قازاقستاندىقتارعا IT مەڭگەرۋگە 500 مىڭ تەڭگەگە دەيىن ۆاۋچەر بەرىلەدى
استانا. KAZINFORM - قازاقستاندا IT ماماندارىن دايارلاۋعا ارنالعان Tech Orda باعدارلاماسىنا ءوتىنىم قابىلداۋ باستالدى، دەپ حابارلايدى ج ي جانە سيفرلىق دامۋ مينيسترلىگىنىڭ باسپا ءسوز قىزمەتى.
Astana Hub Tech Orda باعدارلاماسىنىڭ بەسىنشى، مەرەيتويلىق ماۋسىمىنا ءوتىنىم قابىلداۋ باستالعانىن حابارلادى. قازاقستاننىڭ 18 بەن 45 جاس ارالىعىنداعى ازاماتتارى ەلىمىزدىڭ بارلىق وڭىرىندەگى اككرەديتتەلگەن IT مەكتەپتەردە وقۋعا ارنالعان ۆاۋچەر الىپ، ەڭ سۇرانىسقا يە سيفرلىق ماماندىقتاردىڭ ءبىرىن مەڭگەرە الادى.
باعدارلاما اياسىندا قاتىسۋشىلار وفلاين فورماتتاعى وقۋ ءۇشىن 500000 تەڭگەگە دەيىن، ال ونلاين نەمەسە گيبريدتى فورماتتاعى وقۋ ءۇشىن 400000 تەڭگەگە دەيىن نومينالدى ۆاۋچەر الا الادى.
Tech Orda - جاساندى ينتەللەكت جانە سيفرلىق دامۋ مينيسترلىگىنىڭ قولداۋىمەن جۇزەگە اسىرىلاتىن Astana Hub باعدارلاماسى. ول بىلىكتى IT مامانداردى دايارلاۋعا جانە ەلىمىزدەگى جەكە IT ءبىلىم بەرۋ ينفراقۇرىلىمىن دامىتۋعا باعىتتالعان.
- تەحنولوگيالار سالاسىنداعى ادامي كاپيتالدى دامىتۋ - قازاقستاننىڭ سيفرلىق ترانسفورماتسياسىنىڭ نەگىزگى باسىمدىقتارىنىڭ ءبىرى. Tech Orda باعدارلاماسى قازاقستاندىقتارعا ەڭبەك نارىعىندا سۇرانىسقا يە داعدىلاردى مەڭگەرۋگە، ال بيزنەسكە بىلىكتى كادرلارعا قول جەتكىزۋگە مۇمكىندىك بەرەدى. مۇنداي باعدارلامالارعا سۇرانىستىڭ جوعارى ەكەنىن كورىپ وتىرمىز جانە ادامداردىڭ IT سالاسىندا مانساپ قۇرۋىنا ءارى ەلدىڭ يننوۆاتسيالىق ەكونوميكاسىن دامىتۋعا ىقپال ەتەتىن باستامالاردى قولداۋدى جالعاستىرامىز،-دەدى ق ر پرەمەر- ءمينيسترىنىڭ ورىنباسارى، جاساندى ينتەللەكت جانە سيفرلىق دامۋ ءمينيسترى جاسلان ماديەۆ.
وقۋ سيفرلىق يندۋستريانىڭ ەڭ سۇرانىسقا يە باعىتتارى بويىنشا قولجەتىمدى: جاساندى ينتەللەكت، كيبەرقاۋىپسىزدىك، باعدارلامالىق قامتاماسىز ەتۋدى ازىرلەۋ، دەرەكتەردى تالداۋ، Cloud DevOps, GameDev, ءونىم مەنەدجمەنتى، UI/UX- ديزاين جانە باسقا دا ماماندىقتار.
باعدارلاما ىسكە اسىرىلعان 2021-2026 -جىلدار ارالىعىندا 12,5 مىڭنان استام قازاقستاندىق ءبىلىم الدى. مونيتورينگ ناتيجەلەرى بويىنشا ەكونوميكالىق بەلسەندى تۇلەكتەردىڭ %90 ى جۇمىسقا ورنالاسقان، ال ولاردىڭ ورتاشا جالاقىسى 725 مىڭ تەڭگەنى قۇرايدى، بۇل ەلدەگى ورتاشا ايلىق جالاقىدان شامامەن %43 عا جوعارى. سونداي-اق 3,2 مىڭنان استام ادام Tech Orda باعدارلاماسىنىڭ ارقاسىندا ماماندىعىن وزگەرتىپ، IT سالاسىندا مانسابىن باستادى.
باعدارلاما تۇلەكتەرىن 1287 كومپانيا جۇمىسقا قابىلدادى. ولاردىڭ قاتارىندا Kaspi.kz, Halyk Bank, Freedom Finance, Kolesa Group, Kcell, EPAM Kazakhstan, Yandex, Wolt, 2GIS، Deloitte, KPMG، EY جانە Accenture سياقتى جەتەكشى كومپانيالار بار. باعدارلاماعا قاتىساتىن IT مەكتەپتەردىڭ %30 دان استامى وڭىرلىك مەكتەپتەر، بۇل ەلىمىزدىڭ بارلىق وڭىرىندە ساپالى IT بىلىمگە قولجەتىمدىلىكتى كەڭەيتۋگە مۇمكىندىك بەرەدى.
ءوتىنىم قابىلداۋ 2026-جىلعى 7-قىركۇيەككە دەيىن جالعاسادى. قاتىسۋ شارتتارى، اككرەديتتەلگەن مەكتەپتەردىڭ ءتىزىمى جانە تىركەلۋ تۋرالى تولىق اقپارات Astana Hub پلاتفورماسىندا قولجەتىمدى. قوسىمشا اقپاراتتى تاڭداعان IT مەكتەپتەن نەمەسە 1818 ءنومىرى ارقىلى الۋعا بولادى.
بۇعان دەيىن اسكەري IT ماماندار دايارلايتىن ينستيتۋتقا قۇجات قابىلداۋ باستالعانىن جازعانبىز.
