قازاقستاندىق وقۋشىلار گرەكيادا وتكەن حالىقارالىق وليمپيادادا جەڭىسكە جەتتى

بۇل تۋرالى قازاقستانداعى KGL Contest وليمپياداسىنىڭ رەسمي ۇيلەستىرۋشىسى EDU Stream حابارلادى.

الەمنىڭ 39 ەلىنەن وقۋشىلار قاتىسقان اعىلشىن ءتىلىنىڭ KGL Contest-2026 حالىقارالىق وليمپياداسىنىڭ A1 دەڭگەيى بويىنشا فينالىندا ەراسىل جيەنعالي باق سىنادى. الماتى وبلىسىنان بارعان وقۋشى ءوز دەڭگەيىندە ۇزدىك بولىپ، ءبىرىنشى ورىن الدى.

⁃ بۇل جەڭىستەن مەن وزىمە ماڭىزدى قورىتىندى جاسادىم. وزىڭە سەنىپ، سوڭىنا دەيىن ارەكەت ەتسەڭ، ەڭبەگىڭ مىندەتتى تۇردە ناتيجەسىن بەرەدى. مەن ءۇشىن بۇل - جاي عانا مەدال ەمەس، ۇلكەن تاجىريبە بولدى، - دەدى ەراسىل جيەنعالي.

ال A2 دەڭگەيىندە استانا قالاسىنداعى نازاربايەۆ زياتكەرلىك مەكتەبىنىڭ وقۋشىسى ادەل تالعات كۇمىس جۇلدە جەڭدى. ءبىلىم سايىسىنىڭ قورىتىندى كەزەڭىنە ەلىمىزدەن جالپى ءتورت وقۋشى قاتىسقان.

جالپى مەكتەپكە ارنالعان KGL Contest اعىلشىن ءتىلىنىڭ وليمپياداسىندا قازاقستاندىق وقۋشىلار ەكىنشى رەت سايىسقا ءتۇسىپ وتىر. العاش رەت 2025-جىلى قاتىسقان الماتى قالاسىنىڭ وقۋشىسى داريا ناسيمۋللينا B2 دەڭگەيى بويىنشا ءبىرىنشى ورىن يەلەنگەن بولاتىن.

ەسكە سالايىق، ەلىمىزدە اۋىل مەكتەبىنەن شىققان رەسپۋبليكالىق وليمپيادا جۇلدەگەرى 10 ەسە كوبەيدى.