ساۋكەلەسىنىڭ ءوزى 6 كيلوگرام تارتادى. شەتەلدىك كورەرمەنگە ۇسىنعان توپتاماسى «ناۋرىز» دەپ اتالادى.

дизайнер
فوتو: Tumurtogtokh Davaakhuu

ۇلتتىق كيىمدەردەن بولەك كۇندەلىكتى ومىردە كيۋگە ارنالعان ءساندى كويلەكتەرى دە بار.

«باتىس قازاقستاندىق ۇلتتىق كيىمدەردىڭ باستى ەرەكشەلىگى، البەتتە، ويۋلارىندا. گۇل فورماسىنداعى سۋرەتتەر كوپتەپ كەزدەسەدى. قانىق قويۋ تۇستەر دە ەرەكشە ءار بەرىپ تۇر. ءار كوستيۋمگە سايكەسىنشە اشەكەي بۇيىمداردى دا تاڭدادىق. قىز بالانىڭ اجارىن اشا تۇسەتىن سىرعا، ورىلگەن بۇرىمنىڭ ۇشىن بەكىتۋ ءۇشىن تاعىلاتىن شاشباۋى دا بار»، - دەيدى ديزاينەر سابينا ناۋرىزالينا.

сән
فوتو: Tumurtogtokh Davaakhuu

ءار ەلدىڭ سالتى باسقا… قازاقستاننان بولەك ەۋروپا، ازيا، افريكا ەلدەرىنىڭ وكىلدەرى ۇلتتىق كيىمدەر كيىپ، كوپشىلىكتى تاڭ قالدىرىپ جاتىر.

كەنيانىڭ ساۆاننالارىندا تۇراتىن جارتىلاي كوشپەلى افريكالىق بايىرعى حالىقتىڭ دا ايتارى بار.

ماساي تايپاسىنىڭ وكىلى اشەكەي بۇيىمىمىز قانشالىقتى كوپ بولسا، سونشالىقتى باي ەكەنىمىز بىلىنەدى دەيدى.

киім
فوتو: Tumurtogtokh Davaakhuu

«بۇل - سالتاناتتى شارالاردا، تويلاردا كيەتىن كيىمىمىز. سىزدەردىڭ دە ۇلتتىق كيىمدەرىڭىز عاجاپ ەكەن! ءاربىر بولشەگىنە دەيىن كەرەمەت. اسىرەسە، باس كيىم وتە ۇنادى. قازاقستان تۋرالى از عانا بىلەمىن. ءبىراق كوكجيەگىمدى كەڭەيتكىم كەلەدى. سىزدەرمەن تانىسقانىما قۋانىشتىمىن»، - دەيدى كەنيا رەسپۋبليكاسىنىڭ وكىلى كەجيا ورەگە.

сән
فوتو: Tumurtogtokh Davaakhuu

كورسەتىلىمگە قاتىسۋشى مەملەكەتتەردىڭ گەوگرافياسى ءارالۋان. بوسنيا جانە گەرتسەگوۆينا، چەحيا رەسپۋبليكاسى، مەكسيكا، كۋۆەيت، ءۇندىستان - بارلىعى 17 ەل.

сән
فوتو: Tumurtogtokh Davaakhuu

ءارقايسىسى ءوز ۇلتىنىڭ مادەنيەتىن پاش ەتۋگە تىرىسىپ باعۋدا. ويتكەنى جاھاندانۋ زامانىندا بىرەگەيلىكتى ساقتاپ، ۇلت قۇندىلىقتارىن ۇرپاقتان ۇرپاققا جەتكىزۋ ماڭىزدى، دەيدى ولار.

ساحناعا قازاقستاننىڭ قىز-كەلىنشەكتەرى ۇكىلى كامشات، بۇرمەلى كويلەك كيىپ شىققاندا كورەرمەننىڭ قوشەمەتى تولاستامادى.

«بۇل - لوندون. ءارالۋاندىلىقتىڭ سالتانات قۇراتىن قالاسى. ءتۇرلى مادەنيەتتەردىڭ توعىساتىن جەرى. ءبىزدىڭ قازاق حالقىنان، قازاقستاننان ۇيرەنەرىمىز كوپ ەكەن. ۇلتتىق كيىمدەرىڭىزدى الەم استاناسىندا پاش ەتە وتىرىپ، ەلدەرىڭىزگە ساياحاتتتاۋعا دەگەن قىزىعۋشىلىعىمىزدى وياتتىڭىزدار. مەن وتە ەرەكشە اسەرگە بولەندىم»، - دەيدى ءسان ساراپشىسى تايۆو مەگوۋما.

شارانىڭ ۇيىمداستىرۋشىسى «لوندوننىڭ جاس ديپلوماتتارى» اتتى ەرىكتىلەردەن قۇرالعان توپ.

ولار 20 جىلدان استام ۋاقىتتان بەرى حالىقارالىق ۇيىمدارداعى جاس قىزمەتكەرلەردى بىرىكتىرىپ، قوعامدىق ماڭىزى بار باسقوسۋلار وتكىزىپ كەلەدى.

بۇگىنگى كورسەتىلىمنىڭ قايىرىمدىلىق ماقساتى دا بار.

дизайнер
فوتو: Tumurtogtokh Davaakhuu

«شارادان تۇسكەن اقشا ەكى قايىرىمدىلىق ۇيىمىنىڭ ەسەپشوتىنا اۋدارىلادى. دۇكەندەردەن ارتىلعان تاعامداردى تۇرمىسى تومەن وتباسىلارعا تاراتۋمەن اينالىساتىن مەكەمەگە جانە سۋداندا اشتىق پەن كەدەيشىلىكتىڭ زاردابىن شەگىپ جاتقان بالالارعا كومەكتەسەتىن ۇيىمعا جىبەرىلەدى»، - دەيدى شارانىڭ ۇيىمداستىرۋشىسى ۋنرو دجانچيۆ.

ءۇزىلىس كەزىندە قايىرىمدىلىق جارمەڭكەسى دە ۇيىمداستىرىلدى. ءار ەل قولونەر بۇيىمدارى مەن ۇلتتىق تاعامدارىن ساتىپ، تۇسكەن قاراجاتتى قايىرىمدىلىققا جىبەردى.

شارا بيىل ءبىرىنشى رەت وتكىزىلىپ وتىر. بولاشاقتا ونى جىل سايىن ۇيىمداستىرۋ جوسپاردا بار.

 

اۆتور
عالىمجان قارامان ۇلى

سوڭعى جاڭالىقتار