قازاقستاندىق ديزاينەرلەر قىتايدا جاڭا توپتامالارىن تانىستىردى

«التىن دالا - جىبەك جولىنىڭ جاڭعىرىعى» ءسان كورسەتىلىمىندە قازاقستاندىق ديزاينەرلەر حالىقارالىق كورەرمەندەر مەن جوعارى ءساندى باعالايتىن قاۋىمعا اۆتورلىق تۋىندىلارى مەن بىرەگەي بۇيىمدارىن ۇسىندى.

قازاقستاندىق كۋتيۋرەلەردىڭ قىتايعا ساپارىن ۇيىمداستىرعان QazTrade ساۋدا ساياساتىن دامىتۋ ورتالىعى باس ديرەكتورىنىڭ ورىنباسارى اينۇر امىربەكوۆا كرەاتيۆتى يندۋستريانى ىلگەرىلەتۋ وتاندىق ونىمدەردىڭ سىرتقى نارىققا جۇيەلى تۇردە شىعۋىنا باعىتتالعانىن اتاپ ءوتتى.

- ءبىزدىڭ ديزاينەرلەر ۇلتتىق داستۇرلەردى الەمدىك ءسان ۇردىستەرىمەن ءساتتى ۇيلەستىرەدى. ءار برەندتىڭ ارتىندا وزىندىك تاريحى، شىعارماشىلىق يدەياسى جانە كاسىپكەرلىك باتىلدىعى تۇر. وتاندىق ءسان يندۋسترياسىنىڭ حالىقارالىق ارەناعا، سونىڭ ىشىندە قىتاي نارىعىنا شىعۋ الەۋەتى جوعارى دەپ ەسەپتەيمىز. «QazTrade» ءوز كەزەگىندە وندىرۋشىلەرگە جان-جاقتى قولداۋ كورسەتۋدى جالعاستىرىپ، ولاردىڭ بيزنەسىن شەتەلدە كەڭەيتۋىنە، سەنىمدى سەرىكتەستەر تابۋىنا جانە ونىمدەرىن ىلگەرىلەتۋىنە كومەكتەسەدى، - دەدى ول.

ونىڭ ايتۋىنشا، مۇنداي ءىس-شارالاردىڭ ماقساتى - شەتەلدىك سەرىكتەستەرمەن تۇراقتى ىنتىماقتاستىق ورناتۋ. بۇل باعىتتا «QazTrade» كومپانياسىنىڭ بەيجىڭدەگى سەرىكتەستىك كەڭسەسى بەلسەندى جۇمىس ىستەيدى. بۇدان بولەك، جاقىن ارادا «التىن دالا» ساۋدا ءۇيى اشىلادى. ول قازاقستان ونىمدەرىن تۇراقتى تانىستىراتىن جانە تىكەلەي ەكسپورتتىق جەتكىزىلىمدەردى دامىتۋعا مۇمكىندىك بەرەتىن الاڭعا اينالادى.

- بۇگىنگى كورسەتىلىم قازاقستاندىق «ساندىق» مەيرامحاناسىمەن بىرلەسىپ ۇيىمداستىرىلدى. سونىڭ ارقاسىندا قازاقستاندى ءسان مەن ديزاين ارقىلى عانا ەمەس، ۇلتتىق تاعامدارى ارقىلى دا تانىستىرۋعا مۇمكىندىك تۋدى. قازاقستاننىڭ قىتايداعى ەلشىلىگى مەن بەيجىڭدەگى قازاقستاننىڭ مادەني ورتالىعىنىڭ قولداۋى بۇل باستامانى جۇزەگە اسىرۋعا جول اشتى. وسىلايشا، مادەني ديپلوماتيا مەن ەكسپورتتى دامىتۋ مىندەتتەرى ءوزارا ۇشتاستى، - دەپ تۇيىندەدى اينۇر امىربەكوۆا.

جوبانىڭ كرەاتيۆ ديرەكتورى ءسابينا جيەنبايەۆانىڭ ايتۋىنشا، ءسان كورسەتىلىمى قازاقستاندىق ءسان يندۋسترياسىنىڭ ۇزدىك وكىلدەرىن ءبىر الاڭعا جينادى.

- بىزگە اسا تالانتتى ديزاينەرلەر كەلدى. شوۋدىڭ نەگىزگى ماقساتى - قىتاي كورەرمەندەرىنە ەلىمىزدە ديزاين يندۋسترياسى قارقىندى دامىپ كەلە جاتقانىن جانە بىرەگەي برەندتەر كوپ ەكەنىن كورسەتۋ. الداعى ۋاقىتتا مۇنداي جوبالار كوبەيەدى دەپ ۇمىتتەنەمىز، - دەدى ول.

ءسان كورسەتىلىمىنىڭ ارتىندا قازاقستاندىق كۋتيۋرەلەر قىتاي استاناسىنا ساپارى تۋرالى اسەرىن ءبولىستى.

BAY برەندىنىڭ نەگىزىن قالاۋشى بانۋ عايدار توپتاماسىنىڭ قازاق داستۇرلەرىندەگى تەرەڭ ماعىنالاردان شابىت العانىن ايتتى. كيىم ديزاينىندا، سونىڭ ىشىندە فۋتبولكالاردا، ءوسۋ مەن ىنتانى بىلدىرەتىن «قۇس قاناتى»، بەرەكە مەن مولشىلىقتىڭ نىشانى سانالاتىن «قوشقار ءمۇيىز» جانە وتباسى وشاعىن بەينەلەيتىن كيىز ءۇيدىڭ بەينەسى قولدانىلعان.

