قازاقستاندىقتار نەسيەدەن 14 كۇن ىشىندە ايىپپۇلسىز باس تارتا الادى
استانا. KAZINFORM - قازاقستاندىقتارعا كەپىلسىز قارىز راسىمدەۋدەن ايىپپۇلسىز باس تارتۋعا 14 كۇن بەرىلەدى. بۇل نورما ق ر قارجى نارىعىن رەتتەۋ جانە دامىتۋ اگەنتتىگى ازىرلەگەن بانكتەرگە قويىلاتىن جاڭا تالاپتاردا كوزدەلگەن.
قۇجاتقا سايكەس، بۇل قۇقىق مۇلىك كەپىلىمەن قامتاماسىز ەتىلمەگەن قارىز شارتتارىنا، سونداي-اق وسىنداي قارىزعا بايلانىستى جاسالعان ەرىكتى ساقتاندىرۋ شارتتارىنا قولدانىلادى.
قارجى ونىمىنەن نەمەسە قوسىمشا قىزمەتتەن شارت جاسالعان كۇننەن باستاپ 14 كۇنتىزبەلىك كۇن ىشىندە باس تارتۋعا بولادى.
الايدا الىنعان قارىزدان باس تارتۋ تولىعىمەن تەگىن بولمايدى. قارىز الۋشى اقشانى ناقتى پايدالانعان كۇندەر ءۇشىن ەسەپتەلگەن سىياقىنى تولەۋگە ءتيىس.
ساقتاندىرۋ شارتىنان باس تارتقان جاعدايدا قارجى ۇيىمى ساقتاندىرۋ شارتى كۇشىندە بولعان كەزەڭگە قاراي ساقتاندىرۋ سىيلىقاقىسىنىڭ ءبىر بولىگىن ۇستاپ قالا الادى. سونداي- اق قارجى ءونىمىن ۇسىنۋعا تىكەلەي بايلانىستى ناقتى جۇمسالعان شىعىنداردى وتەۋ قاراستىرىلعان.
قارجى ۇيىمدارى كليەنتكە قارىزدان نەمەسە قوسىمشا قىزمەتتەن ايىپپۇلسىز باس تارتۋ مۇمكىندىگى تۋرالى شارت جاسالعانعا دەيىن حابارلاۋعا مىندەتتى. باس تارتۋ ءراسىمى قولجەتىمدى بولىپ، تۇتىنۋشىدان قوسىمشا ارەكەتتەردى تالاپ ەتپەۋگە ءتيىس.
