قازاقستاندىقتار قىزمەتتىك پاسپورتپەن ەۋروپانىڭ ءۇش ەلىنە ۆيزاسىز بارا الادى

ەۋروپالىق ءمينيستردىڭ ايتۋىنشا، بۇگىنگى مەملەكەتتىك ساپار استاناداعى بەلگيا ەلشىلىگىنىڭ اشىلعانىنا 20 جىل تولعان كەزەڭمەن تۇسپا-تۇس كەلىپ وتىر. بۇل - ەكىجاقتى قارىم-قاتىناستار تاريحىنداعى ماڭىزدى بەلەس.

- مەملەكەتتىك ساپاردىڭ ناقتى ناتيجەلەرىنە دە توقتالعىم كەلەدى. 1-قاراشادان باستاپ قازاقستاننىڭ قىزمەتتىك پاسپورت(رەسمي قىزمەتتىك مىندەتتەرگە بايلانىستى شەتەلگە شىعاتىن تۇلعالارعا بەرىلەتىن قۇجات - رەد.) يەلەرىنە ۆيزاسىز ساپارلاۋعا مۇمكىندىك بەرەتىن بەنيليۋكس حاتتاماسى (بەلگيا، نيدەرلاند، ليۋكسەمبۋرگ) كۇشىنە ەنەدى. بۇدان بولەك، ەكى ەلدىڭ سىرتقى ىستەر مينيسترلىكتەرى اراسىنداعى ىنتىماقتاستىقتىڭ 2029 -جىلعا دەيىنگى باسىم باعىتتارىن ايقىندايتىن جول كارتاسى قابىلدانادى. بۇل قۇجات ەكىجاقتى بايلانىستاردى، سونىڭ ىشىندە ەكونوميكالىق ىنتىماقتاستىقتى دامىتۋعا نەگىز بولادى، - دەدى جان-ليۋك كريۋيكە اقوردادا كەڭەيتىلگەن قۇرامداعى كەلىسسوزدە.

سونداي-اق بەلگيا مەن قازاقستاننىڭ كومپانيالارى، ۋنيۆەرسيتەتتەرى جانە ءتۇرلى مەكەمەلەرى اراسىندا ءبىرقاتار كەلىسىمگە قول قويىلادى. بۇل ەكونوميكالىق، عىلىمي-ءبىلىم بەرۋ جانە گۋمانيتارلىق بايلانىستاردى ودان ءارى نىعايتۋعا مۇمكىندىك بەرەدى.

- 2027 -جىلى ديپلوماتيالىق قاتىناستارىمىزدىڭ ورناعانىنا 35 جىل تولاتىنىن ەسكەرسەك، بۇل جەتىستىكتەر ەكى ەل اراسىنداعى سەرىكتەستىكتىڭ بەرىك ەكەنىن كورسەتەدى. سوڭعى جىلدارى ەكونوميكالىق بايلانىستارىمىز ايتارلىقتاي نىعايدى. سوڭعى ون جىلدا ەكىجاقتى ساۋدا كولەمى ءۇش ەسە ءوستى، ال بەلگيانىڭ قازاقستان ەكونوميكاسىنا سالعان ينۆەستيتسياسى 10 ميلليارد دوللاردان استى، - دەدى بەلگيالىق مينيستر.

اسىرەسە ەكى ەل كولىك-لوگيستيكا، ماڭىزدى شيكىزات تۇرلەرى، دەنساۋلىق ساقتاۋ، اۋىل شارۋاشىلىعى جانە جاڭارتىلاتىن ەنەرگەتيكا سالالارىنداعى ىنتىماقتاستىقتى تەرەڭدەتۋگە زور مۇمكىندىك بارى ايتىلدى.

- ترانسكاسپيي حالىقارالىق كولىك ءدالىزى ەۋروپا مەن ورتالىق ازيا اراسىنداعى كولىك قاتىناسىن دامىتۋدا ستراتەگيالىق ماڭىزعا يە، - دەدى جان-ليۋك كريۋيكە.

ايتا كەتەيىك، 11-14-قازان كۇندەرى بەلگيالىقتار كورولى فيليپپ جانە پاتشايىم ماتيلدانىڭ قازاقستانعا مەملەكەتتىك ساپارى وتەدى.

ساپار باعدارلاماسى ءتورت نەگىزگى باعىتتى قامتيدى. ولار - اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.

بۇگىن قاسىم-جومارت توقايەۆ بەلگيالىقتار كورولى فيليپپ پەن ماتيلدا پاتشايىمدى اقوردادا قارسى الدى.

ءوز كەزەگىندە بەلگيالىقتار كورولى فيليپپ پەن پاتشايىم ماتيلدا ساپاردان ەرەكشە اسەر العانىن ايتۋدا.