- ءبىز اتىراۋدا تۋىپ- وسكەنبىز جانە كۇندەلىكتى كيۋگە ىڭعايلى زاماناۋي كيىم ارقىلى ۇلتتىق مادەنيەتىمىزدى ناسيحاتتاۋعا تىرىسامىز. برەند ونىمدەرى بەيجىڭدەگى «التىن دالا» ساۋدا ۇيىندە ساتىلىپ، سۇرانىسقا يە بولىپ وتىر. سونداي-اق ا ق ش پەن ەۋروپاداعى دياسپورا وكىلدەرى اراسىندا دا تانىمال. ونىمدەرىمىز گەرمانيا، سولتۇستىك ماكەدونيا جانە وڭتۇستىك كورەيادا ۇسىنىلعان. جاقىندا وڭتۇستىك كورەيادا ءبىزدىڭ شوۋرۋم اشىلدى. بەيجىڭگە ساپاردان كۇتكەن ءۇمىتىمىز تولىق اقتالدى، - دەدى ول.

ءوز اتىمەن اتالاتىن برەندتىڭ نەگىزىن قالاۋشى ءارى ديزاينەرلەر اۋلەتىنىڭ ءۇشىنشى بۋىنىنىڭ وكىلى مەدينا ساقتاعانوۆانىڭ ايتۋىنشا، ول بەيجىڭدە 2023 -جىلعى قىركۇيەكتە نيۋ-يوركتە وتكەن ءسان كورسەتىلىمىنىڭ جەتىستىگىن قايتالاي الدى. دەفيلەدە قازاقتىڭ ءداستۇرلى ءەتنوستيلى مەن زاماناۋي ءسان ۇردىستەرىن ۇشتاستىرعان توپتاما ۇسىنىلدى. كورسەتىلىمنىڭ شارىقتاۋ شەگى قالىڭدىقتىڭ ءساندى وبرازى بولدى. برەند قىتاي نارىعىندا ازىرشە رەسمي تۇردە ۇسىنىلماعانىمەن، كومپانيا بۇل ەلدەگى قاتىسۋ اياسىن كەڭەيتۋدى جوسپارلاپ وتىر.

- بۇگىن ءبىز توپتامامىزدى بەيجىڭدە العاش رەت تانىستىرىپ وتىرمىز. وسى وقيعاعا ارنايى «جىبەك ديالوگى» اتتى كيىم توپتاماسىن ازىرلەدىك. ونىڭ تۇجىرىمداماسى مادەني كودتار، ماتالاردىڭ فاكتۋراسى، ءتۇسى مەن تۇرلەرى ارقىلى ۆيزۋال كونتەنتتەگى زاماناۋي قارىم- قاتىناستى بەينەلەيدى. كورسەتىلىمدە جەتى نەگىزگى وبراز ۇسىنىلدى. دەفيلە تابىستى ءوتتى، - دەدى ءوز اتىمەن اتالاتىن برەندتىڭ نەگىزىن قالاۋشى ءارى ديزاينەر تاتيانا يان.

ءساندى ديزاينەرلىك كيىمدەردەن بولەك، كورمەدە ۇلتتىق بولمىستى بەينەلەيتىن قازاقستاندىق زەرگەرلىك بۇيىمدار دا ۇسىنىلدى.

- بۇل - برەندىمىزدى حالىقارالىق ارەنادا العاش رەت تانىستىرۋىمىز. ءبىز قازاقستاندا دا زەرگەرلىك بۇيىمدار ءوندىرىسى بار ەكەنىن كورسەتكىمىز كەلدى. زاماناۋي اشەكەيلەر ارقىلى برەندىمىز ەلىمىزدىڭ تاريحى مەن مادەني كودىن ساقتاپ، ونى كوپشىلىككە تانىستىرادى. قىتايدا دا جەرگىلىكتى وندىرۋشىلەر ۇلتتىق قۇندىلىقتاردى زاماناۋي ديزاينمەن ۇشتاستىراتىنىن بايقادىق. فيلوسوفيامىزداعى وسى ورتاقتىق ىنتىماقتاستىققا بەرىك نەگىز قالايدى. ءبىز سەرىكتەستىك بايلانىستاردى دامىتىپ، حالىقارالىق نارىققا شىعۋعا ءۇمىتتىمىز، - دەدى Kazyna Gold زەرگەرلىك ءۇيىنىڭ ديرەكتورى گۇلميرا ءابراحمانوۆا.

ءسان يندۋسترياسىنىڭ قىتايلىق وكىلدەرى كورسەتىلىم كەزىندە ونىڭ وزدەرىنە ەرەكشە اسەر قالدىرعانىن ايتىپ، قازاقستاندىق ديزاينەرلەردىڭ دەڭگەيى مەن قىتاي نارىعىنداعى قاتىسۋىن كەڭەيتۋ مۇمكىندىكتەرىن جوعارى باعالادى.

ەتنوتاقىرىپ پەن ءداستۇرلى زەرگەرلىك اشەكەيلەرگە باسىمدىق بەرەتىن برەندتەرگە قىتاي نارىعىنا شىعۋ ستراتەگياسىن مادەني ءارالۋاندىعى مەن ۇلتتىق ازشىلىقتاردىڭ داستۇرلەرى باي وڭىرلەردەن باستاۋدى ۇسىندى. بۇل ونىمدەردى جەرگىلىكتى اۋديتوريانىڭ سۇرانىسىنا بارىنشا ۇيلەسىمدى بەيىمدەۋگە مۇمكىندىك بەرەدى.

ەسكە سالايىق، بۇعان دەيىن انكارادا تۇركسوي ۇيىمىنىڭ IX ايەلدەر جانە ەتنو-ءسان اپتالىعى باستالعانىن حابارلاعانبىز. وعان تۇركى الەمىندەگى مەملەكەتتەر مەن وڭىرلەردىڭ ديزاينەرلەرى جانە مادەنيەت وكىلدەرى جينالدى.